Read Rongmei Naga JEREMIA 51 Bible Online

JEREMIA 51 - Rongmei Naga bible

JEREMIA 51

¹RINGHPOUC rui sa e, “Ai rui Babilon khatni Babilonmei ruc khou swkamut kamaimei mpwan tiguang puni the.

²Babilonmei ta napgung hunc ganh kumc hunc ganh khang ai rui zaatc baihmei ta Babilon khou thouc guang puni the. Mi ganv kiu guang pwkhou, kabiak kathuic khou rui adow puni kumna mi kandic tei ntou kykuaklou puni.

³Kaniw tuang ricmei nunc ta kaniw saucpai tikaap ri tho, kaniw tuang rihpwan ni tipiu ri tho. Chabwan nunc ta tei nsaekclou dat ri tho! Rihmei kapwm ta tei swkamut kamai tho!

⁴Kaniw tei nzamhna kaniw tuang kaidai guay tuang chaengdai guay khou theiclou puni the.

⁵Isaraelmei khatni Juda ta Ngamparymei RINGHPOUC Ravguangc ai rui kaniw rui Isaraelmei tuang nthanmeipu aruc khou paapc taancna bam sini ganclou mak ge.

⁶Babilon khou rui pak tat tho! Ringh khang pak la tho! Babilonmei tuang paap zaeng rui nangniw theic nangh e. Ntaw ai rui kaniw ruc khou khwm khangc bam the kumna kakhang biuhmei tuang riaploumei taanv hei taanc bam the.

⁷Babilonmei hei abaanc khou sin bammei kachaekc buangc kandih kapwm ta tizangv mbamei buangc kumh tuang e. Zaatc guay rui mi zouc tei zangvna mba the.

⁸Babilon hei thay mak daekna bowkey the kumna swkamut kamai the! Mi khang rui kap tho! Mi zamzei guay khang puc laa tho, kumna hei tei tigaylou dat kho ni nuh e.

⁹Mi khou tei lungc bammei gin nunc rui sa e, ‘Aniw Babilon ta nkhav khang sw khwan e, tiki nyan langv khwan the. Ntaw thu kata ganclou ducna aniu kai thangc tat dat kan di kho. Ravguangc rui Babilonmei ta kangamv patna dandi tii the kumna mi ti hei swkamut kamai mutsutlou the.’ ”

¹⁰RINGHPOUC rui sa e, “Aniu hei nchumh de twna RINGHPOUC rui lyanlou the, aniu Jerusalem thangc tatna ‘RINGHPOUC aniu Racguangc rui taancloumei hei mi thangc tei bammei nunc khou raclou dikho, twna amei nunc rui kauc the.’ ”

¹¹RINGHPOUC rui Mediamei guangc nunc ta katiu thau the, kalam thu kamei rui Babilonmei ta swkamut kamai puni the. Katuang Ravkai tei swkasicmei tuang khwm tei heikumna khangclou puni the. Adow guangmei rihpy nunc rui kumna latdanv tii the, “Nangniw tuang pailu sw ntuk tho! Nangniw tuang nggih guay ni chamdaanv tho.

¹²Babilonmei tuang raengc ta adow gut khang chuanghphey zay thau ti tho. Rigaanv tei titanclou tho! Rigaanvmei nunc lou tho! Nchwanmei nunc ni lou tho!” RINGHPOUC kamei rui Babilonmei nunc ruc khou swlou puni twna samei tei taanclou the.

¹³Mi kandic khou tei duithuak mpeyna nai e khatni lanv mpeyna nai e, tiki katuang ganv luai the, kapanty dan tap nimei ganv tangc the.

¹⁴Ngamparymei RINGHPOUC kamei rui maansei alunkav pang zu Babilonmei ta adow khang thouc guangna kaniw rui rih ngamna kauc puni the twna kapanty ta singna latryan sw the.

¹⁵RINGHPOUC kapumtan rui kandih damclou the; kaningtyng rui mbaanv damclou the kumna tingpuk hei katingh patlou the.

