Read Rongmei Naga JEREMIA 33 Bible Online

JEREMIA 33 - Rongmei Naga bible

JEREMIA 33

¹Ai rui kang bammei ganv khou tei RINGHPOUC lat akhou sa guang dat re.

²RINGHPOUC, kandih kasiamh lana kabamv khou duancloumeipu rui akhou sa e. Kazanc RINGHPOUC twna kawmeipu rui sa e,

³“Ata kaw o, kum e thei ai rui dawlou puni; nangniw rui thay zat zat makmei charynmei nkamhloumei daihmei ai rui dinclou puni.

⁴Jerusalem tuang kai guay khatni Juda tuang guangckai swra key puni the twna RINGHPOUC Isaraelmei Racguangc ai rui sa the.

⁵Babilonmei nunc tuang dingbinna raengh khou chaeng thwan thauna sw bammei ta tei patna adow bammei rui nsa di the. Mi hei ruina alungpuamcna, areic thauna swkey pw nimei meic nunc tuang phouh rui mi kaidai hei padiklou khang na de. Mi kaidai mei nunc tuang taanv zaeng rui ai mi kaidai khou rui karih nthei tat the.

⁶Tiki ai rui mi kaidai khatni mi tuang mei nunc ti hei tigaylou dat puni kumna kaniw khou pumhgaymei tiilou dat puni. Ai rui kaniw ta nchu-nzaenghna khatni giuga makna tilungclou dat puni.

⁷Ai rui Juda lev Isaraelmei ta tilungcgay chingkhiuhlou dat puni, kumna ai rui kaniw ta kahu nungc lwnlung khou tei kasiamh thaulou dat puni.

⁸Kaniw rui aruc khou taanclou kanmei paap guay khou tei rui ai rui kaniw ta sw nthanlou dat puni, khatni ai rui kaniw tei kuaklou dat puni.

⁹Jerusalem hei ata tineihlamei bamv khatni tichingkhiuhmei bamv tiswlou puni, khatni mi hei agaengh swpui bamv sw puni; kumna ai rui Jerusalemmei nunc khang taancloumei gaymei taanv khatni ai rui mi kaidai khou tiguangloumei lungcgay chingkhiuhmei chamv tei kandihmei zaatc kathuic rui chuna ping kadunh puni.”

¹⁰RINGHPOUC rui sa e, “Mi bamv hei ramvkaengvdic kumc the, mi khou hei maansei ni khouringh nunc ni bam taan the twna meic nunc rui sa bam e. Kumna kaniw rui sa bammei tei nchumh the; Juda tuang kaidai guay khatni Jerusalem tuang chaengdai guay karaeng di the; maansei ni khouringh ni hei khou tei maek khe.

¹¹Tiki mi bamv guay khou hei neihla zaeng gayna kauhmei khwan khatni nowsuanh ngai tuang neihlamei khwan chu dat puni. Thuanckumei puatkat atuang Ravkai khou phungc guangna meic nunc suan bammei lu nangniw chu dat puni; ‘Ngamparymei RINGHPOUC ta thuancku o, kalam thu kamei hei gay e khatni karamzian hei tingsaengzaeng e,’ twna kaniw suan puni. Ai rui mi kandic ti hei kahu nungc kumcna tilungcgay chingkhiuhlou dat puni. RINGHPOUC, ai rui sa the.”

¹²Ngamparymei RINGHPOUC rui sa e, “Ramvkaengvdic kumhmei, maansei ni khouringh khounah ni lungh makmei kandic hei lauziu gaenghmei nunc rui kaniw tuang lauziu gaenghmei bamv, khouringh byn sw dat puni.

¹³Chyngramv tuang kaidai guay khou, chyngphay khou, Juda dihba ramv khou, Benjamin tuang ramv khou, Jerusalem daeng khou naimei namv guay khou khatni Juda tuang kaidai guay khou lauziu gaenghmei nunc rui kaniw tuang lauziu nunc sing pac bam dat puni. RINGHPOUC ai rui sa the.”

¹⁴RINGHPOUC rui sa the, “Ai rui Isaraelmei khatni Judamei nunc khou swlou kanmei latdyng tei tiguang tangclou nimei ganv guang pw the.

¹⁵Mi ganv khou kiu ai rui ravchaptatmei David kikta akhat ta guangh khang kadahlou puni. Mi guangc tei rui mi kandic kapwm khou nchumhmei khatni nzihmei taanclou puni.

¹⁶Juda khatni Jerusalemmei nunc ta kanpatlou puni kumna kaniw giuga makna bam puni. Mi kaidai zanc tei ‘RINGHPOUC Aniu ta Kanloumeipu’ twna kaw puni.

¹⁷David kikta rui Isaraelmei guangc sw tanh tanna bam puni,

¹⁸khatni Levi kaikhwangmei rui amuh nunc swna khaengmei zaat guay khaengna khatni puatkat katna asiamruai swna bam puni twna RINGHPOUC ai rui latdyng sw e.”

¹⁹RINGHPOUC rui akhou sa e,

²⁰“Zingbangc kalaanv hei katuang ganv ganv khou patna bam khang ai rui zingbangc khatni kalaanv lev latdyng sw the; kumna mi latdyng tei sw bak dat ni tuang hamh the.

²¹Hei tei kumcna ai rui abangc David khou ni kakikta rui guangh sw tanh tan bam puni, kumna Levi kaikhwangmei amuh khou ni kaniw rui tingsaeng asiamruai sw puni twna latdyng swlou kan the; kumna mi latdyng nei hei swbak dat lak khe.

²²Ai rui abangc David kikta khatni Levimei amuh nunc kikta ta tingpuk khou naimei gaanchuangcna kasing chak ngam lakmei zu khatni duipui syniang kasing chak thay lakmei zu tigeiclou puni.”

²³RINGHPOUC rui akhou sa e,

²⁴“Isaraelmei lev Juda, ai rui kadahloumei kaikhunc kanei ta ai rui ganc pat the twna meic nunc rui akumhna sa bam bu cho twmei nang thaylou maknga cho? Kumna kaniw rui amei nunc ta malana zauc the kumna kaniw ta zaatc akhat re twna laalou mak khe.

²⁵Tiki, RINGHPOUC ai rui zingbangc lev kalaanv khou latdyng swlou the, kumna tingpuk kandih khang swlou the, kumna tingpuk kandih khang kariak kasiamhlou the.

²⁶Ai rui mi hei suai makna taancloumei kumcna ai rui Jakob kikta khou khatni abangc David khou swlou kanmei latdyng tei tat key puni. Abraham, Isak, khatni Jakob kikta ta sin khang ai rui David kikta pang khou rui gaanv khat ta kadahlou puni. Ai rui amei nunc ta zauc-nzianlou dat puni kumna kaniw ta tilungcgay chingkhiuhlou dat puni.”