Read Rongmei Naga EZEKIEL 1 Bible Online

EZEKIEL 1 - Rongmei Naga bible

EZEKIEL 1

¹Tingkwm 30mei padeihmei bw tuang zaeng panguhmei nungc, Buzi rui puanhmei, amuh Ezekiel, ai Babilon kandic khou Kebar duithuak daeng khou meic bangc bam tatmei Jihudimei pang khou lungc bam khwan e. Khoutei tingpuk laanc patlouna Ravguangc ta ai how the.

²(Hei tei Jehoiakin ta bangh zay tatmei tuang panguhmei kwm the.)

³Mi Babilon khou Kebar duithuak daeng khou tei RINGHPOUC rui samei khwan chu the kumna kabaanc tei aruc khou mbaenglou the.

⁴Ai zauc thau pwki dihpy biak thangc rui pwanzingh guangmei ta ai how the. Muangh bangv daihmei khou rui tingpalik patna kadaeng khou naimei tingpuk guay tei gaanc chanh chan the. Tingpalik patmei bamv khou tei tanzinc kumna ramh akhat chanh channa bam khwan e.

⁵Mi pwanzingh chung khou tei maansei kumhmei khouringh padeih how khwan e.

⁶Kaniw guay kaniw zaw padeih padeih khatni kaniw swkaeng padeih padeih nai khwan e.

⁷Kaniw tan tei ntyng dingh ding e khatni kaniw phaypav tei guaituamchic ngianc kumc e. Kaniw tei thaamc palikloumei tanzinc kumcna karang e.

⁸Kaniw kathuicna tei kaniw baanc, maansei baanc kumhmei padeih padeih, kaniw swkaeng bangc khou nai raph nai rap be.

⁹Kaniw tei kaniw swkaeng kanei kanei laamv ntyng pat raph rapna, kaniw swkaeng twan twan tei kahi raph rapna kakwn padeihmei gaeng dinglouna bam e. Kaniw tei tat pwkhou kapang swna, kaniw pumc tei karih kadat pat makna tat re.

¹⁰Kaniw tei gaanv khat khat tuang zaw padeih padeihmei baic baic ngam e: nchungmei rui maansei zaw, baanzat thangc mei rui kamangliangpui zaw, baandau thangc mei rui guaituamchic zaw, khatni kathei thangc rui mouc zaw e.

¹¹Kaniw tuang swkaeng kanei kanei tei zay thauna kaniw daeng khou bammei swkaeng tin tin tei kahi the, kaniw tuang swkaeng kanei tei rui kaniw pumc duamliam the.

¹²Kaniw khat khat tei kakwn padeih khou karihna tat the, kumna kaniw tei tat nii niimei biak thangc karih kadat dat makna tat the.

¹³Mi pang khou tei mairam buangc kumhmei nthaekc makna kalungna pat pat gut gutna bammei ta how e. Mai bwang tei chuangc patna tingpalik kumc pat the.

¹⁴Mi tingpalikmei riw thei tei layna mi khouringc nunc tei samc pat samc gutna bammei ta how e.

¹⁵Ai mi khouringc nunc ta tei zaucna bam khou, ramh haengv padeih, kaniw kathuicna daeng khou akhat akhat kandih khou key kahimei ta how e.

¹⁶Mi haengv padeih tei nchamc ngam de; mi guay tei kamanv kunghmei tauc kumcna gaanc e, kahaengv kathuicna tei kahaengv akhat rui kamc mphaihlou dat re.

¹⁷Kum tina mi haengv guay tei tat nii niimei biak thei-hu, baanzat baandau tat ngam e.

¹⁸Mi haengv guay tei kamik rui duam padik ge.

¹⁹Mi khouringc nunc tei tat ti thei, mi haengv guay tei ni lay tat the, khatni mi khouringc nunc tei kandih khou rui samc ku ti thei, mi haengv guay tei ni lay ku the.

²⁰Mi khouringc nunc tei kaniw rui tat nii niimei biak thangc tat re, kumna mi haengv guay tei lay tat muay e, kalam thu khouringh nunc tei rui mi haengv guay tei sin bammei tuang e.

²¹Kumna khouringh nunc tei kalung pwni, ding pwni, mpwan khou ku pwni, mi haengv tei lay tat the.

²²Khouringh nunc py ruc khou tei palikh likmei ntauh kumhmei rui swmei muangsingc haengv kumhmei nai e.

²³Mi haengv bangc khou tei mi nunc tei kaniw swkaeng laamv ntyng patna khat khat swkaeng tin ta kahi raph rapna khatni kaniw swkaeng kanei rui kaniw pumc duamliam raph rapna dingbam e.

²⁴Kaniw rui samc thau pwmei swkaeng kalaapcmei khwan tei duipui kamuatcmei ra kumc rihmei kangdai khwan kumc, Ngamparymei Ravguangc khwan kumcna chu e. Kaniw tei samc nthaekc e thei kaniw swkaeng tei kadiplou dat the,

²⁵kumna kaniw py ruc khou nai bammei haengv ruc khou rui ramh khwan akhat thu chu patna bam e.

²⁶Mi haengv ruc khou tei saphir tauc rui kasiamhmei guangh bamvpaeng kumhmei akhat how e, kumna mi guangc bamvpaeng ruc khou tei maansei kumhmei gaanv khat dungc bam e.

²⁷Mai chung khou hei tei tanzinc kumcna gaanc bam e. Hei tei ranh ranna gaanc lik sikh sik bam e.

²⁸Mi khou tei muangsingc khou naimei ring guay tei nai e. Hei tei RINGHPOUC bammei tuang riw ndauh patmei tuang e.