Read Rongmei Naga JEREMIA 50 Bible Online

JEREMIA 50 - Rongmei Naga bible

JEREMIA 50

¹Babilon kaidai khatni mi khou tei bammei guay lam khou RINGHPOUC rui akhou samei kiu mi hei e:

²“Mi chamv hei zaatc nunc khou dinclou tio! Mi hei kauc ndauh o! Chuanghphey daanc tho kumna chamv tei kauc ndauh tho, mi hei nkamhlou ri tho! Babilon bowkey the! Katuang rav Marduk ta swkamut kamailou the! Babilonmei tuang ravmaengc guay ti mala lou the, katuang chanymei maengc nunc tei swpuat paruat the!

³“Dihpy thangc bammei zaatc akhat Babilonmei ta adow khang guang the, kumna mi kandic ti hei sypungramv ti-mbaihlou puni the. Maansei ni khouringh ni pak puni the, kumna mi khou tei meic gaanv khat na sini bam dat lak khe.”

⁴RINGHPOUC rui sa e, “Mi ganv kiu guang pwkhou Isaraelmei khatni Judamei guay kapna kaniw Racguangc ata phu guang puni.

⁵Kaniw rui Zaion chaeng tei thanvna mi biak thangc tei guang puni the. Kaniw tei ai lev tingsaengzaeng latryan sw puni the kumna hei tei sw bak dat lak khe.

⁶“Amei nunc hei lauziu gaenghmeipu rui nwmbangc khou chaengzay maanloumei lauziu nunc kumc the. Kaniw hei kakai bamv amucna luanghbut akhat khou rui luanghbut akhat khou ruanna tat bammei lauziu nunc kumc the.

⁷Kaniw ta ariwmei guay rui kaniw ta adow the. Kaniw ta zauczihmei guay rui sa the, ‘kaniw RINGHPOUC ruc khou paapc taanc the, kumna aniu rui sw bammei hei nkhuai mak khe. Kaniw pupouc nunc RINGHPOUC khou lwm e, kumna kaniw ni kakhou lwm nuhmei swna bam nimei tuang e.’

⁸“Isaraelmei nuncle, Babilon khou rui pak tat tho! Mi kandic tei mpatlou tho! Tat reymei sw la tho!

⁹Dihpy thangc bammei tanhmei zaatc nunc kang akhat ta Babilon ta adow khang ai rui katiu thau puni the. Kaniw dingphianna mi kandic ta adowna hei tei laa puni the. Kaniw hei kabaanc nchumhmei nunc the, kaap pat kanmei pailu tei suai dat mak khe.

¹⁰Babilon ti hei kwamlaa puni the, kumna kwamlaamei nunc tei rui kaniw rui laa nii niimei guay laa puni the. RINGHPOUC ai rui sa the.”

¹¹RINGHPOUC rui sa e, “Babilonmeile, nangniw rui atuang zaat ta kwamlaana laudymei guaic kumc, takuanhchic rah kumc nangniw neihla zaenggayna nkuay tat bam e,

¹²Tiki nangniw tuang daihmei kaidai hei tizak puni the khatni zaw tisi puni the. Babilon hei ramhkhat na sini hamh puni the; mi hei phuithiuh thiumei dui maekmei ramvkaengvdic sw puni the.

¹³Alungpuam zaeng rui Babilon khou meic gaanv khat na sini lungc dat pw lak khe; hei tei sw kasic karoucna ganclou puni the, kumna tatruanloumei kathuic kaluang ruph rup puni the khatni hahlahla puni the.

¹⁴“Luhpai sinmei rihmei nuncle, Babilon ta adow khang ding liangc tho kumna mi ti hei ding bin tho. Nangniw tuang luhpai guay tei Babilon khou kaaplou tho, kalam thu kaniw rui RINGHPOUC aruc khou paapc taanc the.

¹⁵Mi kaidai khou hei rihkhwm gut tho! Ntaw thu Babilonmei hei gutlou the. Karaengh tei swra gut the kumna swpangv the. Ai rui Babilonmei ruc khou khwm khangc bam the. Kumna kaniw ruc khou khwm khangc la tho, kumna kaniw rui meic baihmei ta swmei kumcna kaniw ruc khou ni swlou ti tho.

