Read Rongmei Naga LATLUMEI 2 Bible Online

LATLUMEI 2 - Rongmei Naga bible

LATLUMEI 2

¹RINGHPOUC rui kalungpuam khou Zaion ta zinghmei rui gumbinlou the. Isaraelmei tuang tik hym tei kauh thangc rui kandih khou nrou key kumc the, swkamut kamailou the. Kalungpuam khou rui katuang phayba Ravkai ta nganvna ningtowlou mak khe.

²RINGHPOUC rui zauzian maekna Juda tuang kaidai guay swkamut kamai the khatni mi kandic ta gaek bammei rihgaekkai guay tei swra key the. Kamei rui mi guangcdic ta khatni dihsinpouc nunc ta tizaklou the.

³Kalungpuam khou kamei rui Isaraelmei pumtan ta swpuat paruatlou the; zauczihmei guang pwkhou katuang nkhavloumei baanc tei sat gut kan the. Kamei aniu ruc khou mai kumc guang the, ramh guayna kaumutlou the.

⁴Kamei rui aniw ta zauczihmei kumcna katuang sauhpai ngauc pat the; aniw tuang neihla zaenggaymei sw bammei guay ta tei kamei rui swluai the. Jerusalem khou hei mai kumc chuanghmei kalungpuam tei keylou the.

⁵Zauczihmei kumc, RINGHPOUC rui Isaraelmei ta swkamut kamai the; kamei rui Isaraelmei tuang rihgaekkai guay khatni guanghkai guay sw kasic karoucna ganclou the. Kamei rui Judamei nunc ruc khou kanganv maekmei ryanra tiguang the.

⁶Kata kalum bammei Ravkai tei kamei rui siaucpuat paruatlou the; kamei rui nthanmei tingmik guay khatni Sabbath tingmik swmaanlou the. Guangh khou ni amuh nunc khou ni kalungpuam keylou the.

⁷RINGHPOUC rui katuang ravchapaeng ta ganc pat the khatni katuang nthanmei Ravkai ta ganclou duc the; zauczihmei nunc rui raengh tei swra key khang kamei rui nuhlou the. Aniw neihlana kalum bammei bamv khou tei kaniw rihngamna kauc the.

⁸Zaion tuang raengh hei ra nina di the twmei RINGHPOUC rui dinglou tang the; hei tei swmutsutlou khang kamei rui ndath tang the. Rihphaankai khatni raengh tei sw kasic karoucna ganclou bam the.

⁹Raenghkat guay tei pangvbin ngamna ganclou the, kaniw tuang khamvtaan guay swpuat paruatlou the. Guangh khatni saengcdaihmei nunc ta tei ginramdic thangc nym tat kan the. Riakdanv tei nchamlou dat mak khe, muhzwng guay ni RINGHPOUC khou rui ndawman how dat mak khe.

¹⁰Jerusalem tuang gaanvthaih nunc zaengsiphey baanvna kapy khou mbut ruailouna nchwngna kandih khou dungc bam the. Tunac nunc ni kaniw py kandih khou sow changrwnna bam the.

¹¹Kapmei rui amik zingc the; abumaengc hei ryanra the. Amei nunc ta swkamut kamailoumei khang rui zaengsimei rui ai hei lak the. Mi kaidai tuang chaengluang guay khou ngasatna khatni alauc nunc kazaeng maekna punlou the.

¹²Kaniw ndaapc tarina kaniw pui khou kauc bam the; zamh phunghmei kumcna chaengluang khou bow key bam the, kumna kapui nunc pamv khou theiclouna bam the.

¹³He Jerusalem, nzianmei Jerusalem, ai tabui sa ni cho? Akumhna ai nang ta swm nina cho? Meic gaanv khat na sini heikumna ryanra kan mak he. Nang tuang kamut kamaimei hei duipui kumc kanganv maek khe; gay dat pw khang lwm mak khe.

¹⁴Nang tuang muhzwng nunc ni saraamhmei hamhna ramh baihmei sa khang maek khe; kaniw rui dinc bammei tei ni nang paap ndauh pat zat makna kaniw rui nang ta guat bam the. Nang lunghlaih khang kage maek ge twna kaniw rui nang ta tininglou the.

¹⁵Mi kaidai khou tei tatruanloumei nunc rui nangniw ta malana baanh hiw the. Kaniw py kangwm the kumna kasicna ganclou bammei Jerusalem ta nuic the. “Mi hei gay kanmei kaidai kiu tha?” “Mi hei kandihmei rui gaengh sw bammei kaidai kiu tha?”

¹⁶Zauczihmei guay rui nangniw ta sinnui the khatni karaengna nuic the. Kaniw chy malecna, “Aniw rui mi ti hei sw kasic tina the! Aniw nkhwan bammei kiu mi ti hei the!” twna nzina nuic the.

¹⁷RINGHPOUC kamei rui taanclou puni twna sa bammei tei taanclou dyng the. Kamei rui reynungc rui sa guangmei kumcna, kamei rui zauzian nai dat makna sw katupc tuaylou the. Kamei rui zauczihmei nunc khou aniu ruc khou rihngammei tiilou kan the, aniu bow keymei khou kaniw ta tineihlalou kan the.

¹⁸He Jerusalem, nang tuang raengc guay rui RINGHPOUC khou kauc tho! nang mikdui tei zingbangc kalaanv duithuak kumc luangc bam kan diu; zaengsina kapmei rui nang pumc nsuan kan diu tho!

¹⁹Zingbangc saanvsaengh zip nchyang thau dat thau datna RINGHPOUC khou kauc tho; nangniw lung bun pat tho kumna nangniw nac nunc chaengluang chaengluang khou ndaapcna theic bammei nunc khang zauc nzianlou khang kakhou ney tho!

²⁰He RINGHPOUC, zauclou o! nang rui raina bammei nunc ti hei zauclou o! Meicpui nunc rui kaniw rui nzianmei nac nunc zanc tuna bam the! Ravkai kahak khou hei amuh nunc khatni muhzwng nunc ta swluaina bam the!

²¹Alauc ni gaanvthaih ni chaengluang chaengluang khou theiclou bam the, tunac nunc ta ni nggaanv nunc ta ni zauczihmei buy-baeng rui swluai the. Nang lungpuam ganv khou nang rui kaniw ta zauzian maekna dim key the.

²²Khumngai khang, kabai kumc kabamv kathuicna khou rui swkamut kamaimei ta akhou kabai guang the. RINGHPOUC tuang lungpuam nungc meic gaanv khat na sini duak ngam mak ge, ai rui makuat thauna nzianna bammei anac guay ta kaniw rui dowluai ngam the.