Read Rongmei Naga JEREMIA 40 Bible Online

JEREMIA 40 - Rongmei Naga bible

JEREMIA 40

¹Rihpy Nebuzaradan rui ata Rama khou mpatloumei tangv RINGHPOUC rui akhou kachuclou the. Ata kangriang ntalouna Juda khatni Jerusalem khou rui Babilon thangc bangh zay tatmei nunc lev twna mi thangc tei zay tat the.

²Rihpypu tei rui ata zaylangc patna sa e, “RINGHPOUC nangniw Racguangc rui mi kandic khou hei kamut kamaimei tiguang puni twna sa guang kan the,

³ntaw thu kamei rui sa bammei tei taanclou the. Nangniw rui RINGHPOUC ruc khou paap taanc timei zaeng rui khatni kalat liam timei zaeng rui mi guay hei nangniw ruc khou tiguang bammei tuang the.

⁴Ntaw thu ai nang baanctyang khou rui mi kangriang hei ric patlouna nang ta mpatlou the. Nang athei Babilon thangc tat nii e thei tat nuh e, ai rui nang ta kakalou puni. Tiki nang tat nii mak ge thei ni tat nina e twna sa mak ge. Nang rui kadah khang kandih kapwm hei nai the; Nang rui kahawmei khou tat ro.”

⁵Ai rui daw timakna Nebuzaradan rui sa the, “Babilonmei guangc rui Juda kandic sinmeipu tiswloumei Ahikam rui puanhmei, Shaphan tou Gedalia daeng thangc tat dat tho. Nang kadaeng khou tei bamna meic pang khou bam tho, hamh e thei nang tat niimei bamv akhat thangc tat tho.” Khoutei kamei rui akhang kaipat akhat khatni phungc tat khang taektw asaekc tiilouna, ai tat nimei chaeng tei thouclou the.

⁶Ai Mizpa khou Gedalia lev bamna mi kandic khou ganclou duhmei pang khou lungc bam khang tat the.

⁷Mi kandic khou bammei rihpy nunc khatni kaniw meic nunc rui Babilonmei guangc rui Ahikam nac mpouh Gedalia ta dihsinpouc khang kapahlou the twmei chu pwkhou Babilon thangc tat makmei nunc ntumei nunc, kaniw nac nunc lungcsi lungcrouc liangmei nunc,

⁸kumlana Nathania rui puanhmei Ismael, Karea nac mpouh Johanan, Tanhumet nac mpouh Seraia, Netopha khou rui Ephai nac mpouh nunc, khatni Maaka khou rui Jezania kaniw hei Mizpa khou Gedalia daeng khou guang the.

⁹Gedalia rui kaniw khou sa the, “Ai rui alat swna samei tuang the, Babilonmei nunc khou gutlou khang nangniw ping bam khang mak ge. Mi kandic khou hei lungc bam o, Babilonmei guangc khou gutlou tho, kum e thei ramh guayna gayna bam dat puni the.

¹⁰Ai thu Mizpa khou bam puni kumna Babilonmei nunc khou hei guang pwkhou nangniw phaan ai ding puni the, tiki nangniw thu drakhadui, tingthai khatni Olive thauc khuan kaduaina lou tho, kumna nangniw rui laaloumei namv guay khou tei lungc bam tho.”

¹¹Babilonmei guangc rui Isaraelmei gaanvsaekc ta Juda khou lungc bam khang nuhlou the khatni Gedalia ta kaniw kandic kaipouc tiswlou the twmei Moab, Ammon, Edom, khatni baihmei kandic guay khou bammei Isaraelmei nunc rui chu the.

¹²Kumna kaniw tei kaniw pak phakloumei bamv bamv khou tei rui Juda khou guang dat the. Kaniw Mizpa khou Gedalia daeng khou guang the, kumna khou tei kaniw drakhadui khatni tingthai mpeyna phungc guang kaduailou the.

¹³Mi tangv tei Johanan khatni gutlou makmei rihmei nunc tuang rihpy nunc Mizpa khou Gedalia daeng khou guangna,

¹⁴“Ammonmei guangc Baalis rui Ismael ta nang ta swluai khang thouclou kan the twmei nang thay mak hena cho?” twna sa the. Tiki Gedalia rui hei tei lwm mak khe.

¹⁵Khoutei Johanan rui kakhou nkamhna kumna sa the, “Ismael ta swluai khang ai tat ni the, thow rui swluai cho twmei meic gaanv khat na sini thay ni tuang hamh e. Tabui swna kamei rui nang ta swluai khang mpatlou bam nina cho? Nang ta swluai kan ti thei nang daeng khou guang kaduai bammei Judamei guay hei pak phak ngam puni the, kumna Juda khou ganclou duhmei guay ruc khou ryanramei guang puni the.”

¹⁶“Kumna sw riu! Ismael lam khou nang sa bammei hei saraamhmei lat de!” twna Gedalia rui daw the.