Read Rongmei Naga JEREMIA 39 Bible Online

JEREMIA 39 - Rongmei Naga bible

JEREMIA 39

¹Zedekia rui Judamei guangc swmei chakiumei kwm ruhmei bw khou Babilonmei guangc Nebukadnezar rui katuang ricmei kapwm ta nduangh guangna Jerusalem ta adow the.

²Zedekia rui guangh swmei 11mei kwm padeihmei bw tuang zaeng chakiumei nungc kaidai raengc tei sw ra gut the.

³(Jerusalem tei gut laa pwkhou, Babilonmei guangc tuang meicdaihmei nunc, Nergal Sarezer, Samgar Nebo, Sarsekim, khatni baihmei Nergal Sarezer hei nunc hei kazauhna nchungmei raengckat khou guang bam the.)

⁴Pat bammei tei guangh Zedekia khatni katuang meicdaihmei guay rui how pwkhou, zingbangc kaidai khou tei rui pakduak khang karamc the. Kaniw guangh pikwan chaeng tei patna, raengh kanei alamvloumei bamv khou naimei chaengmun khou tei rui pat lana Jordan Nzaengc biak thangc pak duak pat the.

⁵Tiki Babilonmei ricmei nunc rui kaniw ta nthauna Jeriko daeng khou naimei nzaengc khou Zedekia ta nym the. Kaniw rui kata Hamat ramv khou Ribla kaidai khou Guangh Nebukadnezar daeng khou nduangh guang the, kumna hei khou tei Nebukadnezar rui karuc khou theih khang latzan sw the.

⁶Ribla khou kamei rui Zedekia nac mpouh nunc ta kapu hu khou dowluai the, kumna kamei rui Juda tuang meicdaihmei nunc ta ni swluai the.

⁷Mi tangv tei kamei rui Zedekia mik lat ganc the. Kumna Babilon thangc zay tat khang kangriang ntalou the.

⁸Kumc bam khou tei guanghkai khatni meic nunc kai guay tei mailou the khatni Jerusalem tuang raengc sw pangv key the.

⁹Rihpy Nebuzaradan rui mi kaidai khou bam duhmei nunc khatni kakhou gutloumei nunc ta tei kangmei swna Babilon thangc zay tat the.

¹⁰Kamei rui lungcsi lungcroucmei, ramhkhat na sini maekmei nunc ta na Juda kandih khou ganclou duc the, kaniw khang tei drakhalau khatni laupuk tiilou the.

¹¹“Jeremia ta zaucchuylou tio twna guangh Nebukadnezar rui rihpy Nebuzaradan khou latdanv pat the.

¹²Jeremia ta nduangh tho kata sw kasic riu, kamei kahaw hawmei swlou tio.”

¹³Kumna Nebuzaradan rui katuang meicdaic liangmei Nebushazban khatni Nergal Sarezer khatni baihmei Babilonmei meicdaihmei guay lev twna

¹⁴ata guanghkai kaimav khou rui nduangh pat the, kumna kaniw rui ata Ahikam rui puanhmei, Shaphan tou Gedalia khou nsinlouna ata gayna kai nduangh tangclou tio twna kadylou the. Heikumna ai hei khou tei meic pang khou tei bam the.

¹⁵Ai guanghkai raeng lungc khou kang bam bammei douc RINGHPOUC, Isaraelmei Racguangc rui kumna sa the,

¹⁶“Ai rui sa kanmei kumcna ai rui mi kaidai ruc khou hei kamut kamaimei tiguang puni the, lungcgay chingkhiuhmei tiguang dat ni tuang hamh the. Mi guay tei guang tanghmei ta nang how puni the. Mi hei RINGHPOUC rui sa tuang e twna Ethopiamei Ebedmelek khou tat na salou o.

¹⁷Tiki RINGHPOUC ai rui nang ta gaeklou puni kumna nang ping bammei nunc baanc khou tei nang ta tipatlou ni tuang hamh e.

¹⁸Ai rui nang ta gaeklou puni, kumna nang ta swluai lak ge. Nang panty amaan lak ge, kalam thu nang akhou lwm the. RINGHPOUC ai rui sa the.”