Read Rongmei Naga EZEKIEL 16 Bible Online

EZEKIEL 16 - Rongmei Naga bible

EZEKIEL 16

²“Maansei nacle,” “Jerusalem khou tei kamei rui taanc bammei chanymei taanv guay tei dinc pat ro.

³Kauh Liangmei RINGHPOUC rui nang khou sa e twna Jerusalem khou kumna sa o: “Nang ti hei Kanaanmei kandic khou rui puanhmei tuang e. Nang pu rui Amormei e, nang pui rui Hittimei e.

⁴Nang ta puanc keylou khou tei, meic gaanv khat na rui sini nang laa riang ruamclou mak ge, dui ni lowlou mak ge, ntey thutlouna phey kaduapcloumei ni maek ge.

⁵Meic gaanv khat na rui sini nang ta nzianna mi guay hei swloumei maek ge. Nang ta puanc keylou khou tei meic gaanv khat na rui sini nzianlou mak ge. Nang ta mpaeng khou kaliang gancloumei tuang de.

⁶“Khoutei ai tat ruan pat pwkhou nang hei zei khou nliauna pandamvna bammei ta how the. Khoutei ai rui nang ta tiringclou the.

⁷Ai rui nang ta kathau gaymei thingbang kumc tithaulou the. Nang hei saengcdaic thauna tunac pha pat the. Khoutei nang pumc tunac paek pat the, samphwng ni phungc the, tiki paliucna bam khwan e.

⁸“Ai tat guang dat pwki, nang hei nzian biuhmei ganv tangc the twmei how the. Ai rui nang paliuc bammei tei aphey rui duamlou the, kumna nang ta nzian the twna ai rui nang khou latdyng swlou the. Ngguay, ai rui nang ta now-gaanv swmei tuang latdyng swlouna nang atuang sw khwan the.” Kauh Liangmei RINGHPOUC rui mi hei sa the.

⁹“Khoutei ai rui nang ta duilow louna zei tei khiu nthanlou the; kumna Olive thauc teylou the.

¹⁰Ai rui nang ta mwn huiloumei pheychuan tipiulou the, linen phey rui nang pykha tiswlou the, guaihgic gaymei rui kasiamhmei phaythuapc tituangclou the, kumna phey ni tibaanvlou the.

¹¹Ai rui nang ta ntuh-ntah tinulou the.

¹²Ai rui nang ta nukwang mwnhaeng, tadip, khatni howgaymei pykhim tipiulou the.

¹³Nang ta daandi kachaekc rui karuhlou khwan e; kumna nang hei mwn huiloumei linen phey khatni sil phey rana nang pwan sw khwan e. Gehu gaymei tuang ntyan, nkhuaihdui khatni Olive thauc rui nang taektw sw khwan e. Nang lwnchav gay khwan the kumna liammav guanh khwan the.

¹⁴Kumna nang lwnchav gay nthuihmei khang tei zaatc kathuicna khou dinc bam khwan the, kalam thu heikumna kasiamh chuyloumei tei ai rui e.” Kauh Liangmei RINGHPOUC rui mi hei sa the.

¹⁵“Tiki nang lwnchav gaymei khatni nang zanc tatmei tei nang rui ariwmei kathuicna lev zip kariu khang kadouchamei tuang swna laa the.

¹⁶Nang tuang phey asaekc rui nang tuang kalummei bamv ta karuh the, kumna mangcsangmeiluc kumcna nang meic kathuicna khang tii the.

¹⁷Ai rui nang khang tiiloumei daandi kachaekc rui nggaanvmei maengc kasiamhna mi lungcmaanv lungcmowmei taanv taanc the.

¹⁸Ai rui nang khang tiiloumei mwn huiloumei phey tei laana mi maengc guay khou tei baanvlou the, kumna ai rui nang khang tiiloumei Olive thauc khatni agaw kat the.

¹⁹Ai rui nang khang taektw gay liangmei gehubuay Olive thauc, khatni nkhuaihdui tiilou the; tiki nang rui mi guay tei ravmaengc khang kat the.” Kauh Liangmei RINGHPOUC rui samei kiu mi hei the.

