Read Rongmei Naga JEREMIA 6 Bible Online

JEREMIA 6 - Rongmei Naga bible

JEREMIA 6

¹Benjaminmei nuncle, duak khang pak la tho! Jerusalem khou rui pakduak la tho! Tekoa khou bianggun amuan tho khatni Beth Hakkerem khou mai daanc tho. Kamut kamaimei khatni sw kasic karoucmei dihpy biak thangc rui key puni the.

²Zaion kaidai hei howgay e, tiki mi ti hei swmaan kan ni the.

³Guangh nunc kaniw tuang ricmei nunc ta nduanghna mi khou tei guang puni the. Kaniw rui mi kaidai khou tei kaniw tuang pheykai sw nkuaylou puni the, kaniw kathuicna kamei kamei rui bam nimei bamv khou tei zypui sw bam puni the.

⁴Kaniw rui kumna sa puni, “Jerusalem ta adow khang chamdaanv tho! Chamdaanv tho! Aniu kalaanv adow puni the!” Tiki kaniw rui kumna sa puni, “Nyan the, tingmik luai kan ni the, tingzyn di the,

⁵Aniu zingbangc rui adow nina di the; aniu rui mi kaidai tuang rihpan guay sw kasic karouclou puni.”

⁶Thingbang gai keyna rilin kasiamh lana Jerusalem ta dingbin tho twna Ngamparymei RINGHPOUC rui mi guangh nunc khou tei latdanv tii kan the. Kamei rui kumna sa the, “Ai rui Jerusalem ta dandi tii puni the, kalam thu mi khou hei sintumei rui padik the.

⁷Duikhunc rui luangc phyn tan bammei kumc Jerusalem ni simei rui phyn tan bam e. Jerusalem kaidai khou tei abiw-adowmei khatni sw kasic karoucmei ta ai chu e; sucnumei khatni zamzeimei rana ai how e.

⁸Jerusalemmei nuncle, mi katuakcmei pat bammei khou hei ramhthay la tho, kum mak ge thei ai rui nangniw ta ganclou puni the; nangniw tuang kaidai hei meic lungh makmei ramvkaengdic ti-mbaihlou puni the.”

⁹Ngamparymei RINGHPOUC rui akhou sa the, “Kathai rei nthan thiakloumei drakhalau kumcna Isaraelmei ti hei kathapc nthan thiakhlou puni the. Kumhpui zaeng rui kaganv naina bam khou nangniw rui kan nuhmei guay ta kan la tho.”

¹⁰Ai rui kumna daw the, “Ai rui kaniw khou sa bam tini thow rui chulou punina cho? Kaniw lung tanc the, kumna nang lat ta nking nii mak khe; nang rui samei lat tei sa pwkhou kaniw nuic the.

¹¹Nang rui kaniw ruc khou puamc bammei lungpuam tei akhou ni chuangcna bam e, He RINGHPOUC, hei tei ai heikumna khaamvlou bam ngam mak khe.” Khoutei RINGHPOUC rui akhou sa e, “Alungpuam tei chaengdai chaengdai khou tat bammei alauc nunc khou tei bun keylou ti tho khatni chabwan nunc kariumei bamv bamv khou tei bun keylou ti tho. Now ta ni gaanv ta ni nym tat puni the, gaanvthaih taruth tutmei ta nganvna nsaekclou lak khe.

¹²Kaniw tuang kai guay meickai khang tii puni the, kaniw tuang laupuk khatni kaniw now guay ta ni tii kan puni the. Mi kandicmei guay ti hei ai rui dandi tii puni the.

¹³Meic kathuicna, daihmei ni nthyammei ni mphuamna syandui laa khang sw the; amuh khatni muhzwng nunc rui nganvna meic nunc ta guat the.

¹⁴Amei nunc tuang zam ti hei nruatc tacloumei tuang na kumcna laa the. Nchu-nzaenghmei, maek takhaanvna ‘Nchu-nzaenghna bam de’ twna kaniw rui sa e.

