Read Rongmei Naga JEREMIA 32 Bible Online

JEREMIA 32 - Rongmei Naga bible

JEREMIA 32

¹Zedekia rui Juda tuang guangc swmei ruhmei tingkwm, Guangh Nebukadnezar rui Babilonmei guangc swmei 18mei kwm RINGHPOUC rui akhou sa dat re.

²Mi ganv khou tei Babilonmei tuang rihmei nunc rui Jerusalem ta adow bam khwan e, khatni ata guanghkai tuang kaimav khou bangclou bam khwan e.

³Guangh Zedekia rui ata khou tei bangclou bam khwan e, kalam thu RINGHPOUC rui kumna sa e twna ai rui kumna sa khwan e, “Ai rui Babilonmei guangc ta mi kaidai ti hei tila puni the,

⁴kumna Guangh Zedekia ni pak duak ngam pw lak khe. Kata tei Babilonmei guangc baanc khou tiipatlou puni the; kamei rui kata zaw lev zaw puanc adyangna kachuc puni the.

⁵Zedekia ta Babilon thangc phungc tat puni the, kumna ai rui kakhou taanv sw mak saanv kamei khou tei bam puni. Kamei rui Babilonmei ta adow bam sini kamei ngam ni tuang hamh the. RINGHPOUC ai rui sa the.”

⁶Jeremia rui sa e: RINGHPOUC rui akhou kumna sa e,

⁷Apulauc Shallum nac mpouh Hanamel rui Benjamin tuang ramv Anathot khou naimei katuang ramvpuk akhat ata laa o twna guang sa puni, kalam thu ai hei kakhang diangc liangmei riangluaic pui zaeng rui hei tei ai rui liu nimei thouc the.

⁸Khoutei RINGHPOUC rui saloumei kumcna Hanamel mi kaimav khou tei guangna ata Benjamin kandic khou naimei Anathot khou alaupuk tei liu o, hei tei nang rui thuak nimei thouc the liu datna nang tuang sw tho twna sa the. Kumna RINGHPOUC rui akhou salou changh dyng the twmei ai thay the.

⁹Ai rui ramvpuk tei kakhou rui laana kamanv tei daandi paek 17 tii kan the.

¹⁰Kumna ramv liumei tuang latdyng tei ai suaic sw the; hei tei sil swlou the, sakhi nunc ni nai the, kumna kamanv tei duh khou ndath pat the.

¹¹Kumna liumei tuang latdyng che mi khou tei nuh nahloumei tuang sil swloumei khatni sil swloumakmei che tei lev twna ai laana

¹²Neria rui puanhmei Mahseia tou Baruk khou hei tei tiilou the. Ai rui hei tei Hanamel khatni mi che tei suaic swmei sakhi nunc khatni kaimav khou ding bammei nunc hu khou kabaanc khou tiilou kan the.

¹³Kaniw kaguayna hu khou ai rui Baruk khou kumna sa the,

¹⁴“Mi che hei laa laana tingkwm tingsaengcna nai bam nuh khang nianglai khou rylou o twna Ngamparymei RINGHPOUC, Isaraelmei Racguangc rui nang khou latdanv swna sa e.

¹⁵Mi kandic khou hei kai, laupuk, khatni drakhalau liu dat puni de twna Ngamparymei RINGHPOUC, Isaraelmei Racguangc rui sa the.”

¹⁶Ramv liumei che tei Baruk khou tiiloumei tangv, ai rui kumna huayney the,

¹⁷“Kauh Liangmei RINGHPOUC, daihmei nang ngamv khatni nang pumtan paan rui nang rui tingpuk kandih damclou the; nang khang ngam lakmei ramhkhat na sini maek ge.

¹⁸Nang rui meickin aching aching khou nang tuang taek makmei ramzian lyanlou the, tiki nang rui meic nunc ta kaniw pupouc nunc tuang paap zaeng rui riaplou the. Nang hei daihmei ngammei Racguangc e; nang hei Ngamparymei RINGHPOUC e.

¹⁹Nang rui gaymei raeng mpeyna swlouna taanvdaih mpeyna taanclou the; meic nunc rui taanhmei taanv kaguayna nang how e, kumna kaniw tuang taanv theilayna nang rui kaniw khang kaphy tii e.

²⁰Reydouc nang rui Izip kandic khou charynmei taanv mpeyna taanc lyanlou khwan e, nang ta kabamv kathuih na khou thay diu khang ntaw ni nang rui Isaraelmei khou khatni zaatc baihmei nunc khou mi kumhmei tei taanclouna bam e.

²¹Charynmei taanv taanc lyanloumei tei rui aniw ta zauczihmei nunc ta tipinglou the, nang tuang mei nunc ta Izip khou rui phungc pat khang nang pumtan khatni nang ngamv lyanlou the.

²²Nang rui kaniw pupouc nunc khou nrianhloumei theilayna mi ramv gaymei khatni kandih gaymei ramvnga ramvngu hei kaniw khang tiilou the.

²³Tiki kaniw rui guangna mi kandic hei kaniw tuang swna lungc pwkhou, kaniw rui nang tuang latdanv guay piu mak khe khatni nang tuang latdyn theilayna lungh mak khe; kaniw ta taanc o twna samei tei kaniw khat na sini taanh mak khe. Kumhpui zaeng rui mi swkamut kamaimei guay hei nang rui kaniw ruc khou tiguanglou the.

