Read Rongmei Naga LATLUMEI 1 Bible Online

LATLUMEI 1 - Rongmei Naga bible

LATLUMEI 1

¹Jerusalem hei adih tazik chikh chik kan tu cho, maansei rui padik bam khwanmei kaidai tei! Kaganv akhat khou kandihmei rui chakhwang champouhna bam khwan e, kamei ntaw thu amaypui kumc the; kaidai guay pang khou kagunc daic liangmei kaidai tei bangh mbaih kan the.

²Kamei kapthangc kapgaanc the; kabiangc khou mikdui luan laina. Kata nzianmei guay rui, kata swmlou dat mak khe. Kaduang guay rui kata guat the, ntaw thu kaniw rui kata howmu the.

³Judamei nunc hei ramh sw la khang maekmei bangc nunc di the, kai khou rui nthau ganclou the. Kaniw ginramdic thangc lungc tat the, kaniw tuang e twna salou nimei bamv maek khe. Zauczihmei guay rui ding haengv the, duak dat nimei chaeng maek khe.

⁴Nthanmei tingmik guay khou ntaw thu kalum khang Ravkai khou meic guang mak khe. Khoutei lu suanmei tunac nunc tei ryanra zaengsi the, khatni amuh nunc tei kahui kasing the. Kaidai raengcmun guay karaeng ding bam the, Zaion hei ryanradai ryanra bam the.

⁵Kata zauczihmei nunc rui ngam the; kaniw rui kata kaniw baanc khou sin the. Kaniw paap heizu geihmei khang rui RINGHPOUC rui kaniw ta tiryanra zaengsilou the; kanah nunc ta tei nym tat ngam kan the.

⁶Jerusalem tuang tik hym guay tei amaan ngam kan the. Kaniw tuang kapy nunc tei ndaapcna kapumtan maekmei, khouringh alaymei nunc hu khou pakna kazaeng maekmei chakhaengv kumc the.

⁷Ntaw thu sw kasic karoucna ganc tazik chiklou the, Jerusalem rui reynungc chingkhiuh tei ningtow e. Kamei zauczihmei baanc khou keylou pwkhou, kata nkhavlou nimei meic maek ge; kaniw ta rihngamloumei nunc rui kaniw bow keymei ta nuic the.

⁸Kagunc kagac guay amaan kan the; kamei hei paliuc the kumna kata mala the. Kamei puihuay the kumna zakna kazaw nkamh the. Jerusalem hei paapcdai taancna karana kata swtanac the.

⁹Katuang tanacmei tei how nthan thiakna how the, tiki guang nimei ryanramei khang tei kamei thouh swlou mak khe. Kamei bow kasicna bow key the; meic gaanv khat na rui sini swmgaylou nimei maek khe. Kata zauczihmei nunc rui ngam the, zauc nzianlou khang RINGHPOUC khou kapna huay e.

¹⁰Kata zauczihmei nunc rui kalanv guay asut ngam kan the. Kaniw tei Ravkai khou gutmei ta kamei how the, zaatc baihmei gut nuh mak ge twna RINGHPOUC rui samei bamv khou tei.

¹¹Kamei nunc tei puihuayna tuzangv khang phu the; kaniw ringc nuh khang kaniw tuang lanv guay taektw khang akhiak the. “RINGHPOUC, ata zauclou o, meic nunc rui ata sinnui sinnuna bammei ata zauclou o,” twna mi kaidai tei rui kauc the.

¹²Tatruanloumei guay khou kamei rui kauc the, “Ata zauclou o!” “Ai suhmei kumc gaanv khat na sini suc khwan lak he, RINGHPOUC rui kalungpuam khou akhou tiguangmei ramsu hei.

¹³“Kamei rui kauh thangc rui mai tii key the, mi mai tei arou nganv raw tangc the. Kamei rui akhang phah zawlou the kumna kandih khou nym keylou the. Kamei rui ata ganclou the, suhmei hei nthaekc mak khe.

¹⁴“Kamei rui apaap guay ta chak the kumna mi guay tei bang kariulou the; kamei rui mi guay tei aguang khou aleilou the, mi rith tei ai phungc ngam mak khe. RINGHPOUC rui ata zauczihmei nunc baanc khou tiilou the, kumna ai kaniw hu khou ramh sw ngam mak khe.

¹⁵“RINGHPOUC rui atuang tanhmei ricmei nunc ta ganc pat the; atuang chabwan nunc ta swluai khang kamei rui rihmei thouc guang the. Kamei rui Juda liuchang ta drakhathai niak kumc niak piak key the.

¹⁶“Hei zaeng rui amik hei mikdui rui luangc lyam the. meic gaanv khat na rui sini ata swmgaylou dat mak khe; meic gaanv khat na rui sini ata tibauc thaulou dat mak khe. Zauczihmei rui ata ngamlou the; amei nunc khang ramhkhat na sini ganclou mak khe.

¹⁷“Ai abaanc haamv pat the, tiki gaanv khat na rui sini nkhavlou mak ge. Ata sw khang RINGHPOUC rui kabamv kathuic khou rui zauczihmei ta kaw guang the; kaniw rui ata tanacmei puat ta kumcna swlou the.

¹⁸“Tiki RINGHPOUC thu nchumh de, kalam thu ai kalat liam the. Ai rui samei nkinglou o, kabamv kathuic khou bammei maansei guayle; ryanrana bammei ati hei zauclou o. Amei tunac nggaanv guay ta tei nymzay tat ngam kan the.

¹⁹“Ai rui champanv khanvloumei nunc ta kaw sini, kaniw rui ata ding kadatna nkhavlou mu the. Amuh nunc khatni kapy nunc ringh khang taektw phuna kaidai chaengluang guay khou theiclou the.

²⁰“He RINGHPOUC, ai ryanra ryanriuna bammei hei zauc lo, abumaengc ryanrana bammei hei! Apaap guay zaeng rui lungh kabiuna alung hei bak the. Chaengluang chaengluang khou dowluai padiklou the; kainung khou nganvna theiclou the.

²¹“Ai rui puihuayna bammei hei nkinglou o; ata swmlou nimei maek ge. Aruc khou kamut kamaimei tiguanglou the twna ata zauczihmei nunc neihla the. Nang rui tiguang nimei tingmik kiu tiguang tho; ata zauczihmei nunc ta ni ata kumcna tiryanralou tho.

²²“Kaniw tuang simei khang tei rui kaniw ta ti-nkhuailou tho; nang rui ata apaap zaeng rui dandi tiimei kumcna kaniw ta ni dandi tiilou o. Ai ryanrana puihuay the, alung kabiu langvna theic key the.”