Read Rongmei Naga JEREMIA 9 Bible Online

JEREMIA 9 - Rongmei Naga bible

JEREMIA 9

¹Apy hei mikdui zeic bam khwan e thei, amik hei mikdui duipuakckai bam khwan e thei, swluai kanmei amei nunc khang zingbangc kalaanv kap bam ni tuang e.

²Akhang sypungramv khou bammei bamv nai bam khwan e thei, amei nunc khou rui ai pak tat kan nimei tuang e. kaniw hei lwmnuh makmei, kakandih ta sw kasic bammei nunc e.

³Kaniw saraamh khang kaganv kathuic chamdaanv bam e; nchumhmei rui hamhna saraamhmei rui mi kandic ti hei sin the. RINGHPOUC rui kumna sa e, “Amei nunc hei simei taanv taanc mbu hay hayna taanc bam the, kaniw ata kaniw Racguangc e twna thaylou mak khe.”

⁴Meic kathuicna kapammei ta ramhthay la tho, meic gaanv khat na sini kachana ta nganvna lwmnuh mak khe; kalam thu chana kathuicna Jakob kumcna kachana ta guat the khatni meic kathuicna kapammei ta swkasicna sw the.

⁵Meic kathuicna kachana ta guat the, meic gaanv khat na sini nchumhmei lat sa mak khe, kaniw rui kaniw baley ta saraamhmei lat sa khang nchamlou the; kaniw simei taancna lunghlaic zih the.

⁶Kaniw sintumei khou rui sintu hay hay the, meic guatmei khou rui guat mbu hay hay the, kaniw ata thay nii mak khe, twna RINGHPOUC rui sa e.

⁷Hei zaeng rui Ngamparymei RINGHPOUC rui sa e, “Ai rui amei nunc ta ntanh raw nthan kumc raw nthan puni the, kumna kaniw ta nchanv puni the. Amei nunc rui simei taanv taanc the— ai rui kaniw khou tabui baihmei sw dat khang nai hena cho?

⁸Kaniw tuang baley hei meic theic nimei tuang pailu kumc the; kaniw saraamcna na bam the. Meic kathuicna kakai kainingmei khou latgay sana bam sini kalung khou thu phah zawlouna bam the.

⁹Mi guay khang hei ai kaniw ta riap lakna cho? Hei kumhmei zaat ti hei ai khwm khangclou bam lakna cho? RINGHPOUC ai rui samei tuang e.”

¹⁰Ai rui sa e, “Ai rui chyngbut guay khang huayna kap puni, khouringh byn guay khang huayna kap puni, kalam thu mi guay tei kangc ngam the, mi khou tei meic gaanv khat na sini tatruanlou dat mak khe. Guaih pang khwan ni chu dat mak khe; nruayna khatni khouringh khounah guay ni pak kan the.”

¹¹RINGHPOUC rui kumna sa e, “Jerusalem hei ai rui swkatupctuayna ganclou puni, hei tei asacsi nunc bamv sw puni; Juda tuang kaidai guay tei meic lungh makmei ramvkaengvdic sw puni.”

¹²Ai rui kumna thanv e, “Ringhpoucle, tabui zaeng rui mi kandic hei sw kasic karoucna sypungramv kumcna swlouna meic gaanv khat na sini tatruanlou dat makna bam tu cho? Mi hei thay khang thow khou ningting nai cho? Meic baihmei khou dinclou kadai khang nang rui thow khou mi lam hei dinclou kan tu cho?”

¹³RINGHPOUC rui kumna daw e, “Ai rui dincloumei lat tei amei nunc rui ganhmei zaeng rui mi guay hei pat bammei tuang e. Kaniw alat piu mak ge khatni ai rui kaniw khou samei tei kaniw taanh mak ge.

¹⁴Heikumna kaniw nu tancna kaniw pupouc nunc rui nchamloumei kumcna Baal ravmaengc nunc ta kalum the.

¹⁵Kumhpui zaeng rui, Ngamparymei RINGHPOUC, Isaraelmei Ravguangc ai rui taanc pw nimei hei nking tho: Ai rui amei nunc ta nkhucmei nwang titu puni the khatni khay tizangv puni the.

¹⁶Kaniw kandic tei swkamut kamailou khang ai rui kaniw ruc khou rihmei nunc thouc guang puni the, kumna kaniw khatni kaniw pupouc nunc nganvna thay how makmei zaat pang khou ai rui kaniw ta zin phaklou puni the.”

¹⁷Ngamparymei RINGHPOUC rui kumna sa the, “Patna bammei lam khou hei kakhanh o! Latlumei nunc ta kaw tho, theih lu suanmeipui nunc ta kabai tho.”

¹⁸Meic nunc rui sa the, “Aniu mik hei mikdui padik mak saanv, aniu mikgic hei kap timc ngam mak saanv, theih lu suanlou khang katumcna kaniw ta thouclou tho.”

¹⁹Zaion khou heikumna kauc bammei khwan tei nking o: “Aniu hei mut the! Aniu hei zak the! Aniu kandic hei ganclou puni di the; aniu kai guay swra ngam the.”

²⁰Ai rui kumna sa the, “Meicpui nuncle, RINGHPOUC rui samei nking o, kamei rui samei tei lungh gutlou o. Nangniw nac aluh nunc ta tei latlu khang nchamlou ti tho, nangniw pam nunc khou theih lu suan khang nchamlou ti tho.

²¹Aniu tuang kailat kailat khou theihmei gut the, kumna aniu tuang guangckai guay gut tangc the; hei tei rui alauc nunc ta chaengluang chaengluang khou, chabwan nunc ta kaithyan bamv bamv khou swluai key the.

²²Kabamv kathuicna khou theihmei pumc laupuk khou chaba ganclou kumc, lautaymei nunc rui laathau makna ganclou duhmei napchu guay kumc ganczin ganczalou the. Mi hei sa o twna RINGHPOUC rui akhou salou the.”

²³RINGHPOUC rui kumna sa e, “Ningtyngmei nunc rui kaniw ningting khang, tanhmei nunc rui kaniw pumtan khang, lungcgaymei nunc rui kaniw lanv khou gaengh sw lak nina e.

²⁴Thowkumhmei rui gaengh sw nii e thei, kamei rui ata thaymei khou khatni alam thaymei khou gaengh sw kan diu. Kalam thu ai rui nzianmei hei tingsaengzaeng e, ai thu nchumh-nzihmei taanc e. Mi hei rui ata tineihlalou e. RINGHPOUC ai rui mi hei samei tuang e.”

²⁵Zauclo kapaengc khouna gihruamc bammei nunc ta dandi tii nimei tingmik guay guang pw the twna RINGHPOUC rui sa e.

²⁶Izip, Juda, Edom, Amonmei nunc, Moabmei nunc khatni tazikramv tuang duc liangmei bamv khou lungc bammei nunc mi mei nunc hei gih ruamh makmei nunc e, heikumna Isaraelmei guay ni lungning khou gih ruamh mak khe.