Read Rongmei Naga LATLUMEI 3 Bible Online

LATLUMEI 3 - Rongmei Naga bible

LATLUMEI 3

¹Ravguangc rui riaploumei kiu tabui tei cho twmei ai thay the.

²Kamei rui ata zinghmei khou nthau keylou the,

³khatni zauzian maekna bai kaluaih kaluaihna bai the.

⁴Kamei rui ata nringh raamc patlou the, kumna arou guay swbau the.

⁵Kamei rui ata ryanra zaengsimei kangkai khou mbangh binlou the.

⁶Kamei rui ata zinghmei bamv theihmei pang khou tilungclou the.

⁷Kamei rui ata kangriang rui bangclou the; ai hei duak dat khang rigwnmei maekmei kangmei the.

⁸Nkhavlou khang ai kauc ranvna kauc the, tiki Ravguangc rui chulou mak khe;

⁹Kamei rui achaeng guay hei ti nkhuai kalik kalwlou ngam the; ai karihloumei bamv guay khou ntauh raengv rana swlou the.

¹⁰Kamei rui ata chagamh kumcna nchwan the; kamei rui ata kamangliangpui kumcna dupna nchwan the.

¹¹Kamei rui ata chaeng paengc thangc zay pat the, siat puat paruatna ganclou the.

¹²Kamei rui katuang saucpai ngauc patna ata kaap the.

¹³Kamei rui katuang pailu alungthw khou kaap phuplou the.

¹⁴Meic nunc rui ata neihmaryn nuinu bamv sw the; ai hei kaniw guayna khang nuinu lu swna matevna suan the.

¹⁵Kamei rui aruak khou nkhucmei dui laic key the, kumna nkhucmei taektw taekzangv rui abung thi padiklou the.

¹⁶Kamei rui azaw kandih khou karu the kumna tauh ding khou ahu sow bau the.

¹⁷Pumh gaymei, nchu-nzaenghmei khatni neihlamei kiu tabui tei cho ai thay dat mak khe.

¹⁸Aringcting tuang kapaan kaziu hei maan kan the; RINGHPOUC khou rui machunh gaymei maek khe.

¹⁹Atuang sunu, akai alau maekmei lwnlung hei kakhanh pwkhou mi hei akhang khay di the;

²⁰mi ti hei ai taek makna kakhanh tanh tan bam e kumna alung hei nnau key the.

²¹Tiki mi hei ai ningtow pwkhou lwmgaymei guang dat re.

²²RINGHPOUC tuang suai makmei ramzian khatni zauzian hei taek mak ge

²³nang tuang suai makmei zauzian hei lauthwan kathuic kathanc tanh tan e.

²⁴Akhang twmei kiu RINGHPOUC na di the, kumhpui zaeng rui ai kakhou lwm gayna bam ni.

²⁵RINGHPOUC hei kakhou lwmloumei guay khang gay bam e,

²⁶hei zaeng rui akhaengv thayna kamei rui aniu ta kanlou nimei ta nkhwanmei rui gay e

²⁷aniu chabwan khou rui katuang akhaengvsaenghmei tei nchammei gay e.

²⁸Aniu ryanramei khou keylou pwkhou, aniu akhaengv thayna reih reina aniu rana dungc bam nina e;

²⁹aniu kakhou gutlouna nkhum key nina e, kalam thu khou tei nchumhmei nai dat nuh e.

³⁰Bai pwsini, tizak pwsini, aniu hei tei nuhlou nina e.

³¹RINGHPOUC hei zauzian thaymeipu e kumna aniu ta mpatlou suang lak ge.

³²Kamei rui aniu khou ryanramei tiguang nuh e, tiki kamei rui aniu ta taek makna nzian bam e.

³³Kamei rui aniu ta tizaengsilou nii mak ge khatni tisuclou nii mak ge.

