Read Rongmei Naga JEREMIA 5 Bible Online

JEREMIA 5 - Rongmei Naga bible

JEREMIA 5

¹Jerusalemmei nuncle, nangniw tuang chaengdai guay khou tei pak tatna zauc o! Zauc kari kariangna zauc o! Kaithyan bamv guay khou ni phu zauc o! Nchumhmei taanv taanhmei, Ravguangc khou lwmnuhmei sw khang karamc bammei thowkumhmei nai bu cho? Nai e thei, RINGHPOUC rui Jerusalem ta kuaklou puni.

²Nangniw mwang rui RINGHPOUC ta kalum e twna sa bam sini, nangniw rui samei tei kumcna kalum mak ge.

³RINGHPOUC rui lwmnuhmei nunc ta phuna bam e. Kamei rui nangniw ta riapna kathamv the, tiki nangniw thouh swlou mak ge; kamei rui nangniw ta niak puat the, tiki nangniw thay zat mak ge. nangniw lung tanc the kumna nangniw paapc khou rui lunghlaic guang mak khe.

⁴Khoutei ai kumna kakhanh the, “Kaniw hei sisihmei mpangmei mei nunc lana di the. kaniw hei mpang mei lwnlung khou lungc the; Ravguangc rui kahawmei tabui cho, RINGHPOUC rui kaniw ta tabui tisw nii cho twmei kaniw thay mak khe.

⁵Ai ngamv sinmei nunc khou tat puni the kumna kaniw ta kachuc puni the. Khou kiu, Ravguangc rui kahawmei kiu tabui cho, RINGHPOUC rui kaniw ta tabui titaanc nii cho twmei kaniw thay puni the.” Tiki kaniw kaguayna Ravguangc kut gut nii mak khe kumna kalat piu zih the.

⁶Hei zaeng rui, ngouh bangc thangc tuang kamangliangpui pang rui kaniw ta swluai puni the, ramvkaengvdic tuang angiw pang rui kaniw ta siat puat paruatlou puni the, kamang alaih pang rui kaniw tuang kaidai khou ruan suak suak bam puni the. Meic nunc kapaengc pat patmei ta tei mi nunc tei rui nkay puni the. Kalam thu kaniw paap tei geic the khatni katupc katupcna kaniw Ravguangc khou rui tat pat the.

⁷RINGHPOUC rui kumna sa e, “Tabui swna ai amei nunc paap kuaklou bam nina cho? kaniw ata ganclouna kachaeng hamhmei rav baih baihmei ta kalum tat kan the. Ai rui amei nunc ta titu-tizangv padiklou the, tiki kaniw lungcmaanv lungcmowna mangcsangmeiluc swna lungc the.

⁸Kaniw tei nthahmei takuanhchic kumc the, kaniw kathuic kaining kaigeimei now ta kahaw the.

⁹Hei guay khang hei ai rui kaniw ta dandi tii lak nina cho? Hei kumhmei zaat ti hei ai khwm khangclou lakna cho?

¹⁰Amei nunc tuang drakhalau guay dow key khang ai rui zauczihmei nunc ta thouclou the, tiki kaniw ta swmaan mutsutlou khang thu hamh e. Kachy guay tei ram ganc ngam khang ai sa puni the, kalam thu mi chy guay tei atuang hamh e.

¹¹Isaraelmei khatni Judamei nunc rui ata guat kasic sihna guat the. RINGHPOUC ai rui mi hei samei tuang e.”

¹²RINGHPOUC tuang mei nunc rui kata nuh makna “Aniw ta ramhkhat na sini sw bam lak ge. Ryanramei ni guang bam ni tuang hamh e; suc-rih ni, nkow-ndaapcmei ni guang bam ni tuang hamh e.” twna sa the.

¹³Muhzwng nunc ni mpwanbungc kumc karaeng di the. Kalam thu kaniw khou Ravguangc lat maek ge kumna kaniw rui samei tei kaniw khang the.

¹⁴Ngamparymei RINGHPOUC Ravguangc rui akhou sa e, “Meic nunc hei rui kumna sa bammei zaeng rui, ai rui alat hei nang mwang khou mai kumc tiswlou puni the. Mi mai tei rui kaniw ta thing ta kumc tichuangc puni the.”

