Read Rongmei Naga JEREMIA 36 Bible Online

JEREMIA 36 - Rongmei Naga bible

JEREMIA 36

¹Josia nac mpouh Jehoiakim rui Judamei guangc swmei tuang padeihmei kwm RINGHPOUC rui akhou sa the,

²“Nang latrik zy laana ai rui Isaraelmei lev Juda lam khou khatni zaatc guayna lam khou ai rui nang khou saloumei tei hylou tho. Josia rui guangh sw bammei douc ai nang khou salou rey rap khou tei rui thauna aseic nganvmei khou ai rui nang khou salou kanmei guayna tei hylou o.

³Judamei nunc rui kaniw ruc khou tiguang nimei kamut kamaimei lam guay tei chu pwkhou kaniw tuang simei chaeng khou rui lunghlaic guang nuh e. Kum pwkhou ai rui kaniw tuang simei khatni paapc guay tei kuaklou puni.”

⁴Kumna ai rui Neria nac mpouh Baruk ta kawna RINGHPOUC rui akhou saloumei guay tei ai rui sana kata tihy the. Baruk rui mi guay tei latrikzy khou hylou the.

⁵Khoutei ai rui kumna dinclou the: “Ata Ravkai lungc khou tigut dat mak khe.

⁶Kumna meic nunc rui munthiangcna bam datmei ganv khou kiu nang mi khou tei tat ro kumna mi khou tei mi latrikzy khou hei rui pac ranvna pac tio, RINGHPOUC rui akhou saloumei guay hei khatni ai rui nang khou sana hyloumei guay hei kaniw chu kan diu. Hei tei meic guayna, Judamei nunc kaidai kaidai thangc rui ni guangmei nunc nganvna chu nuh nimei bamv khou pac o.

⁷Kaniw RINGHPOUC ta kalumna kaniw tuang simei chaeng khou rui hanc guang dat kho ni nuh e, kalam thu RINGHPOUC rui kalungpuamcna kareic patna sa bam the.”

⁸Kumna ai rui saloumei kumc rapna Baruk rui RINGHPOUC tuang lat tei Ravkai khou pac the.

⁹Jehoiakim rui Juda tuang guangc swmei tuang panguhmei kwm chakiumei bw khou munthiangcna RINGHPOUC zauzian neyna bam khwan e. Jerusalem khou bammei guay khatni Juda tuang kaidai guay khou rui guangmei guay mi khou tei munthiangcna bam khwan e.

¹⁰Kumna meic nunc rui nkingna bam khou tei Baruk rui latrik zy khou tei rui ai rui saloumei guay tei pac pat the. Kamei rui mi hei Ravkai lungc khou, Shaphan nac mpouh Gemaria, peikai tuang hymeipu tuang kainung khou pahmei tuang e. Katuang kaikac tei karucmei kaimav Ravkai tuang Raengckat Thanh chaengmun daeng khou e.

¹¹RINGHPOUC rui saloumei lat Baruk rui latrikzy khou tei rui pac patmei tei Gemaria nac mpouh, Shaphan tou Mikaia rui chu the.

¹²Khoutei kamei guanghkai thangc tei tatna peikai tuang hymeipu tuang kainung, kapouc-karaamc swmei nunc rui lat kaphianh bammei bamv khou tei guang the. Peikai tuang hymeipu Eliahama, Shemaia nac mpouh Delaia, Akhbor nac mpouh Elnathan, Shaphan nac mpouh Gemaria, Hanania nac mpouh Zedekia khatni baihmei kapouc-karaamc swmei guay mi khou tei bam khwan e.

¹³Baruk rui meic nunc khou pacloumei tei Mikaia kamei rui chumei kaguayna tei kamei rui kaniw khou tei raclou the.

¹⁴Khoutei kapouc-karaamc swmei nunc tei rui Baruk ta kamei rui meic nunc khou pacloumei latrikzy kiu phungcna guang o twna kaw o twna Jehudi (Nethania rui puanhmei, Shelemaia tou, khatni Khushi tak) ta thouclou the. Baruk rui hei tei kaniw khou phungc guang the.

¹⁵“Dungc key tho, kumna hei tei aniw khou pac tho,” twna kaniw rui sa the. Kumna Baruk rui hei tei pac the.

