Read Rongmei Naga JEREMIA 49 Bible Online

JEREMIA 49 - Rongmei Naga bible

JEREMIA 49

¹Ammonmei lam khou RINGHPOUC rui saloumei kiu mi hei the: “Isaraelmei nggaanvmei maek khena cho? Kaniw tuang kandic ta gaek nimei meic maek khena cho? Tabui swna Molek rav ta kalummei nunc ta Gad kandic tei tilaana mi khou tei tilungclou bam tu cho?

²Tiki kaniw tuang Rabba kaidai khou tei rih khwan chu puni the kumna hei tei sw kasic karoucna ganclou puni the kumna mi tuang namv guay tei mai ntei mutsutlou puni the. Khou kiu Isaraelmei nunc rui mi kandic tei laa dat puni twna RINGHPOUC rui sa e.

³Heshbonmei nuncle, kap tho! Ai kaidai hei swkamut kamai the! Rabbameipui nuncle, huayna kap tho! Zaengsiphey mbaanvna kap tho. Saengzin saengzana saeng tho. Nangniw tuang rav Molek ta tei katuang amuc nunc khatni guangh nunc lev twna ginramdic thangc phungc tat puni the.

⁴Lwmnuh makmei nunc nangniw tabui swna gaengh sw bam tu cho? Nang pumtan maek khe. Nang tuang pumtan khou ngangvlouna meic gaanv khat na sini nang ta adow bauc ni tuang hamh e twna sa bam tu cho?

⁵Kabamv kathuic khou rui nang ruc khou meicpingmei tuang tiguang puni the. Nangniw meic kaguayna pak puni the, meic kathuicna kapanty kapanty duak khang pak puni the, kumna nangniw tuang rihmei nunc ta khuam kaduai dat nimei meic nai dat ni tuang hamh the.

⁶“Tiki thei thangc thu ai rui Ammon ta zauc nzianlou dat puni kumna kakandic khou tilungclou dat puni.”

⁷Ngamparymei RINGHPOUC rui Edom lam khou samei kiu mi hei e: “Edommei nunc hei ningting maek khena cho? Kaniw tuang latdinhpouc nunc tei rui kaniw taanc nimei tei dinclou thay mak khena cho? Kaniw tuang ningting guay amaan ngam thena cho?

⁸Dedan kaidaimei nuncle, karih patna pak la tho! Nkamh la tho! Ai rui Esau kikta ta swkamut kamai puni the, kalam thu ai rui kaniw ta riap nimei ganv guang pw the.

⁹Drakhathai tei meic nunc rui rei pwkhou asaekc thu rei nsaekclou e, khatni kwamlaamei nunc rui zingbangc guangna kaniw kahaw hawmei na laa kan e.

¹⁰Tiki ai rui Esau kikta ta kathangv laanc duaklou puni the kumna kaniw duppui bamv guay tei laanc duaklou puni the, kumna kaniw nkamhmei bamv nai dat lak khe. Edommei guayna ta swkamut kamai the gaanv khat na ta sini nsaekclou mak khe.

¹¹Nangniw mei nkhu nruna nac nunc tei akhou ganclou tho, ai rui kaniw ta zauclou puni the. Nangniw mei maypui nunc tei akhou ngangvlou kan di tho.

¹²“Riaplou khang biuc rapmei khuay maekmei nunc ta sini riaploumei buangc khou tei rui zangv e thei, nangniw ta thu riap makna bam puni twna ningna cho? Kiuc hamh e, nang mi buangc khou tei rui zangv nina di the!

¹³Bozra kaidai tei meic pingmei lwn khatni ramvkaengvdic sw puni the; meic nunc rui sinnui puni the kumna kazanc tei siangdu siangdanmei khou zaysaanc puni the twna ai kahak rui latryan swna sa kan the. Kadaeng khou naimei namv guay tei tingsaeng sw kasic karoucna ganclou puni the. RINGHPOUC ai rui sa the.”

¹⁴Ai rui sa the, “Edomle, ai RINGHPOUC khou rui lat akhat chu e. Zaatc nunc ta kaniw tuang rihmei nunc khuam kaduai tho kumna nangniw ta adow khang chamdaanv tho twna sa khang RINGHPOUC rui latdiumei thouc pat kan the.

¹⁵RINGHPOUC rui nangniw ta tisuanlou puni the, kumna meic gaanv khat na rui sini nangniw ta chakhwang sw dat pw lak khe.

¹⁶Nangniw gaengh swmei rui nangniw ta guat the. Meic nunc rui nangniw ta ping e twna nangniw ning bammei zu tei meic gaanv khat na rui sini ping mak khe. Nangniw chyng twan kauh khou khow khou lungc bam e; tiki nangniw mouckauh kumcna kauh thangc lungc bam sini, RINGHPOUC rui nangniw ta zay key dat puni. RINGHPOUC rui sa the.”

¹⁷RINGHPOUC rui sa the, “Edom khou guang nimei swkamut kamaimei tei heidikamv si puni the twmei thu tatruanloumei kathuic ruph rup puni the khatni ping puni the.

¹⁸Sodom lev Gomora khatni mi daeng khou naimei kaidai guay tei swkamut kamaimei khou pat kanmei tei kumcna Edom ruc khou ni pat puni the. Mi khou tei meic lungc dat lak khe. RINGHPOUC ai rui sa the.