²⁴“Babilonmei nunc rui mi kaidai ti hei laa khang chaeng thwan nkuaylou the, kumna kaniw mi ti hei adow the. Suc-rih, nkow-ndaapcmei, khatni ravpyan rui mi kaidai ti hei kaniw baanc khou tikeylou puni the. Nang rui saloumei guay tei guang tangc the twmei nang how puni the.

²⁵Tiki Kauh Liangmei RINGHPOUC, mi kaidai ti hei Babilonmei rui laa kan nina bam sini mi ramvpuk tei sakhi nunc hu khou liu o twna nang rui latdanv tiimei tuang de.”

²⁶Khoutei RINGHPOUC rui akhou sa the,

²⁷“Ai hei maansei kaguayna tuang RINGHPOUC khatni Racguangc e. Akhang ngam lakmei tuang ramh akhat na sini maek ge.

²⁸Ai rui mi kaidai ti hei Babilonmei guangc Nebukadnezar khatni karicmei nunc baanc khou tiilou puni the; kaniw rui mi kaidai ti hei laa puni the.

²⁹Kumna mi hei mai nteilou puni the. Kaniw rui hei tei khatni kaniw rui kainam khou Baal khang agaw ntei bammei khatni kaniw tuang rav nunc khang zouhpaanv keyna katna alungpuam tithauna bammei kai guay tei ni ntei ngam puni the.

³⁰Juda khatni Isaraelmei hei alauc swbam khou rui thauna kaniw taanv rui ata tipianlou makna alung tipuamclou guang the.

³¹Mi kaidai hei kasiamh thau rap khou rui thauna mi kaidaimei nunc rui alung tipuamc the khatni areic tithau the. Mi kaidai ti hei swkamut kamailou khang alung ding the,

³²kalam thu Juda khatni Jerusalemmei nunc, kaniw tuang guangc nunc, kapy nunc, amuh nunc khatni muhzwng nunc kazauhna simei taanv taanc the.

³³Akhou kaniw thei karihlou the; kumna ai rui kaniw ta nchamlou bam ti sini, kaniw nking nii mak ge khatni thay nii mak ge.

³⁴Ata kalum khang swloumei Isaraelmei khou chanymei ravmaengc nunc louna kaniw rui hei tei sw tanac the.

³⁵Molek rav khang kaniw nac mpouh aluh nunc ta khaeng khang Hinnom Nzaengc khou Baal rav khang ravchabamv kasiamhlou the. Mi hei taanh khang ai rui kaniw khou latdanv tii mak ge, kumna kaniw rui mi kumhmei taanv hei taancna Judamei nunc ta paapc tisw puni twmei ai ning sini ning pat mak ge.”

³⁶RINGHPOUC, Isaraelmei Racguangc rui akhou sa e, “Jeremiale, suc-rih, nkow-ndaapcmei khatni ravpyan guangna mi kaidai ti hei Babilonmei guangc baanc khou tikeylou puni the twna meic nunc rui sa bam geic the. Ntaw ai rui samei hei nking o.

³⁷Ai alung puamcna areic patna bammei ganv khou zin phaklou kanmei kandih guay khou tei rui ai rui kaniw ta tei khuam kaduai dat puni the. Ai rui kaniw ta mi kandic khou hei phungc guanglou datna giuga makna tilungclou dat puni.

³⁸Hei khou kiu kaniw amei nunc sw puni, kumna ai kaniw Racguangc sw puni.

³⁹Kaniw kikta guay khang gay diu khang rui kaniw ata pingthayna lungh khang khatni gay taanv taanc bam diu khang rui ai rui kaniw khou lungning akhat na khatni chaeng akhat na tiilou puni.

⁴⁰Ai rui kaniw lev tingsaeng latdyng swlou puni. Ai rui kaniw khang taanvgay taanclou nthaekc zat lak ge, khatni kaniw akhou rui tat dat zat mak khang, kaniw lungsyng khou rui kaniw ata ping khang ai rui swlou puni.

⁴¹Ai rui kaniw khang taanc loumei gay taanv khou tei neihla bam puni. Ai rui kaniw ta mi kandic khou alung adu kapwm rui lwmnuhmei swna tilungclou bam puni.

⁴²“Ai rui mi swkamut kamaimei hei kaniw ruc khou tiguangmei kumcna ai rui nrianhloumei gaymei guay hei ni kaniw khang tiilou puni.

⁴³Mi kandic khou hei tazikramv kumc maansei ni khouringh khounah ni lungc dat lak khe, kumna mi hei Babilonmei nunc baanc khou tiilou puni the twna meic nunc rui sa bam e tiki mi kandic khou hei ramvdui liuna lungc dat puni.

⁴⁴Hei tei meic nunc rui liuna, ramvdui liumei latdyng suaic sw lana, sil swlouna, sakhi naina sw dat puni. Hei tei Benjamin ramv guay khou, Juda tuang kaidai guay khou khatni chyngramv, chyngphay ramv khatni Juda dihba biak tuang kaidai guay khou heikum bam dat puni. Ai rui kaniw ta kaniw tuang kandic khou tiguanglou dat puni. RINGHPOUC ai rui sa the.”