Read Rongmei Naga JEREMIA 8 Bible Online

JEREMIA 8 - Rongmei Naga bible

JEREMIA 8

¹“Mi nungc kiu, guangh nunc tuang rou, Juda tuang meicdaihmei nunc tuang rou, amuh nunc, muhzwng nunc, khatni Jerusalem khou bammei nunc tuang rou kaniw tuang tarou khou rui kalatc pat puni the.

²Kaniw rou tei khuam kaduaina mphumhlou makna kapaengc khou ganclou puni the. Kaniw rui nzianna, kasiamruai swna kaniw chwn thanvna kalum bammei bw, neih, gaanchuangcna guay hu khou kaniw rou tei kaliang ganclou bam puni the.

³Mi si kanmei Isaraelmei zaat kabamv baih baih khou zin phakloumei theic nsaekcloumei nunc tei sini ringc bam nii mak puni the. Ngamparymei RINGHPOUC ai rui sa the.”

⁴RINGHPOUC rui kamei nunc khou sa o twna kumna sa e, “Thowkumhmei rui bow key e thei, kamei ding thau dat makna cho? Thowkumhmei rui chaeng maanv e thei kamei hanc dat makna cho?

⁵Kum e tiki tabui swna amei nunc rui akhou rui tat patna hanc guang dat zat makna tat kan tu cho? Nangniw tuang ravmaengc nunc khou nangniw khuap ntip lana akhou hanc guang dat nii mak khe.

⁶Ai nking mincna nking bam tuang e, tiki nangniw nchumhmei lat sa mak ge. Meic gaanv khat na sini kakhuay khang tei lungh kabiumei tuang maek ge; ‘Ai tabui taanc maanvlou bu cho,’ twna kakhi bammei nangniw meic gaanv khat na sini maek ge. Meic kathuicna kachaeng kachaeng khou takuanh rihbamv khou pak gut kumcna pak gut bam e.

⁷Aluakc rui hanc guang dat nimei ganv thay e; akhouhna nunc, piraengna nunc, khatni aluakc rui kaniw bamv kalaic nimei ganv thayna kalaic e, tiki amei nunc nangniw thu ai rui nangniw ta sin bammei riak tei thay mak ge.

⁸Akumhna nangniw ningtyng e, nangniw atuang latdyn thay e twna sa nina cho? Zauc lo, alatdyn guay tei lungning nthan makmei nunc rui dinc kalaiclou ngam the.

⁹Nangniw tuang ningtyngmei nunc ta tei tizaklou the; kaniw kasuakc kaguakc the kumna phah khou keylou the. Kaniw alat ta laalou mak khe; ntaw thu kaniw khou tabui ningting nai thena cho?

¹⁰Kumna ai rui kaniw tuang laupuk guay tei meic baihmei khang tii puni the khatni kaniw now nunc ta nggaanvmei baihmei khang tii puni the. Meic kathuicna, nthyammei ni daihmei ni nthan makna syandui ntaanv khang sw e. Muhzwng khatni amuh nunc rui nganvna meic nunc ta guat the.

¹¹Meic nunc tuang zamvdai tei nruatc tacloumei na kumcna laa the. Simei naina naina ‘chu-nzaenghmei’ maek takhaanvna ramh sw mak ge, twna kaniw sa the.

¹²Amei nuncle, hei kumhmei chanymei taanv hei taancna zak mak dai cho? Nangniw zak zat mak ge, nangniw zak ni zak thay mak ge. Heikumna meic baihmei bow kanmei tei kumcna nangniw ni bow puni the; ai rui dandi tii pwkhou, hei tei nangniw khang luaimei di the. RINGHPOUC ai rui mi hei samei tuang e.

¹³“Napthai khuam kaduai kumc ai amei nunc ta khuam kaduai nii e; tiki kaniw hei kathai nthai makmei drakhaluai kumc the, kathai maekmei tadut bang kumc the; kanwang nganvna ngguaih the. Hei zaeng rui, kaniw kandic hei kapaengc thangc mei rui laa kan khang ai rui nuhlou the.”

¹⁴Ravguangc mei nunc rui sa e, “Tabui swna aniu ntaw nganvna dungc bam tu cho? Thau tho, raengh raengloumei kaidai guay thangc paklouna khou tei theiclou di kho. RINGHPOUC aniu Racguangc rui aniu ta theic kan diu khang tii pat the, kamei rui aniu khang hu zangv khang tii the, kalam thu aniu karuc khou paapc taanc the.

¹⁵Aniu nchu-nzaenghna lungc dat pwng e khatni tigaylou datmei ganv nai pwng e twna lwmgayna bam e, tiki mi guay tei nsa di the, mi phaan tei ryanramei guang the.

¹⁶Aniu ta zauczihmei nunc rih key khang Dan kaidai khou chamdaanv bam the; kaniw tuang takuanh nunc ra aniu chu the. Kaniw tuang takuanh nunc rah pwkhou kandih kapwm kadunh the. Aniu ta zauczihmei nunc tei aniu tuang kandic, mi khou naimei katana, aniu tuang kaidai guay khatni mi guay khou bammei maansei katana ta swkamut kamailou khang guang the.”

¹⁷RINGHPOUC rui sa e, “Ramhthay la tho! Ai rui nangniw pang khou kakhai tanhmei, swpagui ngam makmei ruigam mpatlou the, kumna hei tei rui nangniw ta nchow puni the.”

¹⁸Azaengsi hei tigaylou dat ngam pw lak khe; alung hei kabiu the.

¹⁹Nking o! “RINGHPOUC Zaion khou bam taan thena cho? Zaionmei guangc hei khou tei bam taan thena cho?” twna amei nunc rui kauc bammei khwan mi kandic kapwm khou ai chu e. RINGHPOUC, kaniw guangc rui kumna daw e, “Tabui swna nangniw ravmaengc kalumna, gaeng makmei rav baih baihmei ta kalumna alung tipuamc bam tu cho?”

²⁰Meic nunc rui kumna kauc the, “Lailum tat kan the, lau ni tay luai the tiki aniu ta thu kanlou mak khe.”

²¹Alung hei bak the, kalam thu amei nunc ta niak puat ngam the; ai azaengsina kap the; alung hei key reih rei the.

²²Gilead khou puc huai maek khena cho? Hei khou tei amuh maek khena cho? Nai e thei tabui swna amei nunc ta tigaylou mak tu cho?