Read Rongmei Naga JEREMIA 48 Bible Online

JEREMIA 48 - Rongmei Naga bible

JEREMIA 48

¹Ngamparymei RINGHPOUC rui Moab lam khou samei kiu mi hei e: “Nebo kaidaimei nunc hei sansi e dav! Katuang kaidai ti hei swkamut kamai the! Kiriathaim kaidai ti hei kuakna laa the, katuang tanhmei rihgaekkai swra the, kamei nunc ta tizak the;

²Moab tuang chingkhiuhmei guay tei tat kan the. Zauczihmei rui Heshbon kaidai laa kan the kumna Moabmei zaatc ta swkamut kamai khang sw the. Madmen kaidai ti hei ntou rymlou puni the; rihmei nunc kata sw khang guang puni the.

³‘Abiw adowmei! Swkamut kamaimei!’ twna Horonaim kaidaimei khou rui kauc bammei tei chulo.

⁴“Moab ta swkamut kamai the; kanac nunc rui kap bammei tei nking o.

⁵Luhit chaeng khou kahik bammei tei, Horonaim keymei chaeng khou ryanrana kap bammei khwan tei nking o.

⁶Kaniw rui sa e, ‘Katumc tho, ringh khang pak la tho!’ ‘Tazikramv khou bammei kuanniam nunc kumcna pak la tho!’

⁷“Moabmeile, nangniw hei nangniw tuang lanv lev pumtan khou lwmlou the, tiki nangniw ta ni kuaklaa puni the. Nangniw tuang Kemos rav tei katuang guangc nac lev amuh nunc kazauhna ginramc thangc phungc tat puni the,

⁸Kaidai akhat na sini kamut kamaimei khou rui duak dat lak khe; nzaengc khatni chyng-nzaengc hei sw kasic karouclou puni the. RINGHPOUC ai rui sa the.

⁹Moab khang kaswkaeng tiilou ti tho kamei samc amaan tat kan di tho; mi ta tei swmaan puni the. Moab tuang kaidai guay tei sw kasic karoucna ganclou puni the, mi khou tei meic lungc dat lak khe.”

¹⁰(RINGHPOUC tuang taanv tei kalung kapwm rui taanh makpui mei tei syang mphang kandiu! Katuang baengsaeng zaythau makpui mei tei syang mphang kandiu.)

¹¹RINGHPOUC rui sa the, “Moab hei kaganv kathuicna giuga makna lungc bam the khatni kaniw ta bangh zay tat zat mak khe. Moab hei lai kalaic kalw makmei khou dungclou bammei drakhadui kumc the. Karam zangvgay amaan mak ge, zangvgay tanh tan e.

¹²“Kumna ntaw thu Moab ta drakhadui bun pat kumc bun pat khang ai rui meic thouclou puni the. Kaniw rui katuang zouclai bun nsa patna swbak paruatlou puni the.

¹³Isaraelmei rui kaniw rui lwmgaymei Bethel khang zakmei kumc, Moabmei ni kaniw tuang rav Kemos khang zak puni the.

¹⁴“Moabmei nuncle, tabui swna nangniw hei tancbauhmei nunc e, rih khou rui kating guangmei bauhmei nunc e twna sa bam tu cho?

¹⁵Moab khatni mi tuang kaidai guay tei swkamut kamai the; mi tuang gay liangmei chabwan nunc ta ni dowluai the. Ai hei guangh e, Ngamparymei RINGHPOUC e, kumna ai rui sa the.

¹⁶Moab amaan nimei hei ana guang the; mi hei kamut kamai nimei katumcna guang pw the.

¹⁷Moabmei khang kap tho, kakainingmei nangniw, kazanc tatmei tei thaymei nangniw guay. Kumna sa tho, ‘Katuang tanhmei dihsin builwang tei swbau kan the; kagunc khatni kangamv guay maek khe.’

¹⁸Dibon kaidai khou lungc bammei nangniw, nangniw tuang kauhmei bamv khou tei rui keyna mbut dyng khou key dungc tho: Moab ta swkamut kamai nimei mi khou hei bam the, kumna Moab tuang rihgaekkai guay sw kasic karoucna ganclou the.

¹⁹Aroer kaidai khou lungc bammei nangniw, chaeng daeng khou dingna nkhwanna; pak tat bammei nunc khou tei thanv tho, tabui sw thena cho twna kaniw khou thanv tho.

²⁰Kaniw rui daw puni, ‘Moab bow kan the, mi khang tei kap tho; hei tei zak the. Arnon duithuak saanvsaengh kauc ndauh tho, Moab ta swkamut kamai the twna!’

²¹“Chyng-nzaengc tuang kaidai: Holon, Jaza, Mephaat,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Keriot, khatni Bozra kaidai guay khou latzan guang the. Moab tuang kaidai guay khou latzan guang the.

²⁵Moab tuang pumtan swpiak the; kangamv guay swmaan the. RINGHPOUC ai rui sa the.”

