Read Rongmei Naga JEREMIA 42 Bible Online

JEREMIA 42 - Rongmei Naga bible

JEREMIA 42

¹Hei tangv tei Rihmei nunc tuang kapy nunc, Karea rui puanhmei Johanan lev Hoshaia rui puanhmei Azaria kazauhna, meic kaguayna akhou guangna

²sa the, “Aniw rui samei hei taanclou o! Aniw khang RINGHPOUC aniu Racguangc khou huayneylou o. Ringcbam duhmei aniu meic guayna khang hei huayneylou o. Kaganv akhat khou aniu meic mpeyna bam khwan e; tiki ntaw thu aniu meic katit na di the twmei nang thay the.

³Aniu rui tat nimei chaeng khatni taanc nimei taanv kamei rui dinclou diu khang RINGHPOUC aniu Racguangc rui aniu khou lyanlou khang huayneylou o.”

⁴Ai rui daw the, “Kum e thei gay the. Nangniw rui samei kumcna RINGHPOUC aniu Racguangc khou ai huayney puni the, kamei rui sa samei tei ai nangniw khou salou puni the. Ai ramhkhat na sini nangniw khou nkamh lak khe.”

⁵Khoutei kaniw rui akhou kumna sa the, “RINGHPOUC aniw Racguangc rui aniw khang tiimei latdanv guay piu mak ge thei RINGHPOUC rui aniw ruc khou nchumhmei khatni suai makmei sakhi sw di tho.

⁶Aniu kahaw ni kahaw mak ni RINGHPOUC aniu Racguangc lat aniu piu rap puni de. Aniu rui kalat piu ti thei ramh kaguayna gay puni.”

⁷Zaeng ruh tangv RINGHPOUC rui akhou kachuclou the;

⁸kumna ai rui Johanan, kadaeng khou bammei rihpy guay, khatni baihmei guay ta kaw kaduaina,

⁹kaniw khou sa the, “RINGHPOUC Isaraelmei Racguangc, kakhou nangniw rui ata nangniw khang huayneylou khang thoucloumeipu tei rui sa e,

¹⁰‘nangniw mi kandic khou hei lungc bam nii e thei ai rui nangniw ta kasiamh thaulou puni the, swra key lak khe; ai rui nangniw ta lingclou puni the, phuai pat lak khe. Ai rui nangniw ruc khou swkamut kamaimei tiguang kanmei tei rui mpeyna azaeng tisilou the.

¹¹Babilonmei guangc ta ping taan tho. Ai rui nangniw ta nkhavlou puni, kumna ai rui nangniw ta kabaanc khou rui kanlou puni.

¹²Ai hei zauzian thaypui zaeng rui, nangniw ta zauc nzianlou khang ai rui kata swlou puni kumna nangniw ta kai titatlou dat puni. RINGHPOUC ai rui sa the.’

¹³“Tiki Juda khou ganclou duhmei nangniw RINGHPOUC nangniw Racguangc lat liamna mi kandic khou hei lungc zih bam e thei

¹⁴‘Suc-rih maekmei, nkow-ndaapc makmei Izip kandic thangc tei bam kan ni de,’ twna nangniw sa nuh mak ge. Nangniw rui heikumna sa ti thei

¹⁵Ngamparymei RINGHPOUC Isaraelmei Racguangc rui kumna sa puni, ‘nangniw Izip kandic thangc lungh khang ding bam e thei,

¹⁶nangniw pingna bammei rih rui nangniw ta lay tangh puni, khatni nangniw ping bammei nkow-ndaapcmei hei nangniw thei lay guang puni, kumna nangniw mi Izip kandic khou tei theiclou puni.

¹⁷Izip kandic thangc lungh khang ningna bammei guay tei suc-rih khou hamh e thei nkow-ndaapcmei khou hamh e thei ravpyan khou theic puni. Kaniw meic gaanv khat na sini ringc pat ni tuang hamh e, ai rui kaniw khou tiguang nimei kamut kamaimei khou tei rui duak ngam ni tuang hamh e.’

¹⁸“RINGHPOUC, Isaraelmei Racguangc rui sa e, ‘Ai rui Jerusalemmei nunc ruc khou alungpuam bun keymei kumcna, nangniw Izip thangc tat re thei nangniw ruc khou alungpuam bun key puni. Hei tei meicpingmei lwn puni the; meic nunc rui nangniw ta karaeng puni the kumna nangniw zanc sindaancna siang puni the. Nangniw mi bamv hei how dat ni tuang hamh the.’ ”

¹⁹“Juda khou bammei nangniw Izip thangc tat mak khang RINGHPOUC rui sa e. Kumhpui zaeng rui nangniw ramhthay khang samei tuang e,

²⁰kumna tat re thei nangniw theic puni the. RINGHPOUC aniu Racguangc khou huayneylou o kumna kamei rui samei guay aniw piu ni de twna latryan sw the twna nangniw akhou sa the.

²¹Ntaw ai rui sa tiki RINGHPOUC aniu Racguangc lat guay tei nangniw piu mak ge.

²²Kumhpui zaeng rui mi hei ningtow tho: nangniw rui lungc tat nimei kandic thangc tei nangniw suc-rih khou hamh e thei nkow-ndaapcmei khou hamh e thei ravpyan khou theic puni the.”