Read Rongmei Naga JEREMIA 46 Bible Online

JEREMIA 46 - Rongmei Naga bible

JEREMIA 46

¹RINGHPOUC rui zaatc nunc lam khou akhou salou the,

²kumna Izip lam khou rui sa kahouh the. Babilonmei guangc Nebukadnezar rui, Jehoiakim Judamei guangc swmei padeihmei kwm Euphratis duithuak daeng khou Karkemis twna kawmei bamv khou zaw tisilou kanmei Izipmei guangc Neko tuang ricmei nunc lam khou samei lat kiu mi hei e:

³“Izipmei rihpy nunc rui kauc the, ‘nangniw tuang nggih sin thauna rihbamv khou tat gut tho!

⁴Takuanh nunc riang tei ntalouna ku tuangc tho! Ding rian tho, pyrun run tho! Nang tuang buy mun kating tho! Nang tuang rihpwan piu thau tho!’

⁵“Tiki ai tabui how bo?” twna RINGHPOUC rui thanv the. “Kaniw pingna hanc kan the, kaniw tuang ricmei nunc ta nthau ganc kan the; thei zauc karih dat makna theih khang ringh khang thay makna pak tat kan the.

⁶Pak ranv bammei nunc tei ni pak duak lak khe; rihmei nunc tei duak dat lak khe. Dihpy thangc, Euphratis daeng khou, kaniw phaysuyna bow the.

⁷Nail dui daih kumc thaumeipu hei thow cho, duikhuangc daic liam kumc patmeipu hei?

⁸Mi hei Izip be, Nail dui daih kumc thaumeipu hei, duikhuangc dai liam kumc thaumeipu hei. Izip rui sa e, ‘Ai thauna kandih kapwm ta liak bin puni; ai rui kaidai guay khatni maansei guay ta swmut puni.

⁹Takuanh nunc ta tat thau khang, nangreic patna takuanh gari guay ta luangc thau khang latdanv tii tho! Rihmei nunc ta thouc pat tho: Sudan khatni Libiamei nggih phunghmei nunc ta, Lidiamei pailu sinthaymei nunc ta.’ ”

¹⁰Aseic hei kauh Liangmei Ngamparymei RINGHPOUC tuang tingmik ge: aseic hei kamei rui khwm khangc puni the; aseic hei kamei rui kata howmumei nunc ta dandi tii puni the. Katuang baengsaeng taek sw puni the, kabung padik mak saanv tu puni the, kim mak saanv kaniw zei zangv puni the. aseic hei Ngamparymeipu rui dihpy thangc, Euphratis daeng khou, kaniw ta ravkhaengpuat tisw puni the.

¹¹He liuchang Izipmei lucle, Gilead thangc tatna puc phu la tho! Nangniw tuang puc guay nsa di the; nangniw ta tigay nuhmei ramh maek khe.

¹²Nangniw zakmei chamv tei zaatc nunc rui chu the, nangniw kapmei khwan meic kathuicna chu the. Rihmei gaanv khat rui gaanv khat ta kalanv puni the, kumna kaniw tei kandih khou bow key puni the.

¹³Babilonmei guangc Nebukadnezar rui Izip ta adow khang guang pwkhou RINGHPOUC rui akhou kumna sa the,

¹⁴“Mi hei Izipmei tuang kaidai guay khou salou tio, Migdol, Memphis, khatni Tahpanhes kaidai guay khou: ‘nangniw ta gaek khang chamdaanv la tho; nangniw tuang naimei guay suc-rih khou swkamut kamai kan puni the!

¹⁵Tabui swna nangniw tuang tanhmei Apis rav tei bow tu cho? RINGHPOUC rui kata sw key the!’

¹⁶Nangniw tuang ricmei nunc tei phay kalanvna bow the; kaniw kathuic na khat khat khou sa e, ‘Katumc tho! Aniu kai thangc aniu mei nunc daeng thangc pak tat di kho kumna zauczihmei nunc tuang buy-baeng mun khou rui duak di kho!’

¹⁷“Izipmei guangc khang zanh thanh tiilou the— ‘Kara karing geihmei daihlwn swmeipu kakhang kadow chamei laatow makmeipu,’ kaw the.

¹⁸Ngamparymei RINGHPOUC ai hei guangh e. Ai hei ringhmei Racguangc e. Tabor Chyng rui chyngbut pang khou kauh taph tapmei kumc, Karmel Chyng duipui ruc khou kauh taph tap bammei kumc nangniw ta adoumeipu tuang pumtan tei kauh taph tap puni the.

¹⁹Izipmei nuncle, kangmei sw tat khang chamdaanv la tho! Memphis kaidai hei ramvkaengvdic tiswlou puni the, kasic ngamna meic lungc taekna ganclou puni the.

²⁰Izip hei kalwn gaymei guaihkui, dihpy biak thangc rui guangmei chagou ta athwng kumc bam the.

²¹Niakloumei ricmei nunc nganvna guaihnac nunc kumcna kaniw ngangvbamv maek khe. Kaniw dingdacna adow mak khe; kaniw thei hancna pak kan the, kaniw mut nimei tingmik guang the, kaniw kamut kamai nimei tingmik guang the.

²²Howmumei rihmei nunc guang pwkhou, Izip tei nrui phian kumc pak kan ni the. Kaniw rui kata nrih rui dow the, thingbang dow key kumc dow key the.

²³Meic nunc ngouhdai dwang key kumc dow key the. Kaniw sing tei chak dat thay mak khe, kaniw tuang ricmei tei alunkav pang suangc geic the.

²⁴Izipmei nunc ta zaw tisilou the; dihpy thangc bammei nunc rui kaniw ta kuakna laa the. RINGHPOUC ai rui sa the.”

²⁵Ngamparymei RINGHPOUC, Isaraelmei Racguangc rui sa e, “Ai rui Thebes kaidai tuang rav Amon ta dandi tii puni, Izip ta, katuang rav nunc khatni guangh nunc ta lev twna dandi tii puni. Ai rui Izipmei guangc ta khatni kakhou lwmloumei nunc ta nym lana

²⁶kaniw ta swluai khang rik bammei Babilonmei guangc Nebukadnezar khatni katuang ricmei nunc baanc khou tiipatlou puni. Tiki katang thangc, reynungc lungc bammei tei kumcna meic nunc Izip khou lungc dat puni. RINGHPOUC ai rui sa the.”

²⁷“Amei nuncle, ping riu, Isaraelmei nuncle, ping riu. Ai rui nangniw ta kanlou dat puni, nangniw kang bammei kandic khou tei rui kanlou dat puni. nangniw kai khou guang datna nchu-nzaenghna lungc dat puni; nangniw giuga dat lak khe, kumna meic gaanv khat na rui sini nangniw ta tiping dat lak khe.

²⁸Ai nangniw khou guangna kanlou puni. Ai rui nangniw ta zinphakloumei kandic guay ta tei swkamut kamailou puni, tiki ai rui nangniw ta thu swkamut kamailou lak ge. Ai rui nangniw ta riap makna mpatlou lak ge; tiki ai rui nangniw ta riap pwkhou nchumhna taanc puni. RINGHPOUC ai rui sa the.”