Read Rongmei Naga EZEKIEL 13 Bible Online

EZEKIEL 13 - Rongmei Naga bible

EZEKIEL 13

¹RINGHPOUC rui akhou heikumna sa guang e,

²“Maansei nacle, kaniw rana kasiamhmei tuang Racguangc rui sa e twna sa bammei Isaraelmei tuang muczwng nunc khou tei ai rui samei lat hei sa o. RINGHPOUC lat hei nking o twna sa o.”

³Kauh Liangmei RINGHPOUC rui samei kiu mi hei e: “Ravguangc rui tihowloumei tuang khatni katiuloumei tuang maekna kaniw rana khou rui dinc bammei mpangmei muhzwng nunc tei sansi e dav!

⁴He Isaraelmei nuncle, nangniw tuang muczwng nunc hei sw kasic karoucna ganclomei kaidai khou bammei asacsi nunc kumc nsa di the.

⁵Kaniw tei raengh pangv keymei bamv guay khou tei ni rigaanv maek khe; raengh pangv keyloumei tei ni kasiamh dat mak khe. Hei zaeng rui RINGHPOUC tuang latzan tingmik khou rih guang pwkhou Isarael ta tei gaek ngam ni tuang hamh the.

⁶Kaniw tuang ndawman guay tei nkhuaimei de, khatni kaniw rui masi-manaengmei swbammei guay tei saraamhmei tuang de. Kaniw tei ai rui kumna sa e twna kauc bam e; tiki kaniw tei ai rui thoucloumei tuang hamh e; tiki kaniw rui sa kanmei lat guay tei guangtangc puni de twna kaniw ding dat re!

⁷Ai rui kaniw khou sa e: Nangniw tuang ndawman guay tei nkhuaimei e, khatni nangniw rui masi-manaengmei swbammei guay tei saraamhmei tuang de. Ai rui sa makmei ta sa e twna kaniw rui sa bam e.”

⁸Kumhpui zaeng rui Kauh Liangmei RINGHPOUC rui kaniw khou sa e, “Nangniw rui saraamhmei lat sana khatni nkhuaimei ndawman manvna bammei zaeng rui, ai rui nangniw ta nuh mak khe.

⁹Nkhuaimei ndawman how bammei khatni saraamcna masi-manaengmei swbammei muczwng nunc nangniw ta ai rui dandi tii puni the. Nangniw amei nunc tuang peikai tiku lak ge; Isarael nac pang khou nangniw zanc chaklou lak e; nangniw hei nangniw kandic khou hanc guang dat ni tuang hamh the. Hei ganv khou kiu ai hei Kauh Liangmei RINGHPOUC dyng e twmei nangniw thay puni.

¹⁰“Suc-rih nai takhaanvna suc-rih maek ge twna sana muhzwng nunc rui amei nunc ta zay laanh bammei zaeng rui, meic nunc rui nliu thiwmei raengh khuanloumei khou tei mi muhzwng nunc tei rui nraeng teyliamlou bammei zaeng rui

¹¹kaniw tuang raengc hei pangv key puni the twna mi muhzwng nunc khou tei sa ti tho. Ai rui ting bun key puni the, nrihthai tii key puni the, khatni pwanzingh rui guang thui puni the.

¹²Kum pwkhou raengh tei pangv key puni the. Khou kiu nraeng teyloumei tei rui tabui gaengmei tuang naina cho twna meic kathuicna rui nangniw khou sa puni the.”

¹³Kumhpui zaeng rui Kauh Liangmei RINGHPOUC rui sa the: “Alungpuam khou pwanzingh tanhmei, nrihthai khatni ting dui bun kumc bun keyna mi raengc tei sw ra khang sw puni the.

¹⁴Kaniw rui nraeng teyloumei raengh tei swra keyna kabamv tei nganvna ra key tangclou puni the. Hei tei pangv keyna nangniw guayna ta swluai puni the. Khou kiu ai hei RINGHPOUC dyng e twmei meic kathuicna thay puni the.

¹⁵“Mi tuang raengc tei nraeng rui kow binlou bammei guay ruc khou tei alungpuam key puni the. Raengh tei khatni hei tei nraeng rui tey mphwanlouna bammei nunc—

¹⁶Jerusalem khou suc-rih naina naina suc-rih maek ge twna sa bammei muhzwng nunc tei amaan kan the! twna ai rui nangniw khou sa puni the.” Kauh Liangmei RINGHPOUC rui sa e.

¹⁷RINGHPOUC rui sa the, “Maansei nacle, kaniw lung khou ning pat patmei tei dinc kasuakcna bammei Isaraelmei ntumei nunc khou tei nang zaw puanc karihlouna ai rui samei kaniw khou sa o.

¹⁸Kauh Liangmei RINGHPOUC rui sa e twna kumna kaniw khou sa o- “Meic gaanv khat ta titheic tiringc khang ngamv naimei tuang the twna baanhtyang khou ntalou khang khatni pykam khang kasiamh patna bammei ntumei nunc tei kaniw san si e dav. Nangniw rui theihmei ringhmei ngamv amei nunc ruc khou sinna nangniw khang gaeng khang, ntaanv ni twna ning e.

¹⁹Sipian baanhkiu akhat na khang rui khatni ntyan paek katit na khang rui amei nunc hu khou nangniw rui azaw sw kasic the. Theih biuh makpui mei ta nangniw titheic the, ringc biuh makpui mei ta tiringc the. Heikumna nangniw amei nunc khou saraamc the, hei tei kaniw lwm the.”

²⁰Hei zaeng rui Kauh Liangmei RINGHPOUC rui sa the: “Theihmei ringhmei ngamv naimei tuang the twna nangniw tuang baanctyang khou ntalou bammei tuang ta tei ai karaeng e. Mi guay tei nangniw baanctyang khou rui rut ganc puni kumna nangniw rui sin bin bammei nunc ta tei mpatlou puni.

²¹Ai rui nangniw tuang pykam guay tei kathangv gancna amei nunc ta tei tingsaengzaeng khang nangniw baanc khou rui tiduaklou puni the. Hei khou kiu ai hei RINGHPOUC e twmei nangniw thay puni.

²²“Ai rui kaniw lung tikabiulou nii makmei meicgaymei nunc ta tei nangniw tuang saraamhmei lat rui kaniw lung titangkhynlou the. Meicsimei nunc tei kaniw tuang simei tei ganc lana kaniw ringc kan nimei tei nangniw rui thingc the.

²³Kumna ntaw thu nangniw tuang nchumh makmei ndawman khatni zay mbianghmei masi-manaengmei guay tei nai dat ni tuang hamh the. Ai hei RINGHPOUC e twmei nangniw thay diu khang rui ai rui amei nunc ta nangniw baanc khou rui kanpatlou kan puni the.”