¹⁶Mi kandic khou tei phunling tilingc key ri tho, khatni kathai titay ri tho. Mi khou tei lungc bammei gin guay tei adow guangmei rihmei nunc ta ping puni the kumna kaniw kai thangc hanc dat kan puni the.”

¹⁷RINGHPOUC rui sa e, “Isaraelmei hei lauziu nunc ta kamangliangpui rui nthau phakloumei kumc the. Reymei khou Asiriamei guanghdaihmei rui adow the, hei tangv Babilonmei guangc Nebukadnezar rui kaniw rou nkiakc the.

¹⁸Hei zaeng rui, Ngamparymei RINGHPOUC, Isaraelmei Racguangc ai rui Asiriamei guanghdaihmei ta dandi tiimei kumcna Babilonmei guangc khatni kakandih ta dandi tii puni the.

¹⁹Ai rui Isaraelmei ta kaniw kandic khou phungc guanglou dat puni the. Kaniw rui Karmel Chyng khatni Bashan ramv khou lingc keyloumei nap-bi tuna lungc puni the khatni Ephraim lev Gilead ramv khou lingcloumei nap-bi guay kaniw tu pian zangvpianna lungc puni the.

²⁰Mi ganv kiu guang pwkhou, Isaraelmei khou paapc nai dat pw lak khe khatni Juda khou simei nai dat pw lak khe, kalam thu theic nsaekcloumei nunc paap tei kuaklou puni the. RINGHPOUC ai rui sa the.”

²¹RINGHPOUC rui sa e, “Merathaim khatni Pekotmei ta adow tho. Kaniw ta swluai tho khatni swkamut kamai tho. Ai rui nangniw khang latdanv tiimei guay tei taanc tho. RINGHPOUC ai rui sa the.

²²Mi kandic khou tei rih adoumei khwan chu the, kumna sw kasic karouc ngam the.

²³Babilonmei rui kandih kapwm ta diangc puat paruatlou the, kumna ntaw mi tandiak ta tei swpiak paruatlou the! Mi kandic khou patloumei ti hei howna kandihmei zaatc kapwmna kaluang the.

²⁴Babilonmei nangniw ata adow the kumna nangniw thay mak daekna, ai rui nangniw khang zawloumei phac khou nangniw manc the.

²⁵Atuang buy-baeng loumei bamv tei ai rui laanc pat the, kumna alungpuam khou ai rui mi guay tei sat pat the, kalam thu, Kauh Liangmei Ngamparymei RINGHPOUC ai rui Babilonmei ruc khou taanv taanc puni the.

²⁶Mi ti hei kanaek kaguayna khou rui adow gut tho kumna katuang nap-bi ryloumei bamv tei sw bak pat tho! Asut guangmei puat rui napzungc duangc kumc lou tho! Mi kandic tei swkamut kamai tho! Ramh akhat na sini nsaekclou dat ri tho!

²⁷Kaniw tuang ricmei kaguayna ta swluai tho! Kaniw ta dowluai key tho! Babilonmei hei mutsut the! Kaniw ta dandi tii nimei ganv guang the!”

²⁸(Babilon khou rui pakduak patmei nunc Jerusalem khou guangna Babilonmei nunc ta kaniw rui mi tuang Ravkai khou swlou kanmei khang tei RINGHPOUC aniu Racguangc rui akumhna khwm khangclou kan tu cho twmei raclou e.)

²⁹“Sauhpai sinmei rihmei nunc ta tei Babilon ta adow khang sa ti tho. Sauhpai kaap thaymei kaguayna ta tei thouc pat tho. Kaidai ta tei dingbin tho kumna gaanv khat na ta sini pat duak ri tho. Kaniw rui taanc kanmei khwm tei khangclou ti tho, khatni kaniw rui meic baihmei ta swkanmei kahak tei kaniw ta ni swlou ti tho, kalam thu kaniw dai swna Isaraelmei tuang Nthanmeipu aruc khou taanv sw the.

³⁰Kumna katuang chabwan nunc ta chaengdai chaengdai khou swluai puni the, kumna katuang ricmei guay ta tei mi nungc kiu swluai puni the. RINGHPOUC ai rui sa the.