¹⁶Katuang latdanv khou tingpuk ruc thangc naimei dui rah the; kamei rui kandih tin thangc rui muangh phungc guang the. Kamei rui ting ding khou ting tipaliklou the kumna mpwan kai khou rui mpwan tipat the.

¹⁷Mi hu khou hei, maansei hei mpang the khatni kabah thay mak khe; ravmaengc kasiamhmei nunc tei kaniw tuang racmaengc khang zak the, kalam thu kaniw rui kasiamhloumei rav nunc tei nchumh makmei khatni theihmei e.

¹⁸Mi guay tei nsa de; RINGHPOUC rui mi guay ruc khou tei taanv sw pwkhou swkamut kamailou puni the.

¹⁹Jakob tuang Racguangc thu hei tei kumhmei hamh e; kamei hei ramh katana damhmeipu e kumna kamei rui Isaraelmei ta kamei nunc khang kadahlou the. kazanc hei Ngamparymei RINGHPOUC twna kaw e.

²⁰RINGHPOUC rui sa e, “Babilonmei, nang hei atuang tandiak ge, atuang buy-baeng e. Ai rui nang ta piuna zaatc nunc khatni guanghdic guay ta swpiak the,

²¹takuanh nunc khatni takuanh tuanghmei nunc ta sw kasic karouclou the, takuanh gari guay khatni thoumei nunc ta sw kasic the,

²²ntumei nggaanvmei ta swluai the, alauc ta ni gaanvthaih ta ni dow luai the, ntumei nac ta ni nggaanvmei nac ta ni swluai the,

²³lauziu gaenghmei nunc ta ni lauziu nunc ta ni swluai the, lausuakmei nunc khatni kaniw tuang guaituamchic guay ta ni swluai the, dihsinpouc nunc ta ni kaniw tuang saengcdaihmei nunc ta ni swluai the.”

²⁴RINGHPOUC rui sa e, “Babilon khatni kamei nunc ta kaniw rui Jerusalem khou taanclou kanmei khang tei ai rui khwm khangclou nimei tei nangniw how puni.

²⁵Babilon nang hei kandih kapwm ta swkamut kamai ngammei luanghbut kumhmei e, tiki RINGHPOUC ai hei nang ta howmumei di the. Ai rui nang ruc khou abaanc ntyng patna kandih khou kagatc nchamv keylou puni the, kumna mbut ding khou ganclou puni the.

²⁶Nang khou rui swra key kanmei ntauh tei akhat na sini kai sw khang piu dat lak khe. Nang hei tingsaengzaeng ramvkaengvdic kumc bam puni the. RINGHPOUC ai rui sa the.

²⁷“Adow khang chuanghphey zay thau tho! Zaatc nunc rui chukan diu khang bianggun amuan tho! Babilonmei ruc khou rihkey khang zaatc nunc chamdaanv la tho! Adow tho twna Ararat, Minni khatni Askenazmei guanghdic ta sa ti tho. Adowmei khou tei kapy swmei khang kadahlou tho. Takuanh pang tei alunkav pang kumcna nduangh guang tho.

²⁸Babilonmei ruc khou rihkey khang zaatc nunc ta tichamdaanv tho. Mediamei guangh nunc, kaniw tuang kapy swmei nunc, khatni rihpy nunc, khatni kaniw rui sin bammei kandic guay tuang rihmei guay ta kaw guang tho.

²⁹RINGHPOUC kamei rui Babilon ta meic lungh makmei ramvkaengvdic tiswlou nimei latbamv tei kauc pat pwkhou kandic kadunh the khatni kanukc the.

³⁰Babilonmei rihmei nunc tei adow taan the, kaniw tuang rihgaekkai lungc khou bam the. Kaniw bau maek khe, ntumei kumc the. Kaidai tuang raengckat guay tei swra key the, kumna kai guay tei mai raw the.

³¹Babilon kaidai tei kabamv kathuic khou swra gut the twna dinclou khang latpaumei Babilonmei guangc daeng khou akhat tangv akhat pak guang the.

³²Zauczihmei rui duikaan bamv tei laa kan the kumna rihgaekkai guay tei mai nteilou the. Babilonmei ricmei guay tei ping the.

