Read Rongmei Naga JEREMIA 37 Bible Online

JEREMIA 37 - Rongmei Naga bible

JEREMIA 37

¹Babilonmei guangc Nebukadnezar rui Josia nac mpouh Zedekia ta Jehoiakim rui puanhmei Jehoiakin phaan Judamei guangc tiswlou the.

²Tiki Zedekia ni, katuang meicdaihmei nunc ni, meic guayna ni akhou tii guangmei RINGHPOUC lat tei piu mak ge.

³RINGHPOUC aniu Racguangc khou aniu zaat khang rui huayneylou khang akhou sa khang Guangh Zedekia rui Shelemia rui puanhmei Jehukal lev Maaseia rui puanhmei amuh Zephania ta akhou thouc guang the.

⁴Mi ganv khou tei ata kangkai khou bangclou mak he kumna ai meic pang khou nyngswna ruan bam di he.

⁵Babilonmei ricmei nunc rui Jerusalem ta dingbinna bam khwan e, tiki Izipmei ricmei nunc Izip ramvrei tat twan pat kan the twmei kaniw chu lana kaniw hanc kan the.

⁶Khoutei Zedekia khou sa o twna RINGHPOUC Isaraelmei Racguangc rui akhou kumna sa the,

⁷“Nang ta nkhavlou khang Izipmei ricmei nunc chaeng khou tat bam the, tiki kaniw kai hanc dat kan puni the.

⁸Khou kiu Babilonmei nunc guang datna mi kaidai ti hei adow puni, kumna mi kaidai ti hei laana mailou puni.

⁹Babilonmei nunc guang dat pw lak khe twna ningna nangniw rana nangniw ta guat bam la ri tho, kaniw guang dat puni the twna RINGHPOUC rui sa e.

¹⁰Nangniw rui Babilonmei ricmei guay ta swluai ngamna kabiumei nunc na ta kaniw tuang pheykai khou ganclou duc bam sini, mi nunc tei rui thau datna mi kaidai ta mai ntei mutsutlou puni de.”

¹¹Izipmei ricmei nunc guang tina Babilonmei ricmei nunc Jerusalem khou rui tat dat kan the.

¹²Kumna ai Jerusalem ganclouna Benjamin ramv thangc akai kaikhunc ramv khou rui atuang dam laa khang tat the.

¹³Tiki ai Benjamin Raengckat guang tangc pwkhou rigaanvmei nunc ta sinmeipu, Shelemia rui puanhmei, Hanania tou, kazanc Irija twna kawmeipu rui ata khaamna kumna thanv the, “Nang hei Babilonmei biak tat kan nimeipu di the.”

¹⁴“Kiuc hamh e! Ai paklou mak ge,” twna ai rui daw the. Alat tei Irija rui nkingloumei phaan ata nymna meicdaihmei daeng khou zay guang the.

¹⁵Kaniw ata lunghpuamc the kumna ata baina pei tuang hymeipu Jonathan kai khou bangclou o twna latdanv pat the. (Jonathan kai khou tei kangkai swlou bam khwan e.)

¹⁶Ata kandih bangc thangc khunhkai khou tingmik geicsihna bangclou bam khwan e.

¹⁷Katang thangc Guangh Zedekia rui ata guanghkai khou kaw guangna “RINGHPOUC rui lat saloumei tuang nai bu cho?” twna nkamhna thanv pw the. “Saloumei tuang nai e. Nang ta Babilonmei guangc baanc khou tipat puni the,” twna ai rui daw the.

¹⁸Khoutei ai rui kakhou kumna thanv e, “Ata kangkai khou lou bam khang ai rui nang ruc khou pw ni, nang tuang meicdaihmei nunc ruc khou pw ni, hamh e thei meic nunc ruc khou pw ni, tabui tuang nkhuai daic hakmei tuang nai thena cho?

¹⁹Babilonmei rui nang ta ni mi kandih ta ni adow ni tuang hamh e twna nang khou sa bammei muhzwng nunc tei thu tabui sw kan thena cho?

²⁰Guanghle, ai samei hei nkinglou o kumna taanclou na ro. Jonathan kai khou kangkai khou tei ata thouclou dat ri tho. Mi khou tei thouclou dat re thei ai mi khou tei theiclou puni the.”

²¹Kumna Zedekia rui ata guanghkai kaisangh khou bangclou khang latdanv pat the. Ai hei khou tei bam the, kumna mi tuang kaidai khou ntyan nai saanv ntyan kasiamhmei nunc khou rui akhang tingmik kathuic ntyan tii bam khwan e.