Read Rongmei Naga JEREMIA 41 Bible Online

JEREMIA 41 - Rongmei Naga bible

JEREMIA 41

¹Mi kwm tuang chaneimei bw khou, Nethania nac mpouh khatni Elishama tou, guanghkai zaatmei, guangh tuang meicdaihmei gaanv khat kazanc Ismael twmeipu rui meic gaanv ruh nduanghna Gedalia ta ariw khang Mizpa khou guang the. Kaniw meic guayna nap tu kariu bam khou,

²Ismael khatni meic gaanv ruh tei rui kaniw tuang baengsaeng sat patna Gedalia ta swluai the.

³Ismael rui Gedalia daeng khou bammei Isaraelmei guay khatni Babilonmei ricmei mi khou tei bam nanghmei guay ta swluai the.

⁴Nthuanh thauna, Gedalia ta swluaimei lam tei meic gaanv khat na sini thay mak khou,

⁵Sekem, Shilo, khatni Samaria khou rui meic gaanv 80 guang the. Kaniw biangc hiw guatna, kaniw pheybaan siatkaek ngamna khatni kaniw rana kaniw pumc tei swzamh lana Ravkai khou tat khang nap khatni agaw phungcna guang the.

⁶Kumna kaniw ta ariw khang Ismael kapna Mizpa khou rui pat the. Kamei rui kaniw daeng khou guangna “Gedalia ta zauh khang guang tho,” twna kamei rui sa the.

⁷Kaniw tei kaidai lungc khou tei gut tangc rappui lev, Ismael khatni kamei nunc tei rui kaniw ta tei swluaina khunh nthukmei khou phaiclou the.

⁸Tiki kaniw pang khou gaanv ruh rui “Aniw ta swluailou ri tho! Aniw rui Gehu, sipian, Olive thauc, khatni nkhuaihdui ramvpuk khou rylou kan the,” twna sa ti khou rui kamei rui kaniw ta tei swluai mak khe.

⁹Ismael rui kamei rui swluaimei pumc nunc tei phaicloumei khunh nthukmei tei Guangh Asa rui kata Isaraelmei guangc Baasha rui adow bammei douc chauloumei daihmei duikhunc e. Ismael rui kaniw pumc tei mi khunc nthukmei tei phaiclou padik the.

¹⁰Mi tangv tei kamei rui guangh nac nunc ta khatni rihpy Nebuzaradan rui Gedalia baanc khou nsinlou duhmei Mizpa khou bammei guay ta tei kang bangclou the. Ismael rui kaniw ta bangh zayna Ammon biak thangc zay tat the.

¹¹Ismael rui taanc kanmei meicdowmei chamv tei Johanan khatni kamei lev bammei rihpy nunc tei rui chu the.

¹²Kamei rui kamei nunc ta nduanghna Ismael ta nthau the, kumna Gibeon daeng khou naimei zeih daihmei daeng khou laytangh the.

¹³Kangmei swna zay tat bammei Ismaelmei nunc tei Johanan khatni kathei laymei rihpy nunc ta tei how pwkhou neihla the.

¹⁴Kumna kaniw karih patna kadaeng khou pak guang the.

¹⁵Ismael khatni kamei gaanv tachat tei Johanan khou rui pak duakna Ammon kandic thangc pak tat kan the.

¹⁶Ismael rui Gedalia ta swluaina Mizpa khou rui rihmei nunc, ntumei nunc, alauc nunc, khatni kapumc siammei nunc ta tei Johanan khatni katuang ricpy nunc rui laa dat the.

¹⁷Babilonmei nunc zaeng rui kaniw tei Izip thangc tat nii lana kaniw rui Bethlehem daeng khou naimei Gerut Kimham khou bangvlou khwan e.

¹⁸Kaniw tei Babilonmei ta ping the kalam thu Babilonmei guangc rui mi kandic sin khang suamcloumeipu Ahikam nac mpouh Gedalia ta Nethania nac mpouh Ismael rui swluailou khwan e.