²⁰“Kumlana nang rui puancloumei anac mpouh, aluh nunc ta tei ravmaengc nunc khang khaeng the. Nang akhang lwm nuh makmei swna lunghmei na rui biuh makna

²¹anac nunc ta tei ravmaengc nunc khang khaeng bam tu cho?

²²Nang mangcsangmeiluc swna chanymei panty khou lungc bam khou tei nang ngana khou pumtang zei ding khou pandamvna bammei ta tei ningtow mak ge.”

²³Kauh Liangmei RINGHPOUC rui sa the, “Nangniw hei mut the! Mut the! Nangniw tuang simei taanv heizumei ruc khou tei

²⁴chaeng paengc chaeng paengc khou ravmaengc kalummei bamv kasiamhlouna nthah-bowlahmei taanv taanc the.

²⁵Nang tuang lwnchav gaymei tei bih ding khou sat kalw the. Meic ariwmei kathuic khang nang pumc zuanclouna nthah-bowlahmei taanv hei tingmik kathuic mbu thau the.

²⁶Nthahmei Izipmei nunc lev zip kariuna nang rui alungpuam tithau the.

²⁷“Kumhpui zaeng rui nang ta dandi tii khang abaanc zay thau the kumna nang khang tii nimei suaihiam tei laa ganc kan puni the. Nangniw ta karaengmei khatni nangniw tuang nthah-bowlahmei taanv ta chany bammei Philistinmei nunc baanc khou ai rui nangniw ta tiipat kan the.

²⁸“Nang rui meic baih baihmei ta ni pian makna Asiriamei thei lay nzwan tat bam e. Nang hei kaniw ramhluhpui di the, tiki kaniw rui ni nang ta tipianlou mak ge.

²⁹Nang hei lanvguanh lanvdaengmei Babilonmei khang ni zuanclouna phungc the, tiki kaniw rui ni nang ta tipianlou mak ge.”

³⁰Kauh Liangmei RINGHPOUC rui sa e: “Nang rui mi guay hei zak thay makmei mangcsangmeiluc kumcna taanc the .

³¹Nang rui chaengdai kathuic khou ravmaengc kalummei bamv kasiamhlouna hei khou tei nthah-bowlahmei taanv taanc the. Tiki kapumc zuanhmei ling kumcna nang hei syandui khang rui hamh e.

³²Nang hei kagaanv ta nzian makna meic baihmei lev lungcmaanv lungcmow tat meipui e.

³³Kapumc zuanhmei nunc thu kamanv laa e, tiki nang thu nang ramhkhangc nunc khang kaipat tiina khatni lanvbiwna kabamv baih baih thangc rui guang khang nthiam e.

³⁴Nang hei kazaat baihmei mangcsangmeiluc e. Meic gaanv khat na rui sini nang ta namna mangcsangmeiluc tisw mak ge. Nang kamanv ni mphang mak ge, nang rui kaniw khang tii de! Ngguay, nang hei kadath datmei e.”

³⁵Hei zaeng rui, he mangcsangmeiluc Jerusalemle, RINGHPOUC rui sa bammei hei nking o.

³⁶Kauh Liangmei RINGHPOUC rui sa e: “Nang tuang pheybaan lwn laic lana mangcsangmeiluc kumcna nang ta nang ramhkhangc nunc khatni chanymei ravmaengc nunc khang tiina, nang nac nunc ta ravmaengc khang khaengna bam e.

³⁷Hei zaeng rui reymei nang ramhkhangc nunc nang rui nzianmei ta ni karaengmei ta ni kaw guang kariu puni. Ai rui kaniw ta nang daeng khou tiding nkuaylouna nang pheybaan luakgancna nang paliucmei tei kaniw how puni the.

³⁸Nang rui lungcmaanv lungcmowna khatni meicbiw meicdowna bammei khuay zaeng rui areic thauna nang ta theihmei dandi tii puni the.

³⁹Ai rui nang ta nang ramhkhangc nunc baanc khou tiipatlou puni the; kumna nang lungcmaanv lungcmow bammei bamv khatni ravmaengc kalum bammei bamv guay tei kaniw rui sw kasic key puni the. Kaniw rui nang tuang pheybaan guay khatni ntuh-ntah guay laa tat kan puni the kumna nang ta paliucna ganclou puni the.

