Read Rongmei Naga JEREMIA 4 Bible Online

JEREMIA 4 - Rongmei Naga bible

JEREMIA 4

¹RINGHPOUC rui sa e, “Isaraelmei nuncle, nangniw ngalanc guang dat nii e thei, akhou ngalanc guang dat ro. Ai rui karaengmei ravmaengc nunc tei nangniw ganc patna akhou lwmnuhmei swna bam e thei,

²nangniw azanc khou syangdyng sw biu e. Kum pwkhou kiu zaatc guayna rui kaniw ta suaihiamlou khang akhou ney puni, kumna kaniw ata thuanc puni.”

³RINGHPOUC rui Juda khatni Jerusalemmei nunc khou sa e, “Suaklou makmei laupuk guay tei suak tho; sauh ding khou kathw nroulou ri tho.

⁴Nang Poubauhmei RINGHPOUC ai lev twna swloumei latdyng tei swbak riu, kumna Juda khatni Jerusalemmei nuncle, nangniw akhou gutlou o. Kum mak ge thei, nangniw rui taanc kanmei simei taanv guay zaeng khou tei rui alungpuam hei mai kumcna chuangc puni the. Hei tei swmit dat nimei meic nai pw lak khe.”

⁵Mi kandic kapwm khou hei bianggun amuan liklou tho! Kakhwan ranvna kara nthanna amuan o! Judamei khatni Jerusalemmei nunc ta raengh raengloumei kaidai guay nzwanna pak khang katiu tho.

⁶Zaion chaeng souclou tio! Duak khang pak la tho! Nyan bam lari tho! Swkamut kamaimei RINGHPOUC rui tiguang puni the, dihpy biak thangc rui swkamut katupc tuaymei tiguang puni the.

⁷Kamangliangpui kabamv khou rui tat pat kumcna, zaatc nunc ta swkamut kamailou nimeipu pat pw the, Juda ta swkamut kamailou khang kamei guang pw the Juda tuang kaidai guay tei swkatuptuayna ganclou puni the, hei guay khou tei meic lungc dat lak khe.

⁸Kumhpui zaeng rui zaengsiphey piuna huayna kap tho, RINGHPOUC tuang meicpingmei lungpuamdai Juda ruc khou keylouna bam the.

⁹RINGHPOUC rui sa e, “Mi nungc kiu thu guangh nunc ni, meicdaihmei nunc ni kaniw bau nai dat pw lak khe; amuh nunc ni swangmav nai dat lak khe, muhzwng nunc ni hahlahla puni the.”

¹⁰Khoutei ai rui kumna sa the, “He Kauh Liangmei RINGHPOUC, nang rui Jerusalemmei ta guat kasic sihna guatlou the! Khoutei nchu-nzaenghna lungc puni twna nang rui salou ki aniw guanglingc khou baengsaeng nai bam the.”

¹¹Ramvkaengvdic ravbamv chyngbut khou rui mpwan mai Jerusalem biak thangc aliu guang the twna Jerusalemmei nunc khou sa pw nimei ganv guang the. Hei tei napgung hunc ganhmei aliu rih ri namei mpwan tei hamh the.

¹²RINGHPOUC tuang latdanv khou rui guangmei pwan tei mi khang tei suangc tanc puni the! RINGHPOUC kamei kahak rui kamei nunc ruc khou kalatzan kauc pat kanmei tuang the.

¹³Zauc lo, zauczihmei tei muangh kumc guang pw the. Katuang takuanh gari guay tei pwansa kumc the, kaniw tuang takuanh nunc tei mouckauh suangc katumc e. Meicpingmei tuang di the! Aniu kamut kamai puni the!

¹⁴Jerusalemmeile, nangniw ringc nuh khang nangniw lung khou simei tei khiu ganc tho. Paapc tuang lungning hei asaanh tingsaengcna kakhanh bam ni hena cho?

¹⁵Dan kaidai khou rui khatni Ephraim tuang chyngramv khou rui guangmei chamvphunghmei nunc rui simei chamv phungc guang the.