²⁶RINGHPOUC rui sa the, “Moab ti hei tidui mba tho, kalam thu kamei ata liam the. Moab hei kamei rui nrui patloumei khou niangc puni the, kumna meic nunc rui nuic puni the.

²⁷Moabmei tei kaniw akumhna Isaraelmei ta nuic kan tu cho twmei thay puni the. Kwamlaamei nunc rui nymmei kumcna nangniw rui kaniw ta sw kan the.

²⁸“Moab khou lungc bammei nangniw, nangniw tuang kaidai guay khou tei rui tat pat la tho! Khow khou akhouhna rui kapaeng dwan kumc dwan la tho.

²⁹Moabmei hei daic tuh tu the! Kaniw hei adih daihriw sw cho, adih gaengh sw cho, khatni nganv sw cho, kaniw hei kaniw rana ta adih ning kauh cho twmei ai chu e.

³⁰Kaniw gaengh swmei tei RINGHPOUC ai rui thay e. Kaniw daihriw sw bammei tei nsa de, kumna kaniw rui sw bammei guay tei tingsaeng nimei tuang hamh e.

³¹Kumna ai Moabmei guayna khang khatni Kir Heresmei guayna khang kap puni.

³²Ai rui Sibma kaidaimei khang kap puni, Jazer kaidaimei khang ta suangc kap ranvna kap puni. Sibma kaidaile, nang hei drakha chy kumc Theihmei duipui baanc twanna Jazer baanc tangc the. Tiki ntaw thu nang tuang tinglwm ganv khou thaimei khatni drakhathai guay swkamut kamai ngam the.

³³Moab tuang kandic gaymei khou rui neihla zaenggaymei laa tat kan the. Drakhadui sunhmei bamv guay khou ai rui drakhadui tiluangc taanlou the; drakhadui kasiamh nimei ni, neihlana kauc nimei ni maek khe.

³⁴“Heshbon khatni Eleale kaidai nei rui kap the, kumna kaniw kapmei khwan tei Jahaz kaidai nganv chu tangc the, Zoar kaidai ni chu tangc the, khatni Horonaim lev Eglat kaidai nganv chu tangc the. Nimrim duithuak nganv thip phuithiw the.

³⁵Ai rui Moabmei nunc ta kaniw tuang kalummei bamv guay khou rawna khaengmei ti-nthaekclou puni the khatni kaniw tuang rav nunc khang tikhaeng taan puni the. RINGHPOUC ai rui sa the.

³⁶“Thowkumhmei rui theibeihlu nlim amuanna kumna alung rui Moab khatni Kir Heres kaidai nei khang latlu e, kalam thu kaniw tuang naimei guay amaan kan the.

³⁷Kaniw meic guayna kaniw py khatni kaniw mwanghiw guat the. Kaniw meic guayna kaniw baanc kathamv zamhlou lana, zaengsiphey piu the.

³⁸Moabmei tuang kainam guay khou khatni kaniw tuang sanghbamv guay khou huayna kapmei khwan hamhna ramh baihmei khwan chu mak khe kalam thu ganc patmei laibung swbak kumc ai rui Moab ta swbak the.

³⁹Moab ta swpuat paruatlou the! Kap the! Moab ta tizaklou the. Hei tei sw kasic karoucna ganclou the kumna kainingmei zaat nunc rui nuic the. RINGHPOUC ai rui sa the.”

⁴⁰Zaatc akhat rui Moab ruc khou Mouc liapkey kumc liap keyna mi tuang kaidai guay khatni rihgaekkai guay tei laa puni.

⁴¹Mi nungc kiu Moabmei ricmei nunc tei ntumei rui nahbam ni khou pingmei kumc ping puni.

⁴²Moab ta tei swkamut kamai puni the kumna hei tei zaatc akhat swna nai bam dat pw lak khe, kalam thu kamei karana ta ti daicna ata liam the.

⁴³Moabmei nunc khang meic pingmei, kwam khatni phah mpeyna nkhwan bam the. RINGHPOUC rui sa pat kan the.

⁴⁴Guang nimei meic pingmei khou tei rui pak duak khang swpui mei tei kwam khou keylou puni, kwam khou rui kalaic ku datpui mei tei phah khou manc puni, kalam thu Moab ta swmaan nimei ganv tei RINGHPOUC rui damclou tang the.

⁴⁵Kakai-kasaamc maekna ramh sw la khang thay makmei nunc Heshbon kaidai khou duplou khang sw puni (Guangh Sihon rui kaganv akhat khou sinloumei kaidai e), tiki hei tei mai chuangc bam the. Suc-rih kahawmei Moabmei tuang ramvrei daeng ramv guay khatni chyng kauhmei guay mai rui ntei ngam the.

⁴⁶Moabmei nunc ta nzian e dav! Kemos ta kalummei nunc ta tei swkamut kamailou kan the, khatni kaniw nac mpouh aluh nunc ta kangmei swna zay tat kan the.

⁴⁷Tiki thei thangc thu RINGHPOUC rui Moab ta zauc nzianlou dat puni kumna kakandic khou tilungclou dat puni twna RINGHPOUC rui sa e.