Read Rongmei Naga JEREMIA 43 Bible Online

JEREMIA 43 - Rongmei Naga bible

JEREMIA 43

¹RINGHPOUC kaniw Racguangc rui kaniw khou sa o twna thoucloumei lat guay tei kaniw khou sa tangv pwkhou

²Hoshaia rui puanhmei Azaria khatni Karea rui puanhmei Johanan khatni baihmei ramhkhe swmei nunc tei rui akhou sa the, “Nang baley thay e. Izip kandic thangc lungc tat riu twna sa o twna RINGHPOUC aniu Racguangc rui nang khou sa mak ge.

³Babilonmei rui aniu ta sintuna aniu ta swluai khang hamh e thei Babilon thangc zay tat kan khang Neria rui puanhmei Baruk rui nang khou katiulou tina sa bammei tuang de.”

⁴Kumna Johanan ni, rihpy nunc ni, meic nunc ni gaanv khat na sini RINGHPOUC lat piuna Juda kandic khou bam ni twna ning mak khe.

⁵Khoutei Johanan lev rihmei kapy nunc tei rui Juda khou ganclou duhmei meic kaguayna khatni pak phak tatmei kandic guay khou rui hanc guang datmei guay

⁶nggaanvmei ni, ntumei ni, alauc ni, guangh nac aluh nunc ni meic guayna ta Izip kandic thangc nduangh tat the. Rihpy Nebuzaradan rui Gedalia baanc khou louduhmei meic guayna, Baruk lev ata kazauhna kaniw rui Izip thangc nduangh key the.

⁷Kaniw RINGHPOUC lat liamna Izip kandic thangc Tahpanhes kaidai nganv key tangh the.

⁸Hei khou tei RINGHPOUC rui akhou sa the,

⁹“Judamei mikphaengv khou Ntauh daihmei asaekc laana guanghkai gut nimei Pharao chaengmun chaeng khou bamcloumei ntauh ding khou mphumhlou o.

¹⁰Kumna Ngamparymei RINGHPOUC, Isaraelmei Racguangc rui kabangc Babilonmei guangc Nebukadnezar ta mi bamv khou hei thouc guangna nang rui ntauh phuploumei ruc khou tei kaguangc bamvpaeng duanclou puni kumna mi ruc khou tei guangh tuang pheykai katinghlou puni twna ai rui sa e twna kaniw khou sa tio.

¹¹Nebukadnezar guangna Izip ta laa puni. Ravpyan khou theic nimei guay ravpyan khou theic puni, kangmei swna zay tat nimei guay kangmei swna zay tat puni, suc-rih khou theic nimei guay suc-rih khou theic puni.

¹²Izipmei tuang rav nunc tuang ravkai guay tei mai ntei puni kumna kaniw tuang rav nunc tei mai raw puni. Lauziu gaenghmei nunc rui kaniw phey rik manc nthan kumc Babilonmei guangc rui Izip kandic ta manc nthan thiakhlou puni kumna rih ngamna ganclou duc puni.

¹³Izip khou Heliopolis khou naimei swangtauc tei kamei rui swkamut kamailou puni kumna Izipmei tuang ravkai khou naimei rav nunc tei mai ntei puni.”