Read Rongmei Naga JEREMIA 7 Bible Online

JEREMIA 7 - Rongmei Naga bible

JEREMIA 7

¹Judamei nunc rui kalum khang gutna bammei Ravkai chaengmun khou RINGHPOUC rui ata thouc guang the.

²Ngamparymei RINGHPOUC Isaraelmei Racguangc rui kaniw khang sa guangmei lat tei mi khou tei dingna meic nunc khou kumna sa o twna sa the:

³“Nangniw tuang lwnlung kheiliak hei kalaic o, nangniw rui taanc bammei taanv guay hei ni kalaic o, kum e thei ai rui nangniw ta mi kandic khou hei tilungclou bam puni.

⁴‘Aniu ramhsw-ramhdaengv lak ge! Mi hei Ravguangc tuang Ravkai de, mi hei Ravguangc tuang Ravkai de,’ twna guatna sa bammei lat tei lwm taan tho.

⁵“Nangniw tuang panty lwnlung hei kalaic o, nangniw rui taanc bammei tei taanc taan tho. Nangniw khat lev khat khou nthanna sw o.

⁶Gin nunc, nruna nunc, khatni swmmaypui nunc ta sintu taan tho. Khuay maekmei ta mi kandic khou hei swluai dat taan tho. Rav baih baihmei ta kalum dat taan tho, kalam thu hei tei rui nangniw ta swkamut kamailou puni the.

⁷Nangniw kalaic pw e thei ai rui nangniw pupouc khou tiiloumei kandic khou hei tilungclou bam puni.

⁸“Zauc lo, meicguatmei lat khou nangniw lwmna bam e.

⁹Nangniw kaihouc e, meicdow e, lungcmaanv lungcmow e, syangdyng swna saraamc e, Baal rav khang khaeng e, khatni nangniw thay bam makmei rav nunc ta kalum e.

¹⁰Nangniw ai rui karaengmei mi taanv guay hei taancna, atuang Ravkai khou, ahu khou dingna ‘Aniw ramhsw-ramhdaengv lak ge,’ twna sa bam e.

¹¹Atuang Ravkai hei kwamtu-kwamzangvmei nunc tuang duppui bamv e twna nangniw ningna cho? Nangniw rui taanc bammei tei ai how the.

¹²Ata kalummei bamv khang ai rui kapahlou reymei bamv Shilo tei tatna zauc o, Isaraelmei amei nunc paap zaeng rui ai rui mi khou tei tabui swlou kan bu cho?

¹³Nangniw rui hei tuang paap guay hei taancna ai rui nangniw khou sa dat sa datna sa bam tisini nangniw chulou nii mak ge. Ai rui kaw pwkhou nangniw daw mak ge.

¹⁴Hei zaeng rui nangniw rui lwmna bammei atuang Ravkai khou hei ai rui Shilo khou swlou kanmei tei kahak swlou puni the. Ai rui nangniw pupouc nunc khou khatni nangniw khou tiiloumei mi bamv khou hei ai rui Shilo khou taanclou kanmei kahak tei taanclou puni.

¹⁵Nangniw chana punav Isaraelmei nunc ta ahu khou rui alay ganc patmei kumc ai rui nangniw ta alay ganc puni. RINGHPOUC ai rui samei tuang e.”

¹⁶RINGHPOUC rui sa e, “Jeremiale, Isaraelmei nunc khang huayney dat ri tho. Kaniw khang kapna huayney dat ri tho; akhou sa dat ri tho, kalam thu nang rui sa bam sini chulou dat lak khe.

¹⁷Kaniw rui Juda tuang kaidai guay khou taanc bammei khatni Jerusalem tuang chaengluang chaengluang khou taanc bammei tei nang how makna cho?

¹⁸Alauc nunc rui thing riam guangna, nggaanvmei nunc rui mai swthauna, khatni ntumei nunc rui ntyanbuay kanina kaniw rui tingkauh Liammavpui twna kawmei ravpui khang kat khang rav baih baihmei khou kaniw rui zouhpaanv keyna khaeng the.

¹⁹Tiki kaniw rui tikabiu bammei kiu kalingna ata cho? Kiuc hamh e, kaniw rana kaniw ta tikabiu bammei tuang e khatni kaniw rana kaniw ta tizak bammei tuang e.

