Read Rongmei Naga JEREMIA 35 Bible Online

JEREMIA 35 - Rongmei Naga bible

JEREMIA 35

¹Josia nac mpouh Jehoiakim rui Judamei guangc swna bammei douc RINGHPOUC rui akhou kumna sa e,

²“Rekab puinac nunc khou tei tatna kaniw ta kachuc o. Kaniw ta Ravkai tuang kainung akhat khou kaw guangna drakhadui tii tio.”

³Kumna ai rui Rekab puinac kapwm—Jaazania (baihmei Habazzinia nac mpouh Jeremia rui puanhmeipu e) khatni kachana nunc lev kanac mpouh nunc ta kawna

⁴Ravkai khou nduangh guang the. Igdalia rui puanhmei muhzwng Hanan tuang ziap nunc tuang kainung khou ai rui kaniw ta nduangh gut the. Mi kai hei Shallum rui puanhmei Maaseia, Ravkai khou nthukmei meicdaihmeipu tuang kaikac ruc khou, khatni baihmei meicdaihmei tuang kaikac daeng khou nai e.

⁵Ai rui kaniw hu khou drakhadui buangc dungclouna “Mi drakhadui hei zangv tho,” twna kaniw khou sa the.

⁶Tiki kaniw rui daw the, “Aniw drakhadui zangv mak ge. Aniw pupouc Rekab rui puanhmei Jonadab rui aniw khatni aniw tounac nunc drakhadui khat sini zangv nuh mak ge twna kadylou duc e.

⁷Kamei rui aniw ta kai ni sw riu, lau ni taanh riu, drakhalau lingh riu, liu ni liu riu twna kadylou e. Kumna pheykai khou na lungcna gin kumcna lungc bam o twna kamei rui kalatdanv swna kadylou the.

⁸Jonadab rui dincloumei guay tei aniw piu the. Aniw ni, aniw now nunc ni, aniw nac mpouh aluh nunc ni gaanv khat na sini drakhadui zangv mak ge.

⁹Aniw lungh khang kai sw mak ge pheykai khou lungc bam de, khatni aniw tuang drakhalau, laupuk khatni nap ni maek ge.

¹⁰Aniw pupouc Jonadab rui aniw khou latdanv swna tiimei tei aniw piu nthuihna piu bammei tuang de.

¹¹Tiki Guangh Nebukadnezar rui rihkey khou tei rui Babilonmei khatni Siriamei ricmei nunc khou rui duak khang Jerusalem khou guang ni the twna guangmei tuang e. Heikumna aniw hei Jerusalem khou lungc bammei tuang e.”

¹²Mi tangv RINGHPOUC rui Jeremia khou sa e,

¹³Juda khatni Jerusalemmei nunc khou tatna sa o twna Ngamparymei RINGHPOUC, Isaraelmei Racguangc rui kumna sa e, “Tabui swna nangniw alat nking zih tu cho khatni ai rui samei piu mu tu cho twna RINGHPOUC ai rui thanv e.

¹⁴Jonadab kikta nunc rui drakhadui zangv riu twna samei kalatdanv tei piuna, kaniw gaanv khat na sini aseic nganvna drakhadui zangv mak ge. Tiki nangniw thu ai rui sana bam tisini alat piu mak ge.

¹⁵Ai rui abangc muhzwng nunc ta thouc guangna kaniw rui nangniw ta nangniw tuang simei chaeng tei ganclouna nchumhmei taanc o twna sa tanh tan guang the. Ai rui nangniw pupouc nunc khang khatni nangniw khang tiiloumei kandic khou hei lungh tanh tanna bam khang rav baihmei ta kalum nuh mak ge, kasiamruai ni sw nuh mak ge twna kaniw khou rui, nangniw khou sa guang kan the. Tiki nangniw ai rui samei ta nkinglou mak ge khatni lungh gutlou mak ge.

¹⁶Jonadab kikta nunc rui thu kaniw pupouc nunc rui tiimei latdanv tei piu e, tiki nangniw thu alat piu mak ge.

¹⁷Kumhpui zaeng rui, ntaw thu Ngamparymei RINGHPOUC, Isaraelmei Racguangc ai rui tiguang puni twna saloumei kamut kamaimei Juda khatni Jerusalemmei guay ruc khou tiguang puni the, ai rui samei ganv khou nangniw chu makmei zaeng rui, khatni ai rui kawmei ganv khou nangniw daw makmei zaeng rui mi hei ai taanc puni the.”

¹⁸Ngamparymei RINGHPOUC, Isaraelmei Racguangc rui nangniw khou kumna sa e twna ai rui Rekab puinacmei khou kumna sa the, “Nangniw pupouc Jonadab rui nangniw khou tiimei latdanv tei nangniw piu the; kamei rui dincloumei guay tei nangniw piu the, kumna nangniw ta taanc o twna samei guay tei nangniw taanc the.

¹⁹Kumhpui zaeng rui Rekab rui puanhmei Jonadab kikta hei asiamruai sw khang nggaanvmei gaat dat pw lak khe twmei latdyng hei Ngamparymei RINGHPOUC, Isaraelmei Racguangc ai rui alatdyng swna swloumei tuang the.”