¹⁵Isaraelmei nuncle, nangniw ta adow khang duhmei kandic thangc rui zaatc akhat ta thouc guang the. Hei tei tancbauhmei reynungc rui nai bammei, nangniw rui kalat-kalu thay makmei zaat re.

¹⁶Kaniw tuang saucpai sinmei rihmei nunc tei tancbauhmei zauzian maekna swluai swtiatmei rihmei nunc e.

¹⁷Kaniw rui nangniw tuang nap-bi tu ngam kan puni the; nangniw nac mpouh aluh nunc ta swluai ngam kan puni the. Kaniw rui nangniw tuang guaih-bangh, lauziu pang ta swluai ngam key puni the khatni nangniw tuang drakha luai swkamut kamailou puni the nangniw rui lwmmei raengh raengloumei kaidai guay tei kaniw tuang ricmei nunc rui swkamut kamailou puni the.

¹⁸RINGHPOUC rui sa e, “Tiki mi ganv khou kiu nganvna ai rui amei nunc ta swmaan mutsut lak ge.

¹⁹Tabui swna ai rui hei guay hei tiguang bam tu cho twna kaniw rui thanv pw e thei, Jeremiale, kaniw rui ata ganclouna kaniw kandic khou kandih baihmei rav nunc ta kalum bammei zaeng rui kaniw tuang kandic hamhmei khou gin nunc siamruai tiswmei tuang e twna kaniw khou sa tio.”

²⁰RINGHPOUC rui sa e, “Jakob kikta khou kumna sa o, Judamei nunc khou kumna sa o:

²¹Kamik naina naina how makmei, kanu naina naina chu makmei mpang-nlomei nuncle, lungh gutna nking o.

²²Ai hei RINGHPOUC e; tabui swna nangniw ata ping makna cho? Nangniw tabui swna ahu khou ping kadunh mak tu cho? Ai rui syniang ta duipui khang kaan pat nuh makmei tingsaengc ramvrei swna lou the. Dui rui kamuatcna bam sini hei tei kamuatc twan ngam mak ge; duithuat rui karo bam sini hei tei swbak pat ngam mak ge.

²³Maansei nangniw thu kum mak ge! Nangniw lung tanc the, khatni meicliam the; nangniw rui ata ganclouna tat kan the.

²⁴Ai rui tingkwm pum chakaanvmun ting khatni lauphwnswan ting tiriu keyna nap-bi titay bam tisini nangniw ata champouh ni twna ning pat zat mak ge.

²⁵Nangniw tuang paap rui mi gaymei dam guay hei nangniw khou rui thingclou the.

²⁶“Amei pang khou lungc bammei meicsimei nunc tei nruayna khang phah zawlouna nkhwan bammei kumc maansei nunc khang kaniw phah zawlouna bam the.

²⁷Phahraengh zawmei rui kakhau nruayna rui thimc padikloumei kumc, kaniw kai tei asut guangmei puat rui padik the. Hei zaeng rui kaniw lungcgay the khatni ngamv nai the,

²⁸hei zaeng rui kaniw tugay zangvgay tuna zangvna kaniw pumc gay bammei tuang e. Kaniw tuang taanv simei hei kanganv maek khe, kaniw rui nruna nunc khou kaniw dam tiilou mak ge khatni meic nunc rui sintuna bammei nunc khou nchumhmei swlou mak ge.

²⁹“Kumhpui zaeng rui, RINGHPOUC ai rui, kaniw ta mi guay khang hei dandi tii puni the; ai rui mi zaat ruc khou hei khwm khangclou puni the.

³⁰Si sihmei khatni ramh sa la khang thay makmei tuang mi kandic khou hei patna bam the:

³¹muhzwng nunc rui saraamhmei lat rana sa the; muhzwng nunc rui samei theilayna amuh nunc ni taanc the, kumna meic nunc rui mi ta tei lat khat na sini nchyanlou mak khe. Mi guay tei kanganv sow tangclou pwkhou kaniw tabui kumh puni cho?”