²⁰Hei zaeng rui, Kauh Liangmei RINGHPOUC ai rui alungpuam mi Ravkai ruc khou hei bun key puni the. Ai rui hei tei maansei khou ni, khouringh khou ni, thingbang khou ni, nap-bi khou ni bun keylou puni the. Alungpuam mai hei meic gaanv khat na rui sini swmit dat ngam pw lak khe.

²¹“Amei nuncle, khaengmei puat asaekc thu ravchapaeng ruc khou raw mutsutlou the, khatni baihmei asaekc ta thu tu nuh e twna salou the. Tiki RINGHPOUC ai rui samei thu mi guayna tei nangniw tu nuh e twna samei tuang e.

²²Ai rui nangniw pupouc nunc khou, kaniw ta Izip khou rui kaw patloumei ganv khou tei rawna kat nimei tuang latdanv khatni baih baihmei khaeng nimei tuang latdanv tii kan mak ge.

²³Ai rui kaniw khou latdanv tii kanmei thu, ai rui kaniw tuang Racguangc khatni kaniw rui amei nunc swna bam bam nuh khang alat piu o twna samei tuang de. Kumna kaniw khang ramh guayna gayna lungc bam diu khang ai rui latdanv swna tii kanmei tei piuna lungc bam o twna ai rui kaniw khou kadylou kan the.

²⁴Tiki kaniw rui hei tei piu mak khe, khatni thouh swlou mak khe. Kumna kaniw tuang tanhmei khatni simei lung rui katiu tiumei tei kaniw taanc the. Heikumna kaniw gay khith khitmei phaan khang si hay hay the.

²⁵Nangniw pupouc nunc Izip khou rui tat pat rap khou rui thauna ntaw nganv, ai rui abangc muhzwng nunc ta nangniw khou thouc guang bam e.

²⁶Tiki meic gaanv khat na sini nkinglou mak ge khatni thouh swlou mak ge. Mi phaan tei, nangniw hei nangniw pupouc nunc suangc sini nangniw nu tanc the khatni meicliam the.

²⁷“Kumhpui zaeng rui, Jeremiale, nang rui mi lat guay hei amei nunc khou sa puni, tiki kaniw rui nang lat nkinglou ni tuang hamh e; nang rui kaw bam tisini kaniw dawlou ni tuang hamh e.

²⁸‘Isaraelmei zaat hei RINGHPOUC kaniw Racguangc lat piu mak khe, kaniw ta riap bam tini thay mak ge. Lwm nuhmei twmei hei maek khe, mi lam khou sa sini satow bam dat mak khe,’ twna nang rui kaniw khou sa puni.

²⁹“Kap tho, Jerusalemmei nuncle; nangniw sam tiap ganc tho. Luanghbut luanghbut ruc khou theih lu suan tho, kalam thu RINGHPOUC ai alungpuamc the, kumna amei nunc ta ganc the.

³⁰“Judamei nunc rui simei taanv taanc the. Ai rui karaengmei ravmaengc nunc kaniw rui atuang Ravkai khou gutlouna hei tei swtanac the.

³¹Kaniw rui Hinnom nzaengc khou Tophet twmei ravchabamv kasiamh thauna kaniw nac mpouh aluh nunc ta mi khou tei rawna khaeng the. Hei tei taanc o twna ai rui kaniw khang latdanv tii kan mak ge hei kumhmei hei alungning khou na sini ning pat mak ge.

³²Mi bamv zanc tei Tophet hamh e thei Hinnom nzaengc twna kaw taanna dowluaimei nzaengc twna kaw dat puni the. Amei nunc ta baih khou phuploumei bamv khang maekna mi bamv khou tei phuplou puni the.

³³Kaniw tuang theihmei pumc guay tei nruayna nunc khatni nwmbangc khouringc nunc taek sw puni the, kumna meic gaanv khat na rui sini alay gancloumei nai dat ni tuang hamh the.

³⁴Mi kandic hei meic lungctaekna ganclou puni the. Juda tuang kaidai guay khou khatni Jerusalem tuang chaengluang guay khou neihla zaenggaymei khwan khatni nowsuanhmei tuang neihlamei khwan tichulou dat ni tuang hamh the.