³³Asaanh makna zauczihmei rui kaniw ta dim key puni the kumna laudybamv khou napgoupung nii kumc kaniw ta niibin puni the. Ngamparymei RINGHPOUC, Isaraelmei Racguangc ai rui sa the,”

³⁴Babilonmei guangc rui Jerusalem ta dow keyna tu the. Kamei rui mi kaidai ta laibung sw nsa kumc sw nsa the; kamei rui thaanngangc kumc mi ti hei aluakc the. Kamei rui laa nii niimei laa kan the, kumna baihmei guay tei kaliang ganc kan the.

³⁵“Aniu ruc khou sw kasic karoucmei nwan tei Babilonmei ruc khou keylou di tho!” twna Zaionmei nunc rui sa kan diu. “Aniu ryanra bammei nwan hei Babilonmei ruc khou keylou kan di tho!” twna Jerusalemmei nunc rui sa kan diu.

³⁶Kumhpui zaeng rui RINGHPOUC rui Jerusalemmei nunc khou sa e, “Ai rui nangniw tuang latbamv hei sin thau puni the kumna nangniw ta zauczihmei nunc rui nangniw ruc khou taanclou kanmei phy tei kaniw khou khangclou puni the. Ai rui Babilon tuang duipuakckai sw thiplou puni the kumna kaniw tuang duithuak guay thip puni the.

³⁷Mi kandih tei sw kasic karoucna gancloumei khwan, nwmbangc khouringc nunc bamv sw puni the. Hei tei meic pingmei lwn puni the; Mi khou tei meic gaanv khat na sini bam dat lak khe kumna hei tei howmei guay ping puni the.

³⁸Babilonmei guay tei kamangliangpui nac nunc kumc rah puni the.

³⁹Kaniw ramh agaamvna cho? Ai rui kaniw khang khumngai chamdaanvlou puni kumna kaniw ta tizangvna tineihlalou puni. Kaniw zip puni the kumna zip thau dat pw lak khe.

⁴⁰Lauziu nac, kakui, kachic guay tei dow keymei kumc kaniw ta tidow key puni the. RINGHPOUC ai rui sa the.”

⁴¹Babilon lam khou RINGHPOUC rui sa e: “Kandih kapwm rui thuancna bammei kaidai tei kuaklaa kan the. Zaatc nunc hu khou Babilon hei adih meic pingmei lwn mbaih kan tha!

⁴²Babilonmei ruc khou dui kamuatc guang the kumna kachin karo guangmei duimuat rui liak bin the.

⁴³Kaidai guay tei meic pingmei lwn di the kumna meic gaanv khat na sini lungh makna, tatruan sini tatruanlou makna dui maekmei ramvkaengvdic kumc the.

⁴⁴Ai rui Babilonmei rav Bel ta dandi tii puni the, kumna katuang houc guangloumei puat guay tei tiipat dat puni the; zaatc nunc rui kata kalum dat lak khe. “Babilonmei tuang raengc guay bow kan the.

⁴⁵Isaraelmei nuncle, hei khou tei rui pak tat tho! Alungpuam dai khou rui pak duak khang pak la tho.

⁴⁶Nangniw rui chu kadaimei chamv khou tei rui nangniw bau amaan riu, ping ni ping riu. Mi kandih khou hei abiw adowmei chamv khatni guangh akhat lev guangh akhat adowmei chamv tingkwm pum baic baicna chu guang puni the.

⁴⁷Ai rui Babilonmei tuang ravmaengc nunc ruc khou taanv sw nimei ganv guang pw the. Mi kandic kapwm ta tei zaw tisilou puni the, kumna mi tuang maansei kaguayna ta swluai puni the.

⁴⁸Dihpy thangc rui swmaan khang guangmei nunc baanc khou Babilon tei bowkey pwkhou tingpuk lev kandih khou naimei katana rui neihlana kauc puni.

⁴⁹Babilonmei rui kandih kapwm khou meic nunc ta swluai kan the, kumna ntaw thu Babilonmei bow dat puni the kalam thu kaniw rui Isaraelmei meic heizumei ta swluai the. RINGHPOUC ai rui sa the.”