¹⁶Duhmei kandic thangc rui zauczihmei nunc guang the twna zaatc nunc khou khatni Jerusalemmei khou salou khang kaniw guang the. Mi zauczihmei nunc rui Juda tuang kaidai guay ruc khou kauc puni the.

¹⁷Meic nunc rui lau gaekmei kumcna kaniw rui Jerusalem ta ding nkuay puni the, kalam thu Jerusalemmei nunc rui RINGHPOUC ta liam the. RINGHPOUC rui mi hei sa the.

¹⁸Judale, nangniw rui lungc bammei kheiliak rui khatni nangniw tuang taanv rui mi guay hei nangniw ruc khou nangniw rana tiguangloumei tuang the. Mi ryanramei guay hei nangniw paap rui tipatmei tuang the; hei tei rui nangniw lungthw gut biwmei tuang the.

¹⁹Suhmei hei! Ai akhaengv ngam mak khe! Alung hei! Alung hei nthaekc key thuy mak khe! Ai reih reina bam ngam mak khe; bianggun khwan chu the, rih khwan chu the.

²⁰Swkamut kamaimei guang pw hay hay the; mi kandic kapwm hei swkatupctuay tuaina ganclou the. thay mak daek khou aniu tuang pheykai guay swkatupctuay tuailou the; kaphey guay siat puat paruat ruatlou the.

²¹Rih adowmei lwn hei asaanh kumna how bam nina cho, bianggun khwan hei asaanh chu bam nina cho?

²²RINGHPOUC rui sa e, “Amei nunc hei mpang the; kaniw ata thay mak khe. Kaniw hei mpangmei alauc nunc kumc the; kaniw hei kabah thay mak khe. Simei taanv mu kaniw taanc thay the; gaymei taanv thu taanc thay mak khe.”

²³Ai kandih ta zauc pwkhou mi hei ramh maekmei karaeng di the; tingpuk ta zauc pwkhou mi khou tei gaanhmei maek khe.

²⁴Ai chyngbut guay ta zauc pwkhou mi guay tei kanukc bam the chyngbut guay tei kanukc pat pat gut gut bam the.

²⁵Hei khou tei ai maansei ta how mak khe; nruayna nunc nganvna samc tat kan the.

²⁶Kandih gaymei ramv guay tei Ramkaengvdic mbaih the; mi tuang kaidai guayna swkamut kamaina ganclou the, RINGHPOUC tuang lungpuamdai zaeng rui.

²⁷(Kandih kapwm hei nsa karaeng mbaih puni the, mi hei swmaan mutsut thu lak ge, twna RINGHPOUC rui sa kan the.)

²⁸Mi mbaanv kandic hei zaengsina kap puni the; tingpuk ni zingc puni the. RINGHPOUC rui mi hei sa pat kan the, kumna kalung kalaic dat lak khe. Kamei rui kalung dinglou tang khe. Kumna kamei hanc dat lak khe.

²⁹Takuanh ricmei nunc khatni sauhpai sinmei nunc rui kachin-karo bammei khwan chuna meic kathuicna pak puni the. Gaanvsaekc rui nwmbangc thangc pak tat puni the, gaanvsaekc rui khow tauh thangc pak ku puni the. Kaidai kathuicna karaeng ganclou puni the, hei khou tei meic lungc dat lak khe.

³⁰Jerusalemle, nang hei mut puni the! Tabui sw khang kunghmei haengcnrymmei phey rui karuh bam tu cho? Tabui khang ntuh-ntah piuna mikhyam teyna bam tu cho? Nsa khang nang lwn kasiamh bam e! Nang nzianmeipu nunc rui nang ta ganc pat the, kumna kaniw rui nang ta swluai khang sw bam the.

³¹Meicpui nah bam niina kap bammei khwan kumhmei ai chu e, tunac napuan puancna kauc rah-ndy bammei khwan chu e. Hei tei Jerusalem rui kathiu laa pat lakna kauc bammei khwan e, kabaanc laamv ntyng pat lana “Ai hei luai the! Kaniw ata swluai khang guang pw the!” twna kauc bammei khwan e.