¹⁶Hei tei kamei rui pac pwkhou, kaniw kaluangna khat khat ta zauc the. “Mi hei aniw guangh khou poulou puni the.” twna kaniw rui Baruk khou sa the.

¹⁷“Mi hei nang akumhna hy tu cho? Jeremia rui sa pwna hy tu cho?” twna kaniw rui kakhou thanv the.

¹⁸Baruk rui daw the, “Jeremia rui sa pwna ai rui mi latrikzy khou hei hykeymei tuang the.”

¹⁹Khoutei kaniw rui sa the, “Jeremia nangney hei nkamh tat la tho. Nangney bamv tei meic gaanv khat na khou sini tithay dat la ri tho.”

²⁰Khoutei kaniw rui latrikzy tei peikai tuang hymeipu Elishama tuang kainung lungc khou lou duc lana guangh tuang peikai thangc tatna guangh khou mi lam guay tei poulou the.

²¹Khoutei latrikzy tei laa khang guangh tei rui Jehudi ta thouclou the. Kamei rui hei tei Elishama tuang kainung khou rui laana guangh khou khatni kadaeng khou ding huamc bammei meicdaihmei nunc khou tei hei tei pac the.

²²Hei tei tingsei ganv tina guangh tei katuang tingsei kai khou mai daeng khou dungc bam khwan e.

²³Hei tei kalangv kathumh padeih pac key tang pwkhou guangh rui hei tei baengsic rui ruamc kaekna mai khou phaiclou the. Hei tei kumcna mi latrikzy kapwm tei ruamc kaek lana mai ntei ngam kan the.

²⁴Guangh tei ni katuang meicdaihmei mi chamv tei chumei gaanv khat na sini ping mak ge khatni lungh kabiumei tuang maek ge.

²⁵Elnathan, Delaia khatni Gemaria kaniw rui nteilou rio twna guangh khou sa tisini kamei rui kaniw lat tei laalou mak khe.

²⁶Khoutei kamei rui ata khatni Baruk ta nym tho twna, Guangh nac Jerameel, Azriel rui puanhmei Seraia khatni Abdeel rui puanhmei Shelemia kaniw khou latdanv tii the. Tiki RINGHPOUC rui aney ta nkamhlou the.

²⁷Jeremia rui dincna hyloumei latrikzy tei guangh rui baengsic rui sw kasicna mai nteilou kanmei tangv RINGHPOUC rui Jeremia khou sa dat the.

²⁸Judamei guangc Jehoikim rui mai ntei kanmei reymei latrikzy khou hyloumei lat guay tei latrikzy akhat laa datna hylou tho twna RINGHPOUC rui sa e.

²⁹Guangh khou tei sa o twna RINGHPOUC rui kumna sa the, “Nang rui latrikzy tei mai ntei the kumna ‘Babilonmei guangc rui guangna mi kandic ti hei swkamut kamai puni the, kumna maansei ta ni khouringh ta ni swluai puni the twna tabui swna hy bam tu cho’ twna Jeremia khou thanv the.

³⁰Kumhpui zaeng rui, Guangh Jehoiakimle, RINGHPOUC ai rui nang khou sa e, nangkik nangta gaanv khat na rui sini David guangcdic khou guanghtu dat pw lak khe. Nang phouc kalaanv neih phaucna zingbangc gunh khou mbaengna bam khang mpaeng khou kaliang ganclou puni the.

³¹Nang rui taanc kanmei paap khang tei ai rui nang ta, nang kikta ta khatni nang tuang meicdaihmei nunc ta dandi tii puni the. Nang ni, Jerusalem khatni Judamei nunc ni ai rui kum puni twna sa bammei lat tei chulou makmei zaeng rui ai rui tiguang puni twna sa bammei kamut kamaimei kiu nangniw meic guayna ruc khou tiguang puni the.”

³²Hei tangv tei ai rui latrikzy baihmei akhat laa datna Baruk khou tiilou the, kumna ai rui samei kaguayna tei kamei rui hykeylou the. Reymei zy khou hyloumei kaguayna tei kamei rui mi khou tei hylou the kumna ai rui kakhou samei lat tei kamei rui hylou the.