⁵⁰RINGHPOUC rui Babilon khou bammei kamei nunc khou sa e: “Nangniw theihmei khou rui duak the! Ntaw thu tat tho! Nkhwan bam ri tho! Nangniw kai khou rui ducna tat bam sini, nangniw tuang RINGHPOUC ata kakhanh o, kumna Jerusalem ta ningtow o.

⁵¹Nangniw rui sa e, ‘Aniw ta zaw tisilou the khatni tizaklou the; aniw ramh sw la khang thay dat mak khe kalam thu Ravkai khou nthanmei bamv guay tei zaatc baihmei rui laa kan the,’

⁵²Kumhpui zaeng rui Babilonmei tuang ravmaengc nunc ruc khou taanv sw nimei ganv guang pw the, kumna zamhmei nunc tei kandih kapwm khou kalangh chinh chin bam puni the twna ai rui samei tuang e.

⁵³Babilonmei nunc rui tingpuk kauh thangc kuna khou tei tanhmei rigaekkai sw bam sini kaniw ta tei sw kasic khang ai rui mei nunc ta thouclou puni de. RINGHPOUC ai rui sa the.”

⁵⁴RINGHPOUC rui sa e, “Babilon khou kap bammei khwan tei nking o, mi kandic tei swkamut kamailoumei khang kapna bammei khwan tei.

⁵⁵Ai rui Babilon ta swkamut kamai bam the, kumna mi ti hei ntou rymlou the. Rihmei nunc dui kamuatc kumc chinh chinna adow gut the, kumna kachin karona adow gut the.

⁵⁶Kaniw Babilon ta swmaan khang guang the; Babilonmei rihmei nunc ta nym kan the, khatni kaniw tuang saucpai guay riam bau the. Ai hei simei ta dandi tiimei Racguangc e, kumna Babilonmei khang kaniw khang biuhmei swlou puni.

⁵⁷Ai rui kaniw tuang dihsinpouc nunc— ningtyngmei nunc, kapy nunc, khatni rihmei nunc ta tizangv mba puni the. Kaniw zip puni the kumna zipthau dat zat lak khe. Guangh ai rui sa the, ai hei Ngamparymei RINGHPOUC e.

⁵⁸Tanhmei Babilon tuang raengh guay kandih khou bowkey puni the, khatni katuang kauhmei raengckat guay mai ntei puni the. Zaatc nunc tuang taanv guay hei nsa de; kaniw tuang taanv guay tei maibwang khou chuangc ku the. Ngamparymei RINGHPOUC ai rui sa the.”

⁵⁹Guangh Zedekia ta siamruai swmeipu hei Neria rui puanhmei Maseia tou Serai e. Zedekia rui Judamei guangc swmei tuang padeihmei kwm Seraia tei Zedekia thei Babilon thangc tat the, kumna ai rui kakhou lat asaekc nchamlou the.

⁶⁰Babilon khou kamut kamaimei guang nimei guay khatni Babilon lam khou khatni mi lam guay hei ai rui buk akhat khou hy keylou the.

⁶¹Ai rui Seraia khou kumna salou the, “Nang Babilon khou guang tangc pwkhou, hei khou hyloumei lat guay hei meic nunc khou tei pac ranvna pac tio.

⁶²Khou kiu kumna huayney o, ‘He RINGHPOUC, nang rui mi bamv hei swmaan puni the, kumna mi khou ringhmei khouringc—maansei ni khouringh khounah ni nai dat lak khe; kumna mi hei tingsaengzaeng sypungramv kumc bam puni the twna nang rui sa kan the.’

⁶³Seraiale, nang rui mi hei meic nunc khou tei pac tang pwkhou mi hei ntauhbut khou ntalouna Euphratis Duiriang khou phaickeylou tho,

⁶⁴kumlana kumna sa tho, ‘Babilon khou patlou nimei kiu mi hei the—mi hei dui khou kalimh puni the kumna phuangc thau dat zat ni tuang hamh the, kalam thu RINGHPOUC rui mi ti hei heikumna swmaan puni the.’ ” Jeremia tuang lat mi khou hei rui luailou the.