Read Rongmei Naga EZEKIEL 11 Bible Online

EZEKIEL 11 - Rongmei Naga bible

EZEKIEL 11

¹Ravguangc tuang bumaengc rui ata puanc thauna Ravkai tuang neihpat raengcmun khou phungc guanglou the. Mi raengcmun daeng khou tei Judamei tuang kapy gaanv nei Azzur nac Jaazania khatni Benaia nac Pelatia kazauhna meic gaanv 25 ta how khwan e.

²Ravguangc rui akhou kumna sa the, “Maansei nacle, meic nunc hei rui simei raeng azuh raengc lana mi kaidai khou simei lat azuh nchamlou the.

³Kaniw rui sa e, ‘Aniu kai sw thau dat nuangc puni de. Mi kaidai hei ganlai kumc the, aniu hei suangc bammei zanc kumc the, tiki aniu ta mi hei rui mai khou changh thu ti raw mak khe.’

⁴Ntaw thu kaniw ruc khou alat kauc patlou ti tho.”

⁵Ravguangc tuang bumaengc akhou gutlouna meic nunc khou sa o twna RINGHPOUC rui akhou mi lat hei sa the: “Isaraelmei nuncle, nangniw rui sa bammei khatni nangniw rui taanc nina sw bammei kaguayna tei ai thay e.

⁶Nangniw rui mi kaidai khou hei meic heizu dow key kan the kumna chaengdai chaengdai guay hei phouh rui padik bam the.

⁷“Hei zaeng rui Kauh Liangmei RINGHPOUC ai rui nangniw khou sa bammei tuang the. Mi kaidai hei kalingna ganlai the, tiki zanh thu tabui tei cho? Nangniw rui swluai kanmei phouh nunc tei the! Nangniw mi kaidai khou hei bam dat ni tuang hamh the, ai rui nangniw ta kapaengc thangc kaliang pat puni the!

⁸Nangniw baengsaeng ta ping bo? Nangniw ta adow khang baengsaeng sinmei nunc ta ai rui thouc guang puni the.

⁹Ai rui nangniw ta kaidai paengc thangc zay pat lana kandih baihmei nunc baanc khou tiilou puni the. Nangniw ta swluai khang ai rui latdanv keylou kan the,

¹⁰heikumna nangniw ta nangniw kandic kahak khou rihbamv khou swluai puni the. Khou kiu ai hei RINGHPOUC dyng e twmei meic kathuicna thay puni.

¹¹Lai rui zanh ta tei mai khou rui gaekloumei kumcna mi kaidai rui thu nangniw ta gaeklou ni tuang hamh e. Nangniw Isaraelmei kandic khou tabui bui bamv khou bam pwni ai rui nangniw ta dandi tii puni.

¹²Ai hei RINGHPOUC e twmei khatni nangniw rui kainingmei zaatc nunc tuang riak ngaek bam khou rui atuang riak sw bak the khatni atuang latdanv guay piu mak khe twmei nangniw thay puni the.”

¹³Ai rui heikumna ravmun dinc bammei dyng khou tei Pelatia theic the. Azaw kandih khou sow nkhum khuakh khuak keyna kumna kauc the, “He Kauh Liangmei RINGHPOUC! Isaraelmei khou nsaekcloumei guay ti hei swluai ngam ni thena cho?”

¹⁴RINGHPOUC rui akhou sa the,

¹⁵“Maansei nacle,” “Jerusalem khou lungc bammei nunc rui nang lam khou khatni meic bangc bam tatmei Isaraelmei nunc lam khou sana bam e. Kaniw rui sa e, ‘Meicbangc bam tat kanmei nunc tei RINGHPOUC daeng khou rui duh thangc tat kan the. Aniu rui mi kandic khou hei kaipouc swna bam khang kamei rui tiilou the.’

¹⁶“Ai rui sa bammei lat guay hei meic bangc bam tatmei Isaraelmei nunc khou sa o. Nangniw ta kandih duh duh thangc thouc gancloumei khatni baih baihmei kandic khou zinphakloumei hei ai rui e. Tiki mi kandih guay khou tei ai kaniw lev bam nchamc kanak puni the.

¹⁷“Kumhpui zaeng rui, Kauh Liangmei RINGHPOUC rui sa bammei hei kaniw khou salou tio. Ai rui kaniw ta zinphakloumei kandic guay khou rui khuam guang dat puni kumna Isaraelmei kandic tei kaniw khou tiilou dat puni.

¹⁸Kaniw rui hanc guang dat pwkhou, mphuammei, chanymei ravmaengc guay tei ganc nina e.

¹⁹Ai rui kaniw khou lungh thanh khatni lungning thanh tiilou puni. Kaniw tuang ntauh kumc tanhmei lung tei laa gancna lat piumei lung tiilou dat puni.

²⁰Khou kiu kaniw atuang latdyn guay piu puni khatni atuang latdanv guay piu chuyna piu puni. Kaniw amei nunc sw puni, khatni ai kaniw Racguangc sw puni.

²¹Tiki mphuammei, chanymei ravmaengc nunc ta kalum niimei nunc ta ai rui dandi tii puni. Kaniw tuang taanv khang tei ai rui dandi tii puni.” Kauh Liangmei RINGHPOUC rui sa the.

²²Kerubim nunc tei samc thau the, kahaengv guay tei lay tat kan the. Ravguangc tuang karangmei riw tei kaniw ruc khou nai e.

²³Mi tangv tei mi titah tamei riw tei mi kaidai ta tei mpatlouna neihpat thangc naimei chyngbut thangc tei tat kan the.

²⁴Mi ndawman khou tei Ravguangc tuang bumaengc rui ata puanc thauna meic bangc bam tatmei bamv Babilon khou phungc guanglou dat the. Mi tangv tei ndawman tei maan kan the.

²⁵RINGHPOUC rui lyanloumei guay tei ai rui meic bangc bam tatmei guay khou tei raclou kan the.