Read Rongmei Naga JEREMIA 38 Bible Online

JEREMIA 38 - Rongmei Naga bible

JEREMIA 38

¹Mattan nac mpouh Shephatia, Pashur nac mpouh Gedalia, Shelemia nac mpouh Jehukal khatni Malkia nac mpouh Pashur kaniw rui Jeremia rui meic guayna khou sa bammei ta chulou khwan e.

²RINGHPOUC rui kumna sa e, “Kaidai lungc khou bammei nunc thu suc-rih khou, nkow-ndaapcmei khou, khatni ravpyan khou theic puni the. Tiki kapaengc patna Babilonmei khou gutlou loumei ta tei thu swluai lak khe; kapanty na tei thu duak puni.”

³“Ai rui mi kaidai ti hei Babilonmei ricmei nunc baanc khou tiilou puni, kumna kaniw rui mi hei laa puni the,” twna RINGHPOUC rui sa e.

⁴Khoutei meicdaihmei nunc tei rui guangh khou guangna sa the, “Mipu ti hei swluai nina di the. Kamei rui hei kumhmei lat hei sana kaidai lungc khou bammei rihmei nunc lung titangkhyn the, mi hei kumna kamei rui mi kaidai khou bammei meic guayna ta tiping the. Kamei rui meic nunc ta nkhav khang swmei phaan; kaniw ta sw kasic khang sw bammei tuang di the.”

⁵Guangh Zedekia rui kaniw khou daw the, “Gay the, kata kiuc nangniw kahaw hawmei thak sw tho; ai khaam ngam mak khe.”

⁶Kumna kaniw rui ata nymna riang ntalouna guanghkai kaimav khou naimei Guangh Malkia tuang khunc nthukmei khou mpat keylou the. Mi khou tei dui maekna bih na khwan e, kumna ai bih khou mphumh key the.

⁷Khoutei Ethopiameipu kapumc siammei, guanghkai khou taanvtaanc bammeipu kazanc Ebedmelek twmeipu rui kaniw ata khunh nthukmei khou tei lou kan the twmei chu the. Mi ganv khou tei guangh tei Benjamin Raengckat khou latzan sw bam khwan e.

⁸Ebedmelek rui guangh daeng khou guangna sa the,

⁹“Guanghle, meic nunc hei rui sw bammei hei nkhuai the. Kaniw rui muhzwng Jeremia ta khunh nthukmei khou lou kan the, hei khou tei kamei ndaapcna theic puni the. Kalam thu mi kaidai khou hei taektw maek khe.”

¹⁰Khoutei guangh rui Ebedmelek ta meic gaanv thumh[2] ta nduanghna ata theih mak khou khunh nthukmei khou tei rui zay pat dat ro twna sa the.

¹¹Kumna Ebedmelek rui mi nunc ti tei nduanghna guanghkai tuang puat ryloumei bamv khou gut lana pheyraan asaekc laa lana hei tei riang khou rui akhou mpat key the.

¹²Riang tei rui ata sw tah mak khang pheyraan tei azakbangc khou lou tho twna kamei rui sa the. Hei tei ai kumna sw the,

¹³kumna kaniw rui ata khunh nthukmei khou tei rui zay patlou dat the. Mi tangv tei ata kaimav khou tei lou dat the.

¹⁴Kaganv akhat khou Guangh Zedekia rui ata kadaeng khou Ravkai tuang kathumhmei chaengmun khou tei kaw guangna sa the, “Ai rui nang khou lat akhat thanv puni, kalingmei tei akhou saloumei ta kahaw e.”

¹⁵Ai rui daw the, “Ai rui nchumhmei lat sa ti thei nang rui ata swluai puni, ai rui nang khou dinclou tini nang laalou ni tuang hamh e.”

¹⁶“Aniu khang panty tiiloumeipu, ringhmei Racguangc zanc khou rui syangdyng swmei tuang e, ai rui nang ta swluai ni tuang hamh e, nang ta swluai niina bammei nunc baanc khou tei ni tiilou ni tuang hamh e,” twna Guangh Zedekia rui akhou nkamhna latdyng swlou the.

¹⁷Ngamparymei RINGHPOUC Isaraelmei Racguangc rui sa e twna ai rui Zedekia khou sa the, “Nangniw rui Babilonmei guangc tuang meicdaihmei nunc khou tei gutlou e thei nangniw ringc puni, kumna mi kaidai hei ni mai ntei lak ge. Nang khatni nang kai kaikhuncmei ni duak puni.

¹⁸Tiki nangniw gutlou mak ge thei mi kaidai hei Babilonmei baanc khou tiilou puni, kaniw rui mi kaidai hei mailou puni the, kumna nangniw duak dat ngam pw lak khe.”

¹⁹Guangh tei rui daw the, “Babilonmei khou gutloumei namv thangc bammei aniu mei nunc ta tei ai ping e. Ata kaniw khou tipatlouna rairiu nuh e.”

²⁰Ai rui sa the, “Nang ta kaniw baanc khou tiilou ni tuang hamh e. RINGHPOUC lat tei piu khang ai huay e; kum e thei nang khang gay puni kumna nang panty tei duak puni.

²¹Nangniw gutlou mak ge thei pat pw nimei tei RINGHPOUC rui akhou ndawman khou lyanlou the.

²²Juda tuang guangckai khou ganclou duhmei ntumei nunc ta tei Babilon guangc tuang meicdaihmei nunc khou zay pat kanmei ta mi khou tei ai how the. ‘Guang tuang gay liangmei duangda nunc rui kata zay laanh the, kaniw rui kata sin bin the. ntaw thu kaphay tei bih khou mphumh key kan the, duangda nunc rui kata ganclou the,’ twna kaniw rui sana tat bammei hei nking o.”

²³Khoutei ai rui kumna sa dat re, “Nang now nang nac guay ta Babilon thangc zay tat puni, nang kahak ni duak lak ge. Babilonmei guangc rui nang ta kangmei swna zay tat puni, kumna mi kaidai hei mai rui ntei mutsutlou puni.”

²⁴Zedekia rui daw the, “Aney kumna pary rahmei hei meic gaanv khat na ta sini tithay riu, kum e thei nang panty kabiu lak ge.

²⁵Ai nang lev pary rac e twmei meicdaihmei nunc tei rui chu e thei, kaniw guangna tabui pary rac cho twmei thanv puni. Nang rui aney rahmei lam guay tei raclou e thei nang ta swluai lak ge twna latdyng sw puni.

²⁶Kangkai khou tei theiclou khang nang ta thouclou dat ri tho twna akhou guang sa lana de twna sa tio.”

²⁷Khoutei meicdaihmei nunc tei akhou guangna thanv changh the, kumna guangh rui kumna sa tio twmei kahak tei ai rui kaniw khou sa the. Kaniw ramh akhat na sini sw ngam kan mak khe, kalam thu aney pary rac kanmei tei meic gaanv khat na sini chu kan mak ge.

²⁸Kumna Jerusalem ta rih nym mak saanv ata guanghkai kaimav khou bangclou bam khwan e.