Read Rongmei Naga JEREMIA 34 Bible Online

JEREMIA 34 - Rongmei Naga bible

JEREMIA 34

¹Babilonmei guangc Nebukadnezar khatni katuang ricmei nunc, kabangc khou bammei guangcdic guay khatni zaatc guay tuang ricmei nunc kazauhna Jerusalem khatni kadaeng khou naimei kaidai guay ta adow bammei ganv khou RINGHPOUC rui akhou salou khwan e.

²Judamei guangc Zedekia khou sa o twna RINGHPOUC, Isaraelmei Ravguangc rui kumna sa the, “RINGHPOUC ai rui mi kaidai ti hei Babilonmei guangc baanc khou tiilou puni the, kumna kamei rui mi ti hei mai raw maan puni the.

³Nang duak dat ni tuang hamh the; nang ta nym puni the kumna kakhou tiilou puni the. Nang rui kata zaw lev zaw howna kachuc puni the; kumna nang Babilon thangc tat puni the.

⁴Zedekia, ai rui nang lam khou samei lat hei nking o. Nang ta rihbamv khou swluai lak ge.

⁵Nang nchu-nzaenghna theic puni, nang hu khou guangh swloumei nang pu nang pouc nunc theih khou agaw nteina mbeihloumei kumcna nang khang ni kaniw rui agaw nteilou puni. ‘Aniu guangc theic the!’ twna kaniw nang ta kapna huay puni. RINGHPOUC ai rui sa the.”

⁶Khoutei Babilonmei guangc tuang ricmei nunc rui mi kaidai ta tei adow bammei ganv khou,

⁷ai rui mi lat hei Guangh Zedekia khou Jerusalem khou tiilou the. Mi ganv khou tei kaniw rui Juda khou raengh raengloumei kaidai kanei na nsaekcloumei Lakis lev Azeka ta ni adow bam khwan e.

⁸Jerusalemmei guay na ta Zedekia rui latdyng swna nyng swmei sw khang kaw patmei tangv Jeremia khou Ravguangc lat guang khwan e.

⁹Isaraelmei nchamc ta bangh swna nruaih mak khang rui Guangh Zedekia khatni Jerusalemmei nunc rui kaniw tuang Ibrimei bangc nunc ntumei ta ni nggaanvmei ta ni mpatlou ni the twna nuhlou the.

¹⁰Kaniw meic kaguayna khatni kaniw tuang kapy swmei kaguayna rui kaniw tuang bangc nunc ta mpatlou ni the, kumna kaniw ta bangh tisw dat lak khe twna kaniw nuh the. Kaniw rui bangh nunc ta mpatlou the.

¹¹Tiki katang thangc kaniw rui mpatlou kanmei bangc nunc ta laa dat lana namna bangh tisw dat the.

¹²Khoutei RINGHPOUC,

¹³Isaraelmei Racguangc rui meic nunc khou sa o twna akhou kumna sa e, “Ai rui nangniw pupouc nunc kaniw ta Izip khou rui kanlouna bangh sw bammei khou rui ricloumei douc tei ai rui kaniw lev twna latdyng swlou khwan e.

¹⁴Ibrimei tingkwm charuk bangc sw kanpui mei ta tei tingkwm chaneimei khou thu mpatlou dat nina e twna ai rui kaniw khou dinclou kan the. Tiki nangniw pupouc nunc ai rui samei tei thouh swlou mak ge khatni nkinglou mak ge.

¹⁵Zaeng ramhbiuc dou hu thangc tei nangniw lunghlaicna ata tipianmei taanv taanclou the. Nangniw meic guayna Isaraelmei nchamc bangh nunc ta tei mpatlou ni the twmei nuh kan the, kumna ata kalummei Ravkai khou tei nangniw ahu khou latdyng sw kan the.

¹⁶Tiki nangniw lung kalaic datna ata chakhwang sw dat mak khe. Nangniw rui bangh nunc ta tei kaniw rui kahawmei theilayna mpatlouna nangniw rui laa dat the kumna namna bangh tisw dat the.

¹⁷Kumhpui zaeng rui ntaw nangniw alat piu mak khe twna samei tuang e: nangniw rui Isaraelmei nchamc ta nyng tiswlou mak khe. Gay the, kum e thei, ai rui nangniw khang nyngswmei tiilou puni the: suc-rih, ravpyan, khatni nkow-ndaapcmei hu khou nyngswna theih khang tiilou puni the. Ai rui nangniw khou taancloumei tei rui ai rui kandihmei ta tipinglou puni.

¹⁸Latdyng sw lana mi tuang latdyng tei piu maknga paapc taanhpui mei ta thu guaihnac ta kakhaan kanei khang danpatmei kumc puni.

¹⁹Mi kapaek raakmei khou tat nimei nunc kiu thu Jerusalem khatni Juda tuang meicdaihmei nunc, amuh nunc, kapy swmei nunc guayna kapaek raak kanmei nunc tei the.

²⁰Ai rui kaniw ta zauczihmei nunc, kaniw ta swluai niina bammei nunc khang tei tiipat puni the kumna kaniw tuang phouh guay tei nruay khatni nwmbangc khouringc nunc rui tu puni the.

²¹Ai rui Judamei guangc Zedekia ta katuang meicdaihmei nunc lev twna kaniw ta swluai niina bammei nunc baanc khou tiilou puni the. Ai rui kaniw ta Babilonmei rihmei nunc, nangniw ta adow taanna hanc dat kanmei nunc baanc khou kaniw ta tiilou puni the.

²²Zauclo! Ai rui latdanv tii puni the, kumna kaniw mi kaidai khou hanc guang dat puni the. Kaniw mi kaidai ti hei adow puni the, kumna kaniw rui mi kaidai ta tei laana mailou puni the. Ai rui Juda tuang kaidai guay ta meic lungh makmei tazikramv kumc tiswlou puni the. RINGHPOUC ai rui sa the.”