Read Rongmei Naga LATLUMEI 5 Bible Online

LATLUMEI 5 - Rongmei Naga bible

LATLUMEI 5

¹He RINGHPOUC, aniw ruc khou pat kanmei tei ningtowlou o. Aniw ta phaengclou o, aniw zak bammei hei zauclou o.

²Aniw tuang khiukhingh guay hei gin nunc baanc khou nai the; aniw tuang kai guay khou gin nunc rui lungclyn bam the.

³Aniw hei pu maekmei nru-nritna nac nunc, tiswlou the; aniw pui nunc ta swmmay tiswlou the.

⁴Aniw zangv bammei dui manv aniw tii the; dikmei thing ni kamanv tiina liu the.

⁵Aniw ta kuanniam ta kumc khatni guaikuan ta kumc thouc ranvna rairiu the, taanvtaanc ranvna ryanra the, zaengthaekcpui bamv maek khe.

⁶Tu ringc zangv ringh nuh khang rui, aniw Izip khatni Asiria baanc bangc khou gutlou the.

⁷Aniw pupouc nunc tei paapc taanclouna ntaw thu theic tat kan the, kaniw tuang paap zaeng rui aniw ryanra akhaengv bam the.

⁸Bangh kumhmei rui aniw ta sin bam the, kumna kaniw baanc khou rui aniw ta meic gaanv khat na rui sini kanlou dat ngam mak khe.

⁹Meic dowmei nunc tei namv namv khou ruanna tat bam khou nganvna; theic suhmei tei ping makna taektw phu khang tat the.

¹⁰Nap ndaapcna aniw nnau the, aniw pumc hei maimangh kumc kagutc the.

¹¹Zaion chyng kahak khou hei aniw now nunc ta nymna swkasiclou the; Juda tuang namv guayna khou aniw nac aluh nunc ta nymna swkasiclou the.

¹²Aniw tuang kapy nunc ta nym tatna thaengc luai the; aniw tuang gaanvdaih nunc ta chakhwang swlou mak khe.

¹³Aniw tuang chabwan nunc ta bangh ta kumna napriakpaan tiriak the; nggaanv nunc tei thing puat phungcna kasatc kamatcna tat the.

¹⁴Karapouc nunc tei kaitau tow taan the, chabwan nunc ni lu suan bam dat taan the.

¹⁵Neihlamei tumei hei aniu khou rui tat kan the; alaamhmei phaan tei zaengsimei rui lyn the.

¹⁶Guangh pyrun tei aniw py khou rui kathyng key kan the, Aniw khang ryanra zaengsimei the kalam thu aniw paapc taanc the.

¹⁷Aniw lung hei nnau key the, aniw mikdui rui ramh how mak khe,

¹⁸kalam thu Zaion chyng hei sw kasic ngamna gancrymlou the, kumna mi khou tei asacsi nunc rui ruanna bam the.

¹⁹Tiki, he RINGHPOUC, nang hei tingsaengzaengna kin kin khou guangh sw bam puni,

²⁰Tabui swna aniw ta hei saanv ganclou bam tu cho? Nang aniw ta ningtowlou dat puni dai cho?

²¹He RINGHPOUC, aniw ta nang khou phungc guanglou dat ro! Aniw khou reynungc tuang hym tei tiguanglou dat ro.

²²Hamh e thei nang rui aniw ta ganc suanglou ni thena cho? Nang lungpuam hei kanganv maek khena cho?