Read Rongmei Naga JEREMIA 44 Bible Online

JEREMIA 44 - Rongmei Naga bible

JEREMIA 44

¹Izip kandic khou Migdol, Tahpanhes, Memphis kaidai guay khatni mi kandic tuang dihba ramv thangc bammei Isaraelmei nunc lam khou RINGHPOUC rui akhou sa e.

²Ngamparymei RINGHPOUC, Isaraelmei Racguangc rui sa e, “Jerusalem khatni Juda tuang kaidai guay ruc khou swkamut kamaimei ai rui tiguang kanmei tei nangniw how the. Zauclo! Ntaw nganvna mi guay tei swkasic-karoucna meic lungctaekna ganclou bam e.

³Kalam thu meic nunc tei rui simei taanv taancna alung tipuamc the. Kaniw rui rav baihmei nunc khou khaeng the kumna kaniw khatni kaniw pupouc nunc kalum makmei rav ta kalum the.

⁴Ai rui karaengmei mi sikanmei taanv hei taanh mak khang ai rui abangc muhzwng nunc thouc guangna sa kan the.

⁵Tiki nangniw chulou mak khe khatni laalou mak khe. Nangniw simei taanv taanc nthaekc mak ge, khatni rav baihmei khang khaengmei taanv tei taanc nthaekc mak ge.

⁶Kumna ai rui alungpuam Juda tuang kaidai guay khou khatni Jerusalem tuang chaengluang guay khou bunkey kan the, kumna mai nteilou kan the. Mi guay tei sw kasic karoucna ganclou the kumna aseic how bammei kumcna meicpingmei lwn mbaih the.

⁷“Tabui swna nangniw rana nangniw ruc khou hei kumhmei simei taanv hei taanclou bam tu cho twna Ngamparymei RINGHPOUC, Isaraelmei Racguangc ai rui ntaw nangniw khou thanv e. Nangniw ntu nggaanv, alauc, ngasatna nunc ruc khou nganvna kamut kamaimei tiguang bam sini nangniw lung adih tanc bam ni hena cho?

⁸Nangniw lungh khang key bammei Izip kandic khou hei ravmaengc kalumna khatni rav baih baihmei khang khaengna tabui swna nangniw alung tipuamclou bam tu cho? Nangniw rana nangniw ta swkamut kamaina kandih khou zaatc guayna rui nangniw ta karaengna siangdu siangdanmei khou nangniw zanc saancna siang bam khang nangniw sw bam tu cho?

⁹Nangniw pupouc nunc rui, Judamei guangc nunc khatni kaniw now nunc rui, nangniw khatni nangniw now nunc rui Juda tuang kaidai guay khou khatni Jerusalem chaengluang chaengluang khou simei taanv taanc kanmei guay tei nangniw amuc thena cho?

¹⁰Tiki aseic nganvna nangniw niamh key mak ge. Nangniw ata chakhwang sw mak ge khatni ai rui nangniw pupouc nunc khou khatni nangniw khou tiilou kanmei latdyn guay tei piu mak ge.

¹¹“Kumhpui zaeng rui, Ngamparymei RINGHPOUC, Isaraelmei Racguangc ai rui Juda kapwm ta swkamut kamailou puni the.

¹²Izip thangc tat kanmei nunc khatni lungc tat niina ning bammei nunc ta tei kaniw meic guayna ta ai rui swmaan mutsutlou puni. Kaniw meic guayna, daihmei ni nthyammei ni, suc-rih rui hamh e thei nkow-ndaapcmei rui Izip kandic khou theic puni hei tei meicpingmei lwn puni the; kaniw ta meic nunc rui karaeng puni the khatni siangdu siangdanmei khou kaniw zanc saanc puni the.

¹³Ai rui Jerusalem ta dandi tiimei kumcna Izip khou bammei nunc ta suc-rih rui, nkow-ndaapcmei rui khatni ravpyan rui dandi tii puni the.

¹⁴Judamei Izip khou keyna lungc bammei gaanv khat na sini duak ngam pw lak khe khatni ringc pat pw lak khe. Kaniw guang lungc dat niina agwn bammei Juda kandic khou kaniw gaanv khat na sini guang dat ni tuang hamh the, kakai kalau maekmei meic gaanvsaekc na hamhna gaanv khat na sini guang dat pw lak khe.”

¹⁵Kaniw now nunc rav baih baihmei khou khaengmei ta thaymei nunc, khatni hei daeng khou tei ding bammei ntumei guay, Izip dihba ramv khou lungc bammei Isaraelmei guay meic kangdai rui akhou sa the,

¹⁶“Nang rui RINGHPOUC zanc khou rui aniw khou samei tei aniw chu nii mak ge.

