Read Rongmei Naga JEREMIA 47 Bible Online

JEREMIA 47 - Rongmei Naga bible

JEREMIA 47

¹Izipmei guangc rui Gaza ta adow makmei hu khou RINGHPOUC rui Gaza lam khou akhou

²kumna sa the: “Zauc lo! Dihpy thangc dui thau pw the, kumna dui daih kumc luangc pat puni the. Hei tei rui kandih khatni mi khou naimei katana—kaidai guay khatni maansei guay ta liakbin puni the. Nkhavlou khang meic nunc rui kauc puni the; kandihmei maansei guay rui kap ranvna kap puni the.

³Kaniw takuanh pang phay khwan, takuanh gari takmei khwan, kahaengv luanghmei khwan chu puni the. Pu nunc rui kaniw nac nunc khang ziangrih pat dat pw lak khe; kaniw baanc tei kazak khou zay zuatri bam kan ni the.

⁴Philistin ta swmaan nimei ganv guang pw the Tur khatni Sidon ta nkhavlou bammei guay tei dan ganc kan puni the. RINGHPOUC ai rui Philistinmei guay ta swkamut kamai puni, Kret tuang dui paengc ramv khou rui guangmei guay ta.

⁵Gazamei nunc khou zaengsi daihmei guang the, Askelonmei nunc hei rui rey kan the. Baihmei Philistinmei nunc tei asaanh zaengsina huay bam nina cho?

⁶Nangniw rui kauc the, ‘RINGHPOUC tuang baengsaeng! Asaanh nang kathapc bam nina cho? nang thuap khou gut dat kan tho, mi khou tei nthaekc bam dat kan tho!’

⁷Tiki hei tei akumhna nthaekc nina cho mi khang tei kathouc tiilou bam khou? Askelon ta adow khang, duipui tyn khou lungc bammei nunc ta adow khang, ai rui latdanv tii kan the.”