Read Rongmei Naga LATLUMEI 4 Bible Online

LATLUMEI 4 - Rongmei Naga bible

LATLUMEI 4

¹Aniu tuang karangmei kachaekc kamv kan the; Ravkai tuang ntauh guay chaengluang khou ganczin ganczalou bam the.

²Zaion tuang nggaanv nunc hei aniu khang kachaekc kumc kungc bam khwan e, tiki ntaw thu kaniw ta bihlai khang kumcna ninglou the.

³Angiwkui rui nganvna kanac nunc ta makuat re, tiki amei nunc hei ostrich ruay kumc kanac nunc ta sw kasic the.

⁴Kamei rui kaniw nac nunc ta ndaapc tarina titheic e; alauc nunc rui nap ney bam tisini meic gaanv khat na rui sini tiiloumei maek khe.

⁵Tugay zangvgay tu bammei nunc tei ntaw thu chaengluang chaengluang khou ndaapcna bam the; amanvna khere swna daicthaumei nunc tei mphuam tanacmei gancloumei bamv khou kaniw taek phu tu bam the.

⁶Thay mak daekna Ravguangc baanc khou keylou kanmei Sodommei nunc ta suangc amei nunc ta riap ranv the.

⁷Kaniw tuang guangc nac nunc tei gunh khang suangc khatni guaihnoudui suangc mphwan e, kaniw pumc tei kachaengc ringc khwan e, kaniw lwn tei ntauh Sapphire kumcna gay khwan e.

⁸Ntaw thu kaniw tei chaengluang chaengluang khou meic thaylou makna zip bam the; kaniw gic tei thing kumc kangcna karou khou na thuapna bam the.

⁹Rih hu khou theihmei nunc tei theic nkhamhmei nunc suangc gay e, tu khang zangv khang maekna ndaapc khaengvna theic the.

¹⁰Amei nunc khou kamut kamaimei guangmei tei meic pingmei tuang di the; nzian thaymeipui nunc rui nganvna kanac nunc ta suangc tu the.

¹¹RINGHPOUC rui kalungpuam kapwmna mpat pat the; kamei rui Zaion khou mai ntoulou the kumna mi mai tei rui ntei mutsutlou the.

¹²Jerusalem khou rih keymei gaanv khat na sini katuang raengcmun khou gut ngam pwng e twmei meic gaanv khat na sini lwm mak ge, zauczihmei guay nganvna lwm mak khwan e.

¹³Tiki hei tei pat kan the, kalam thu katuang muhzwng nunc rui paapc taanc the khatni amuh nunc ni kakhuay maekmei ta swluaimei khuay nai the.

¹⁴Katuang kapy swmei nunc miktiatmei nunc kumc chaengdai guay khou ruanna tat bam the, kaniw tei zei rui heidikamv sw mphuam the kumna meic gaanv khat na rui sini kaniw phaybaanc ta kahi ngam mak khe.

¹⁵“Tat kan o! Nangniw hei mphuam the! Ata kahi riu!” twna meic nunc rui kauc the. Kumna kaniw zaatc akhat khou rui akhat khou ruanna tat the, meic gaanv khat na rui sini laalou mak khe.

¹⁶RINGHPOUC rui kaniw ta kadanlou dat mak khe; kamei rui kaniw ta zinphak zinzalou the. Kamei rui aniu tuang amuh nunc khatni kapy swmei nunc ta chakhwang swlou mak khe.

¹⁷Aniu mik anang liat lak mak saanv nkhavlou khang nkhwanna zauc khwan e, tiki hei tei nsa di the, Aniu ta zaatc akhat rui kanlou khang phaengc the tiki nsa di the.

¹⁸Zauczihmei nunc rui aniu ta chaengmun khou nchwan bam the; aniu chaengdai guay khou nganvna tat ngam mak khe; aniu tuang ganv hei luai the; aniu tingmik ta kasing phuc the nganvmei tei guang pw the.

¹⁹Tingpuk thangc rui mouckauh samc keymei suangc katumcna, kaniw rui aniu ta nthau key the. Kaniw rui aniu ta chyngramv khou suic key the; thay mak daek khou kaniw rui aniu ta tazikramv khou nym the.

²⁰Aniu ta tiringclou bammeipu, RINGHPOUC rui kadahloumei guangc, aniu ruc khou suc-rih guangmei guay khou rui kanlou pwng e twna lwm bammeipu ta kaniw rui nym kan the.

²¹Edom khatni Uzmei nuncle, nuic tho: neihla nuh khou neihla la tho. Nangniw ta swkamut kamai nimei ni guang pw the; nangniw zakna zouh mbana kasatc tat bam puni the.

²²Zaion tuang paap phy tei tii kan the; RINGHPOUC rui aniu ta ginramdic thangc bangh swna tilungclou dat lak khe. Tiki, Edomle, RINGHPOUC rui nang ta dandi tii puni; kamei rui nang khuay ndauh pat puni the.