¹⁷Aniw taanc ni the twna salou kanmei guay tei aniw taanc puni. Aniw rui khatni aniw pupouc nunc rui, aniw tuang guangc nunc khatni kapy nunc rui Juda tuang kaidai guay khou khatni Jerusalem tuang chaengdai guay khou aniw tuang Tingkauh Liammavpui khang khaengna kakhou zouhpaanv keyna kalum bammei tei aniw taanc puni de. Heikumna khaeng bammei ganv khou nap-bi geic khwan e, lungcgay chingkhiuh khwan e kumna katuakc katitmei maek khwan e.

¹⁸Tiki aniw Tingkauh Liammavpui khang tei khaeng taan pwkhou khatni zouhpaanv keyna kalum taan pwkhou, aniw khang ramhkhat na sini maek khe, kumna aniw mei nunc hei khatni nkow-ndaapcmei khatni suc-rih mun khou theic thau the.”

¹⁹Ntumei nunc tei rui kumna sa haaplou the, “Aniw rui Tingkauh Liammavpui lwn khou ntyan kasiamhna, kakhang khaengna, zouhpaanv keyna kalum bammei douc tei aniw rui taanc bammei tei aniw gaanv nunc rui nuhlou e.”

²⁰Heikumna akhou sadawmei ntumei khatni nggaanvmei nunc khou tei ai rui kumna daw the,

²¹“Nangniw khatni nangniw pupouc nunc, nangniw tuang guangh nunc khatni kapy nunc, khatni mi kandicmei guay rui Juda tuang kaidai guay khou khatni Jerusalem tuang chaengdai guay khou khaeng bammei guay tei RINGHPOUC rui thay mak ge hamh e thei hei tei amuc, the twna nangniw ningna cho?

²²Aseic tingmik kahak hei nangniw kandic hei swkasic-karoucna meic lungh makna ganclou bam e. Mi hei meicpingmei lwn di the, meic nunc rui kazanc ta siangdu siangdanmei khou sindaancna siang the, kalam thu nangniw tuang simei khatni chanymei taanv guay tei RINGHPOUC rui akhaengv ngam mak ge.

²³Nangniw rui RINGHPOUC lat liamna karuc khou paapc taancna rav baihmei nunc khang nangniw rui khaengna bammei zaeng rui mi kamut kamaimei hei tiguangmei tuang e.”

²⁴Ngamparymei RINGHPOUC, Isaraelmei Racguangc rui Izip kandic khou lungc bammei Isaraelmei nunc khou samei lat tei ai rui meic guayna khou, nkunna meicpui nunc khou tei sa the:

²⁵“Nangniw khatni nangniw now nunc lev twna Tingkauh Liammavpui khou nthukmei latryan swlou the. Nangniw rui kakhang khaeng sini khatni kakhang zouhpaanv keyna kalum ni twna latryan sw the, kumna nangniw mi latryan tei ngaek the, kum e thei gay the! Nangniw latryan kiu ngaek tho! Nangniw tuang latdyng tei taanc tho!

²⁶RINGHPOUC ai rui ngammei azanc khou rui Izip khou bammei Isaraelmei nangniw ruc khou swloumei latdyng hei nking tho: ‘Ringhmei Racguangc zanc khou ai latryan sw e!’ twna ai rui nangniw ta tisaancna latryan tisw dat zat ni tuang hamh the.

²⁷Zauclo! Nangniw khang gaymei tiguanglou dat lak khe, tiki nangniw ta swkamut kamailou puni. Nangniw meic guayna suc-rih rui hamh e thei ravpyan rui theic puni, nangniw meic gaanv khat na sini theic nsaekc lak khe.

²⁸Tiki nangniw meic katit na thu theic nsaekcna Izip khou rui Juda thangc hanc guang dat puni. Mi ganv khou kiu thow lat nchumh cho alat ny kaniw lat ny twmei kaniw thay puni.

²⁹RINGHPOUC ai rui nangniw ta mi bamv khou hei riap puni khatni nangniw ta swkamut kamai nimei latryan guay tei tiguang tangc puni twmei tuang nchinloumei taanv akhat taanclou puni.

³⁰Ai rui Judamei guangc Zedekia ta kata howmumei, swluai khang swbammeipu Babilonmei guangc Nebukadnezar baanc khou tiilou kanmei tei kumcna Izipmei guangc Hophra ta kata howmumei rui swluai khang rik bammeipu baanc khou tiilou puni the.”