Read Rongmei Naga EZEKIEL 12 Bible Online

EZEKIEL 12 - Rongmei Naga bible

EZEKIEL 12

¹RINGHPOUC rui akhou sa the,

²“Maansei nacle, nang kanu tanhpui mei pang khou lungc bammei tuang e. Kaniw hei mik naina how mak ge, nu naina chu mak ge; kalam thu kaniw hei meicliam the.

³“Maansei nacle, rih pingna pakmei lwn kumcna puatc kasiamh lana zingc key mak khou tatpat tho. Nang kumna tatpatna kabamv baih thangc tat kanmei tei meic kathuicna rui how kan diu. Mi meicliammei nunc tei nang ta thaylou kho ni nuh e.

⁴Kaniw rui nang sw bammei tei how kan diu khang gaanh khou rui meic bangc bam tatmei tuang puat tei kasiamh tho, kumna nang meic bangc bam khang tatpatmei kumcna tatpatmei tei kaniw zaucna bam kan diu.

⁵Kaniw zaucna bam khou nang kai tuang ngaengsaengc tei swphou lana hei khou tei rui nang tuang puat guay tei laa pat tho.

⁶Nang tuang puat tei nang bou khou puanc lana nang mik duamna nang tat nimei bamv how makna tatpatmei tei kaniw zauc bam kan diu. Nang rui sw bammei tei Isaraelmei nunc kaniw ramh thay kan khang swloumei tuang e.”

⁷RINGHPOUC rui samei tei ai taanc the. Mi nungc kalaanv tei rih pingna pak nimei kumcna apuat kasiamh lana tingzyn zingc key pwkhou abaanc rui ngaengsaengc tei thuaicphou lana khou tei tatpat the. Meic mathiuna rui zaucna bam khou, puatc tei abou khou puanc thauna tatpat the.

⁸Nthuanh lauthwan thau dat pwkhou RINGHPOUC rui akhou sa the,

⁹“Maansei nacle, mi kanu tanhmei Isaraelmei nac nunc tei nang sw bammei hei tabui cho twna thanv bam e.

¹⁰Kauh Liangmei RINGHPOUC ai rui kaniw khou sa bammei tuang e twna kaniw khou sa tio. Mi hei Jerusalem ta sin bammei guangh nac khatni mi khou tei bammei meic kaguayna khang e.

¹¹Nang rui sw bammei hei kaniw rui sw pw nimei tei taanc lyanlou bam tuang e twna sa tio—kaniw hei rih pingna pak puni the khatni meic bangc sw puni the.

¹²Kaniw ta sinna bammei guangh nac tei kapuat kabou khou puancna kakhang rui ngaengsaengc khou thuaicphouloumei phoukai khou tei rui zingbangc pak pat puni the. Kamei kamik duam liamna kamei tabui thangc tat bam cho twmei thay ni tuang hamh the.

¹³Tiki ai rui atuang phac laamv ntyng patna khou tei kata timanc puni the. Khou kiu ai rui kata Babilon thangc phungc tat puni the, kumna kamei Babilon ta how makna Babilon khou tei theiclou puni the.

¹⁴Katuang peikai khou bammei meic guayna, katuang ningtyngmei guay khatni kata gaek bammei rihmei guay ta tei ai rui kabamv kathuicna khou zin liklou puni, kumna meic nunc rui buy-baeng sinna kaniw ta nthau puni.

¹⁵“Ai rui kaniw ta guanghdih baih baih thangc zinphaklou pwkhou ai hei RINGHPOUC e twmei kaniw thay puni.

¹⁶Kaniw maansei katitna suc-rih, nkow ndaapcmei, khatni ravpyan hu khou rui duak pat puni, kum pwkhou kaniw zaatc baihmei pang khou bam pwkhou kaniw tuang taanv tei adih karaeng kadang kanmei taanv cho twmei kaniw thay puni kumna ai hei RINGHPOUC dyng e twmei kaniw laalou puni.”

¹⁷RINGHPOUC rui akhou sa the,

¹⁸“Maansei nacle,” “Nang tu pwkhou kadunh o khatni zangv pwkhou pingna kadunh o.

¹⁹Mi hei Kauh Liangmei RINGHPOUC rui Jerusalemmei ntaw nganv kaniw tuang kandic khou lungc bammei nunc khang tii guangmei lat re twna Isaraelmei kapwmna khou tei kumna sa tio: Kaniw kadunhna tu puni the khatni ping kadunhna zangv puni the. Kaniw tuang kandic tei ntou kuak duaklou puni the, kalam thu mi khou bammei kaniw kathuicna tei kariak tat mak khe.

²⁰Ntaw maansei padikna bammei kaidai guay hei sw kamut kamailou puni the, kumna kaniw tuang namv guay tei nwmding guanhlou puni the. Kum pwkhou ai hei RINGHPOUC e twmei kaniw thay puni.”

²¹RINGHPOUC rui akhou sa the,

²²“Maansei nacle, tabui swna ‘kaganv thu tat kan the, dinc kasuakcloumei guay thu guang tangh mak ge’ twna Isaraelmei nunc rui latchap swna sa bam tu cho?

²³Mi lam khou tei Kauh Liangmei RINGHPOUC ai rui sa kanmei tei kaniw khou salou ti tho. Mi latchap tei ai rui ti sa taan puni the. Hei tei Isarael khou sa dat pw lak khe. Kaniw khou kumna sa ti tho: Kaganv kiu guang the, sa kasuakcloumei tei guang tangc the!

²⁴“Isaraelmei pang khou nchumh makmei ndawman howmei khatni zay mbianghmei ravmun dinhmei nai dat lak khe.

²⁵Kauh Liangmei RINGHPOUC ai rui kaniw khou kachuclou puni the, kumna ai rui salou loumei tei taanc puni the. Nzaeng datmei tuang nai dat lak khe. He kanu tanhmei nuncle, ai rui taanc puni twna sa kanmei guay tei nangniw ringc bam khou taanclou puni the. Ai rui sa kan the,” twna Kauh Liangmei RINGHPOUC rui sa the.

²⁶RINGHPOUC rui akhou sa the,

²⁷“Maansei nacle, nang rui howmei ndawman khatni ravmundinc patmei kaguayna hei ducna guang nimei thei thangc rui pat nimei tuang de twna Isaraelmei rui ning e.

²⁸Kumhpui zaeng rui Kauh Liangmei RINGHPOUC ai rui kumna sa the twna sa tio: “Nyan dat ni tu hamh the. Ai rui sa kanmei tei taanc puni the. Kauh Liangmei RINGHPOUC ai rui sa the!”