¹⁹Kamangliangpui Jordan ngouc dai khou rui patna ndiakcmei khouringh byn khou guangmei kumcna ai guangna thay mak daek khou ai rui Edommei ta kaniw kandic khou rui nthau ganc puni the. Kumna ai rui kadahloumeipu rui kaniw ta sin puni the. Thow tei ai lev kida nuhna cho? Thow rui ata ntan baucna cho? Tabui guangc rui ata akhangv ngamna cho?

²⁰Ai rui Edommei ruc khou swlou nimei khatni Teman kaidai khou taanclou nimei tei nking o. Kaniw nac nunc ta nganvna zay tat puni the, kumna meic kathuicna ping puni the.

²¹Edom bowkeymei khwan tei heidikamv ranvna kandic kapwm kachin puni the, kumna kaluangna kauhmei khwan Akaba duipui nganv chu tangc puni.

²²Bozra kaidai ta zauczihmei rui mouc liap key kumc liap key puni the. Mi nungc kiu Edommei ricmei ntumei nahbam ni khou sucna ryanramei kumc puni the.”

²³RINGHPOUC rui Damaskas lam khou samei kiu mi hei the: “Hamat khatni Arpad kaidai khou bammei nunc lungh ryanra the khatni katuakc the kalam thu kaniw simei chamv chu the. Lunghgeihmei rui kaniw khou duipui kamuatc kumc bam the, kumna kaniw nthaekc ngam mak khe.

²⁴Damaskasmei nunc tei nsuan the kumna pingna pak the. Kaniw tei nahbam nimeipui kumcna suc the khatni ryanra the.

²⁵Kazanc tatmei neihlana lungc bammei kaidai tei ntaw thu meic lungc taekna ganclou the.

²⁶Mi nungc kiu katuang chabwan nunc ta chaengdai chaengdai khou swluai puni kumna katuang ricmei nunc ta swkamut kamailou puni.

²⁷Ai rui Damaskas tuang raengh guay mai thoulou puni kumna Guangh Benhadad tuang guangckai guay ntei puni. Ngamparymei RINGHPOUC ai rui sa the.”

²⁸Mi hei RINGHPOUC rui Kedarmei zaatc khatni Babilonmei guangc Nebukadnezar rui laa kanmei Hazor kaidai rui sin bammei ramv lam khou samei tuang e: “Kedarmei nunc ta adow tho kumna mi neihpat thangc bammei zaat ta tei swmaan tho!

²⁹Kaniw tuang pheykai guay khatni lauziu pang tei asut tho, kaniw tuang pheykai dam khatni kaniw tuang pheykai khou naimei guay tei asut tho. Kaniw tuang guaikuan nunc tei laa tho kumna ‘meicpingmei tuang rui nangniw ta bam nkuay the!’ twna kaniw khou tei kauc ndauhlou ti tho.

³⁰“Hazormei nuncle, nangniw pak ducna pak tatna khowlang thangc nkamh tho twna RINGHPOUC ai rui sa the. Babilonmei guangc Nebukadnezar rui nangniw ta sw khang sw bam the. Kamei rui sa the,

³¹‘Guang tho! Mi giuga makna bammei nunc ta tei aniu adow di kho! Kaniw tuang kaidai tei raengh maek ge, khamvtaan ni maek ge, kapham di the.’

³²“Kaniw tuang guaikuan nunc khatni guaih nunc tei laa tho! Mi kasam rap duimei nunc ta tei ai rui thei hu baanzat baandau alay ganclou puni kumna kabamv kathuicna khou rui kamut kamaimei kaniw ruc khou tiguang puni.

³³Hazor tei tingsaengzaeng tazikramv ti-mbaihlou puni, asacsi bamv tiswlou puni. Mi khou tei maansei lungc dat lak khe. RINGHPOUC ai rui sa the.”

³⁴Zedekia Judamei guangc sw rappui lev Ngamparymei RINGHPOUC rui Elam kandic lam khou akhou salou e.

³⁵Kamei rui sa e, “Elam ta heidi titanclou bammei sauhpai sinmei guay ta tei ai rui swluai puni.

³⁶Ai rui mpwan ta kazat kathuih thangc rui Elam ruc khou ti-aliu guang puni, kumna kamei nunc ta tei kabamv kathuicna khou zinphaklou puni. Kaniw tei kakai-kalau maekmei swna kabamv kathuicna khou bam puni the.

³⁷Ai rui Elammei ta kaniw ta howmumei nunc, kaniw ta swluai khang sw bammei nunc ta tei tipinglou puni. Alungpuam dai khou ai rui Elammei ta swmaan puni kumna kaniw ta swmut sutlou mak saanv kaniw ruc khou rihmei nunc thouc guang puni.

³⁸Ai rui kaniw tuang guangc nunc khatni kapy swmei nunc ta swmaan lana khou tei aguangh bamvpaeng kasiamh thau puni.

³⁹Tiki thei thangc ai rui Elam ta RINGHPOUC rui zauc nzianlou dat puni khatni kakandih khou tilungclou dat puni. RINGHPOUC ai rui sa the.”