³¹“Babilonmeile, nang hei gaengh swmei rui padik the, kumhpui zaeng rui, Ngamparymei Kauh Liangmei RINGHPOUC ai rui nang ta nuh mak khe! Nang ta ai rui dandi tii nimei ganv guang pw the.

³²Ramhkhe swmei nang hei phay kalanvna bow puni the, meic gaanv khat na rui sini nang ta zay thaulou dat lak khe. Ai rui nang tuang kaidai guay mailou puni the, kumna mi khou tei naimei katana swmaan puni the.”

³³Ngamparymei RINGHPOUC rui sa e, “Isaraelmei khatni Judamei ta rai the, kaniw ta nymmei nunc rui kaniw ta gaek tiat tiatna gaek bam the kumna kaniw ta ti tat dat ni tuang hamh the.

³⁴Tiki kaniw ta kan patlou nimeipu tei tanc e kazanc hei Ngamparymei RINGHPOUC twna kaw e. Kamei kahak rui kaniw tuang latbamv tei sinthau puni the kumna kandih khou nchu-nzaenghmei phungc guang puni the, tiki Babilonmei nunc khou thu ryanramei tiguang puni the.”

³⁵RINGHPOUC rui sa e, “Babilon khou theihmei! Babilonmei nunc khou theihmei, katuang dihsinpouc nunc, ningtyngmei nunc khou theihmei!

³⁶Katuang saraamhmei muhzwng nunc khou theihmei kaniw adih mpang cho! Katuang ricmei nunc khou theihmei— kaniw adih ping kan tu tha?

³⁷Katuang takuanc nunc khatni gari guay swmaan tho! Niakloumei karihmei nunc khou theih mei kaniw adih nsuan cho! kaniw tuang lanv guay swmaan tho; mi guay tei kwamlaa tho.

³⁸Kakandih khou ting tikaengc tho kumna katuang duithuak guay tithip tho. Babilon hei ravmaengc padikmei kaidai e, hei tei rui kaniw ta ti-mba the.

³⁹“Kumna Babilon khou tei ravsic nunc rui khatni simei bumaengc nunc rui, khatni nthan makmei nruay nunc rui, kaniw bamv sw puni the. Mi khou tei maansei lungc dat zat ni tuang hamh the, thei thangc nganvna.

⁴⁰Ai rui Sodom lev Gomora khatni kadaeng daeng khou naimei kaidai launa guay tei swmaanmei tei kumcna Babilon ta swmaan puni the. Mi khou tei maansei lungc dat ni tuang hamh the. RINGHPOUC ai rui sa the.

⁴¹“Dihpy biak kandic thangc rui meic nunc, duhmei kandic thangc rui tancbauhmei zaat guang the; zauclo, guangh mpeyna rih khang chamdaanvna bam the.

⁴²Kaniw sauhpai khatni baengsaeng sin thau the; kaniw hei meic nzi e khatni zauzian maek ge. kaniw tei kaniw tuang takuanh pang tuangcna duipui kamuatcmei ra kumc guang the. Kaniw tei Babilonmei ta adow khang chamdaanv bam the.

⁴³Babilonmei guangc rui mi chamv tei chu the, kumna kabaanc zay zuatri key kan the. Kamei tei nahbam nimeipui kumcna ryanramei khatni suhmei rui padik the.

⁴⁴“Zauclo! Jordan tuang ngoucdai khou rui kamangliangpui lauziu byn ndiakcmei khou patmei kumcna RINGHPOUC ai rui guangna thay mak daek khou Babilonmei nunc ta kaniw tuang kaidai khou rui nthau ganclou puni the. Khou kiu ai rui kadahloumeipu rui kaniw ta sin puni the. Thow ta ai lev kida nina cho? Thow rui ata ntan bauc nina cho? Tabui guangc rui ata thingc ngam nina cho?

⁴⁵Kumhpui zaeng rui ai rui Babilon kaidai ruc khou khatni mi khou bammei nunc ruc khou swlou pw nimei tei nking o. Kaniw nac nunc ta nganvna kathangv pat puni kumna meic kathuicna ping puni the.

⁴⁶Babilon bowkey pwkhou kiu, bowkeymei khwan heidikamv ranvna kandih kapwm kadunh puni the, khatni pingna kauhmei khwan zaatc kapwm chu puni the.”