Read Rongmei Naga JEREMIA 52 Bible Online

JEREMIA 52 - Rongmei Naga bible

JEREMIA 52

¹Zedekia kamei Judamei guangc swmei kwm tei katingkwm 21 the, kumna kamei Jerusalem khou tingkwm 11 guangh swlou khwan e. Kapui zanc rui Hamutal twna kaw e, kamei tei Libna kaidai khou lunghmei Jeremia rui puanhmei e.

²Guangh Jehoiakim rui sw kanmei kumcna Guangh Zedekia tei RINGHPOUC ruc khou paapc taanc khwan e.

³RINGHPOUC rui Jerusalem khatni Judamei nunc ta heidikamv lunghpuamcna kaniw ta kahu khou rui nthau pat the. Zedekia rui Babilonmei guangc Nebukadnezar bangc khou bam lak khe twna liam thau the.

⁴Kum tina Nebukadnezar rui karihmei nunc ta nduanghna Zedekia rui guangh swmei tuang chakiumei kwm ruhmei bw tuang zaeng ruhmei nungc Jerusalem ta adow the. Kaniw rui kaidai paengc khou tei zypuikai kasiamh thaulouna, mi ta tei dingbinmei raengh kasiamh thaulouna,

⁵Zedekia guangh swmei tuang 11mei kwm nganv dingbin the.

⁶Mi kwm tuang padeihmei bw tuang chakiumei tingmik nungc nkowmei tei heidikamv charit gutna tu khang ramh akhat na sini maek khe,

⁷Kumna kaidai raengc tei swra the. Babilonmei rui kaidai tei dingbin bam sini, rihmei guay tei zingbangc pak duak pat the. Kaniw guangh tuang pikwan chaeng biak thangc tei rui patna raengh kanei alamvmei chaengmun khou tei rui pat the, kumna Jordan nzaengc biak thangc pak tat the.

⁸Tiki Babilonmei rihmei nunc rui guangh Zedekia ta nthauna Jeriko daeng khou naimei nzaengc khou kata nym the. Khoutei katuang ricmei nunc rui kata ganclou the.

⁹Zedekia ta tei Guangh Nebukadnezar daeng khou Hamat ramv khou Ribla kaidai khou nduangh guang the, khoutei Nebukadnezar rui karuc khou kalatzan keylou the.

¹⁰Ribla khou Zedekia hu khou kanac mpouh nunc ta swluai the kumna Judamei meicdaihmei nunc ta ni swluai the.

¹¹Mi tangv tei kamei rui Zedekia mikthw lanc patna kangriang ntalouna Babilon thangc zay tat the. Zedekia ta kamei theihmei nganvna kangkai khou bangclou the.

¹²Babilonmei Guangc Nebukadnezar guang swmei tuang tingkwm 19mei tuang panguhmei bw khou zaeng ruhmei nungc guangh tuang latdinhpouc rihpy Nebuzaradan Jerusalem khou gut the.

¹³Kamei rui Ravkai, guanghkai, khatni Jerusalem khou saengcdaihmei kai guay mailou the;

¹⁴kumna katuang ricmei nunc rui kaidai raengc tei swra the.

¹⁵Khoutei Nebuzaradan rui mi kaidai khou ganclou duhmei nunc, bam duhmei baanhthaymei ntumei nunc, khatni Babilonmei khou gutloumei nunc ta Babilon thangc phungc tat the.

¹⁶Khoutei kakai kalau maekmei lungcsi liang liangmei nunc ta tei Juda khou ganclou duc the, kumna kamei rui kaniw ta drakhalau khatni laupuk khou taanvtaanh khang ganclou duc the.

¹⁷Ravkai khou naimei tanzinc tuang tiangdaic khatni guaih gari guay tei tanzinc tuang duiduangc tei lev kazauhna swpuat paruatlou the, kumna kaniw rui tanzinc guay tei Babilon thangc phungc tat kan the.

¹⁸Ravchapaeng sw nthanmei tuang mbut suakkuak guay khatni mbut loumei kuak guay, thauhmai khou sinswmei na guay, khaengmei tuang zei laamei tuang kaikhuang guay, agaw nteimei tuang kuak guay, khatni Ravkai khou piumei tuang baihmei tanzinc tuang na guay tei kaniw rui laa tat kan the.

¹⁹Kachaekc khatni daandi rui kasiamhmei puat guay: tamkuak launa guay, maithyn haenghmei puanc kalwmei kuak guay, khaengmei tuang zei nzuhmei tuang kaikhuang guay, mbut loumei kuak guay, thauhmai tiangc guay, agaw loumei kuak guay, zouhpaanv keymei khou sinswmei kuak guay mi guay hei laa tat kan the.

²⁰Guangh Solomon rui Ravkai khang kasiamhloumei tiangdaic kanei, guaih gari guay, duiduangc daihmei khatni mi ta tei phungc bammei guaituamchic 12 tei karith nthau khang nrit langvna nthau ngam mak khwan e.

²¹Ntiangh kanei tei nchamc e: kanei tei choubuk 18 kauh e khatni kadai ngguicmei rui chowbuk 12 e. Kanei tei kalungc phou e kumna baanhzung padeih nsu e.

²²Kapy ruc khou tei tanzinc pykhim chowbuk panguh kauhmei lou e, khatni hei tei puc-heithai maengc tanzinc riang rui kasiamh nkuaylou e.

²³Kariang langv akhat khou kathai 100 nai e, kumna 96 thu kandih khou rui sini how e.

²⁴Hei guay ruc khou tei rui, rihpy Nebuzaradan rui Tingkuh Seraia, kabangc khou daihmei amuh Zephania, khatni baihmei Ravkai tuang nthukmei meicdaihmei gaanv thumh lev twna kangmei swna nym tat kan the.

²⁵Kaidai lungc khou tei rui rihmei nunc ta phungc bammeipu, guangh tuang latdinhpouc kaidai khou tei bam duhmei gaanv chanei, rihmei nunc tuang chakh sinmei rihpypu ta nkhavmeipu, khatni baihmei nthukmei gaanv 60 ta ni kamei rui nym the.

²⁶Nebuzaradan rui kaniw ta tei Babilonmei guangc daeng khou Hamat tuang ramv khou naimei Ribla kaidai khou nduangh guang the.

²⁷Khoutei guangh rui kaniw ta raina swluai the. Heikumna Judamei nunc ta nym tat the.

²⁸Nebukadnezar rui kangmei swna nym tatmei nunc kiu mi hei the: kamei guanghtumei tuang chaneimei kwm meic 3,023;

²⁹18mei kwm Jerusalem khou rui meic 832;

³⁰khatni 23mei kwm Nebuzaradan rui meic 745 nym tat the. Kaguayna meic 4,600 nym tat tangc the.

³¹Evilmerodak rui kamei Babilonmei guangc swmei kwm Judamei guangc Jehoiakin ta zauc nzianlouna kangkai khou rui mpat patlou dat the. Mi hei Jehoiakin ta kangmei swna nym tatmei tuang 13mei kwm 12mei bw tuang 25mei nungc the.

³²Evilmerodak rui kata nzianna swlouna guangh baihmei nym guangloumei pang khou tiiloumei champouhmei bamv kauh liangmei kakhou tiilou the.

³³Kumna Jehoiakin tei phuimei pwan kalaicna kamei ringh saanv guangh kuakpaeng khou tu nchamc zangv nchamcna lungc kan the.

³⁴Kakhang kage naimei guay khou piu khang kamei ringh saanv tingmik kathuic kaphy tii tanh tan bam khwan e.