Read Rongmei Naga EZEKIEL 10 Bible Online

EZEKIEL 10 - Rongmei Naga bible

EZEKIEL 10

¹Kerubim nunc ruc khou muangsingc haengv kumhmei naimei ruc khou sapphir tauc rui kasiamhmei guangh bamvpaeng kumhmei akhat how khwan e.

²Linen phey piumeipu khou tei Ravguangc rui sa the, “Kerubim nunc bangc khou naimei ramh haengv pang khou tei gutna chuanghmei maithyn nang baanc khou ruai padik pat lana mi maithyn tei mi kaidai khou hei zinliklou tho.” Kamei tat kanmei tei ai zaucna bam khwan e.

³Mipu tei tat gutmei ganv khou tei Kerubim nunc tei Ravkai tuang dihba biak thangc ding bam khwan e, khoutei kalungcmei kaimav tei muangh rui padik khwan e.

⁴RINGHPOUC tuang karangmei riw tei Kerubim nunc khou tei rui thauna Ravkai kaimun thangc tei guang kan the. Khoutei Ravkai tei muangh rui padik the, khatni kaimav tei mi riw tei rui titah ta the.

⁵Kerubim nunc tuang swkaeng kalaapcmei khwan tei kapaengcmei kaimav khou tei nganvna chu pat tangc the. Hei tei Ngamparymei Ravguangc tuang khwan kumcna chu the.

⁶RINGHPOUC rui linen phey piumeipu khou tei Kerubim nunc bangc khou naimei ramh haengv pang khou tei rui mai laa o twna sa ti khou tei, mipu tei gutna ramh haengv akhat daeng khou guang ding the.

⁷Kerubim akhat rui kaniw pang khou nai bammei mai khou tei kabaanc num gutna, maithyn asaekc laa pat lana linen phey piumeipu baanc khou tei tiilou the. Mipu tei maithyn tei laana tat kan the.

⁸Kerubim nunc tei kaniw swkaeng bangc khou maansei baanc kumhmei ai how e.

⁹Kerubim nunc kaniw kathuic daeng khou ramh haengv kalwn nchamc raph rapmei ni how e. Mi haengv guay tei kunghmei tauc kumc gaanc e,

¹⁰kumna kahaengv kathuic tei kahaengv akhat rui kamc ngguic dat raph rap be.

¹¹Kerubim nunc tei kaniw tat nii niimei biak thangc tei karih kadat dat makna tat re. Kaniw rui tat nii niimei biak thangc tei karih dat makna kaniw kapwmna tat nchamcna tat re.

¹²Kaniw pumc, kaniw ting, kaniw baanc, kaniw swkaeng, khatni ramh haengv guay tei kamik rui padik ge.

¹³Mi haengv guay tei ai ndawman khou how reymei pang tei lev nchamc de.

¹⁴Kerubim nunc tei kazaw padeih padeih nai ngam e. Reymei zaw tei guaichic zaw e, kaneimei zaw tei maansei zaw e, kathumhmei tei kamangliangpui zaw e khatni padeihmei tei mouc zaw e.

¹⁵(Mi kerubim nunc tei ai Kebar daeng khou howmei kerubim nunc lev nchamc e.) Kerubim nunc tei rui mpwan khou

¹⁶kuna tat pwkhou ramh haengv guay tei ni kaniw thei lay tat the. Kerubim nunc tei kaniw swkaeng laamv patna samc ti ni mi haengv guay tei kaniw thei lay tat the.

¹⁷Kerubim nunc tei nthaekc ti thei ramh haengv guay tei ni nthaekc the; Kerubim nunc tei samc tat ti thei ramh haengv guay tei kaniw thei lay the, kalam thu Kerubim nunc rui kaniw ta sin bammei tuang e.

¹⁸RINGHPOUC tuang karangmei riw tei Ravkai kaimun khou tei rui pat lana Kerubim nunc ruc khou tei guang kan the.

¹⁹Ai zaucna bam khou kaniw tei kaniw swkaeng laamv ntyng patna kandih khou rui samc ku kan the, kahaengv guay tei ni kaniw tei lev tat kan the. Kaniw Ravkai tuang raenghmun ruc khou matat akhat dinglou the, kumna titah tamei riw tei kaniw ruc khou kumna nai bam khwan e.

²⁰Mi nunc tei Isaraelmei Racguangc bangc khou bammei Kebar Baek paengc khou ai how kanmei Kerubim nunc tei e twmei ai thay e.

²¹Kaniw kathuicna tei kazaw padeih padeih, kaswkaeng padeih padeih, khatni maansei baanc kumhmei kaniw baanc kaniw swkaeng bangc khou nai raph rap be.

²²Kaniw zaw tei ni ai Kebar Baek paengc khou how kanmei zaw tei kahak de. Kaniw tei tat re thei hu biak thangc ntyng dyngna tat re.