¹⁵Heikumna, hei kumhmei chanymei taanv taanc bammei khang kaniw meiczak mak dai cho? Kaniw zak zat mak ge; kaniw zak ni zak thay mak ge. Ai rui dandi tii pwkhou, meicdaihmei bow kanmei nunc kumcna kaniw ni bow puni the. Kaniw khang nganvlou nimei kiu mi hei the. RINGHPOUC ai rui mi hei samei tuang the.”

¹⁶RINGHPOUC rui kamei nunc khou sa e, “Chaengkhaak khou dingna zauc o. Reynungc chaengguangc tabui thangc cho, gay liangmei chaeng kiu tabui khou tei cho twmei thanv o. Kumna mi chaeng khou tei tat tho, kum e thei nangniw nchu-nzaenghna lungc puni the.” Tiki kaniw rui sa the, “Aniw kum lak ge!”

¹⁷Kumna bianggun khwan nking khang RINGHPOUC rui rigaanvmei suamclou the. Tiki “Aniw nking lak ge,” twna kaniw sa the.

¹⁸Kum tina RINGHPOUC rui sa e, “Zaatc nuncle, nking o, amei nunc khou tabui pat puni cho twmei zauc o.

¹⁹Mbaanvle, nking o! Ai rui amei nunc ruc khou hei kaniw tuang taanv zaeng rui kamut kamaimei tiguangna dandi tii puni, kalam thu ai rui nchamloumei kaniw laalou mak khe kumna alat piu mak khe.

²⁰Kaniw rui Sheba kandic thangc rui agaw khatni duhmei kandic thangc rui maruai phungc guang bammei ta tei ai kahawna cho? Ai kaniw tuang puatkat tei laalou mak ge khatni kaniw tuang khaengmei tei pianlou mak ge.

²¹Kumna ai rui mi nunc ti hei tiphaysuyna tibow puni, champanv kaining kaigeimei ni theic puni.”

²²RINGHPOUC rui sa e, “Dihpy thangc mei kandih khou rui meic nunc guang the; duh thangc mei tancbauhmei zaat akhat rui rih key khang chamdaanv bam the.

²³Kaniw tuang buy-baeng sinthau kan the; kaniw hei meic nzimei zauzian thay makmei nunc e. Kaniw rui takuanh tuangcna guangmei khwan tei duipui kamuatcmei khwan kumc e. Kaniw Jerusalem ruc khou rih key khang chamdaanvna bam the.”

²⁴Jerusalemmei nunc rui sa the, “Mi chamv tei aniw chu the, aniw baanc zay nzui suy the; nah bam nimeipui kumcna ryanramei khatni suhmei rui padik the.

²⁵Aniu raenghbangc kaamckey bauh mak khe, chaeng khou ni tat bam bauh mak khe, kalam thu zauczihmei nunc buy-baeng sinna bam the, kumna thei-hu pingmei rui padik the.”

²⁶RINGHPOUC rui kamei nunc khou sa e, “Khamseiphey baanvna mbut ding khou liaulu-liaulang tho. Nang nac mpouh akhat namei khang huayna kapmei kumc mikdui lwanlaina huay tho, kalam thu nangniw ta swkamut kamailou khang guangmeipu tei rui thay mak daek khou adow puni the.

²⁷Ntanh ta tabui kumh cho twmei nchanvna zauhmei kumcna, Jeremiale, amei nunc ta nchanv tho.

²⁸Kaniw hei kalung tanhmei meicliammei nunc e, kaniw lung hei tanzinc kumc khatni ntanh kumc tanc e. Kaniw meic guayna si ngam the, ruanna nsuc-nraucmei lat rana sa tat bam e.

²⁹Puksun tei hun ranvna chuangcna bam sini ntanhbav tei nungcna luangc pat mak ge. Amei nunc ta sw nthan pat khang nteina bammei ni nsa de, kalam thu meicsimei nunc ta tei laaganh mak ge.

³⁰Kaniw ta tei gaeng makmei ntanhbav twna kaw puni the, kalam thu RINGHPOUC rui kaniw ta ganc pat the.”