³⁴Aniu rui kangkai khou aniu lung bakna bammei tei Poubauhmei rui thay e;

³⁵kamei rui aniu khang tiiloumei dam tei tilaatow makna bammei tei ni kamei thay e;

³⁶latzankai khou nchumhmei sw mak pwkhou, kamei thay e.

³⁷RINGHPOUC rui ningmei na tei pat bammei tuang de.

³⁸Simei ni gaymei ni kalatdanv khou rui pat bammei tuang de.

³⁹Aniu tuang paap zaeng rui aniu ta riap pwkhou tabui swna aniu lat sa dat bam ni thena cho?

⁴⁰Aniu rui tat bammei chaeng tei aniu rana kakhanh kho kumna RINGHPOUC khou guang dat kho.

⁴¹Tingkauh thangc bammei aniu RINGHPOUC khou aniu lung laanc patna kumna kalum kho,

⁴²“Aniu hei paapc taancna nang bangc bam zihna nang ta liam the, kumna RINGHPOUC nang rui aniw ta kuaklou mak khe.

⁴³“Nang rui aniw ta nthauna swluai the; nang lungpuam rui, nang zauzian ta nkamh kan the,

⁴⁴nang lungpuamdai muangc tei nsu langvna aniw ravsuai tat alamv ngam mak khe.

⁴⁵Nang rui aniw ta kandih tuang mphuam tanacmei gancloumei bamv tiswlou the.

⁴⁶“Aniw ta zauczihmei guay rui tizak the khatni sinnui the.

⁴⁷Aniw hei kamut kamaimei khatni sw kasic karoucmei lungcriu the; aniw pingmei rui padikna lungc the.

⁴⁸Amei nunc ta swkamut kamailoumei ta how pwkhou amikdui duithuak kumc luangc the.

⁴⁹“Amikdui hei duithuak kumc luangc taek makna luangc bam puni,

⁵⁰RINGHPOUC rui tingkauh thangc rui zauc keyna howlou mak saanv.

⁵¹Mi kaidai khou ntumei nunc ruc khou pat kanmei ta tei ai how pwkhou alung hei kabiu the.

⁵²“Ata kalam maekna karaeng bammei zauczihmei nunc tei rui ata nruayna ta kumcna phah khou timanclou the.

⁵³Kaniw rui ata nringh khunh khou phaic keylouna ntauh rui symbinlou the.

⁵⁴Aruc khou dui luangclyam guang the, theihmei ana the twna ai kakhanh khwan the.

⁵⁵“Khunh bangc syng thangc tei rui, RINGHPOUC, ai nang ta kauc the,

⁵⁶kumna ai kauc bammei tei chulou na ro twna huay pwkhou, nang rui chulou the.

⁵⁷Nang rui dawlouna ping riu twna salou e.

⁵⁸“He RINGHPOUC, nang rui ata nkhavlou khang guangna Apanty ta kanlou the.

⁵⁹Akhang latzan swlou o; aruc khou nkhuaimei taanclou bammei guay tei nang thay e.

⁶⁰Ata zauczihmei nunc rui akumhna ata karaeng bam cho khatni akumhna kaniw ata sw kasic khang sw bam cho twmei nang thay e.

⁶¹“He RINGHPOUC, kaniw rui ata tizak bammei tei nang chu the; kaniw rui ata sw kasic khang sw bammei guay tei nang thay e.

⁶²Neihmaryn kaniw alam khou tadiu zingc the kumna kaniw tuang sw kasic nimei raeng tei raengcna bam the.

⁶³Lauthwan khou rui thauna zingbangc nganv kaniw ata sinnui the.

⁶⁴“He RINGHPOUC, kaniw tuang taanv khang tei kaniw ta dandi tiilou o;

⁶⁵kaniw ta sianglou o kumna kaniw rui ningmei tiguang tangclou riu!

⁶⁶Kaniw ti hei phu lana kaniw ta kandih nam ruc khou rui phiak ganclou o!”