⁴⁰“Kaniw rui meic pang ta kathouh thaulouna nang ta tauhbangv akwam puni the kumna kaniw tuang baengsaeng rui nang ta dim puat paruatlou puni the.

⁴¹Kaniw rui nang tuang kai guay mai ntei key puni the, kumna nang ta dandi tiimei tei meicpui pang rui how puni the. Ai rui nang ta mangcsangmeiluc tisw taan puni the kumna nang ramhkhangc nunc khang nang ta kaipat tii nthaekc puni the.

⁴²Mi tangv tei alungpuam guay luai keyna nchu rih ri key dat puni the. Ai alungpuamc dat lak khe khatni tingsiamh bam dat lak khe.

⁴³Nang ngana bammei douc tei ai rui nang ta akumhna kasiamhlou kan tu cho twmei nang amuc the kumna nang tuang taanv rui alung tipuamc the. Hei zaeng rui ai rui nang tuang taanvphy tiimei tuang the. Nang tuang chanymei taanv guay ruc khou tei rui tabui swna nthah-bowlahmei tuang taanv hei taanc haap bam tu cho?” Kauh Liangmei RINGHPOUC rui sa the.

⁴⁴RINGHPOUC rui sa the, “‘Kanac aluh ni kapui ta luic the’ twmei latchap hei meic nunc rui Jerusalem ta pancna sa bam puni the.

⁴⁵Nang hei kagaanv kanac ta chanymei nang pui nac kazi dyng the. Nang hei kagaanv kanac nunc ta karaengmei nang swanrey nunc kumc the. Nang pui rui Hittimei e, nang pu rui Amormei e.

⁴⁶“Kanac aluh nunc lev twna dihpy thangc bammei Samaria hei nang chaicpui e. Kanah nunc lev twna dihba thangc bammei Sodom hei nang kainacpui e.

⁴⁷Kaney thei lay luaihna tatmei khatni kaney tuang chanymei taanv lay luaihna taanhmei tei pian makna cho? Ngguay, meic thei lay luaihmei rui kapy kampaek daic tat kan the.”

⁴⁸Kauh Liangmei RINGHPOUC rui sa e, “Ai hei ringhmei Ravguangc swmei suai makmei kumcna, nang khatni nang nac aluh nunc rui taanc bammei kumhmei simei hei thu nang kainacpui Sodom khatni kanac aluh nunc rui taanc zat kan mak ge twmei hei suai makmei lat re. Sodom tuang paap kiu mi hei e.

⁴⁹Kamei khatni kanac aluh nunc tei tu khang gaat mak ge khatni suc-rih ping mak ge twna kagaengh sw e, tiki kaniw rui lungcthuy lakmei lungcsimei nunc ta nkhavlou mak ge.

⁵⁰Kaniw hei kaniw nu tanc e khatni daihriw sw e kumna ai rui karaengmei taanv tei taanc e, kumhpui zaeng rui ai rui kaniw ta swmut the twmei nangniw nthanna thay the.

⁵¹“Samaria rui thu nang tuang paapc kapaekna sini taanc tanghmei tuang hamh e. Kamei rui taanhmei khang suangc chanymei tuang taanv nang taanc the. Nang tuang khuay lev kida pwkhou Samaria thu nkhuai makmei kumh tuang de.

⁵²Ntaw thu nang zakmei akhaengv puni the. Nang tuang paapc hei Samaria lev Sodom tuang paapc suangc heidikamv si mbu the twmei thu nang lev kida pwkhou kaney thu khuay maekmei kumh tuang di the, Kumhpui zaeng rui ntaw thu zak tho khatni zawsina akhaengv tho, kalam thu nang khuay rui nang swanrey nei ta nchumhmei tiswlou the.”

⁵³RINGHPOUC rui Jerusalem khou sa the, “Sodom khatni kanac aluh nunc akhat ni Samaria khatni kanac aluh nunc ta ai rui tilungcgay chingkhiuhlou dat puni. Ngguay, ai rui nang ta ni tilungcgay thaulou dat puni.

⁵⁴Nang taanv zaeng khou tei rui nang zak puni the kumna nang zakmei tei rui Samaria lev Sodom khou kaney tei nang suangc gay de twmei lyan puni the.

⁵⁵Kaniw tei lungcgay thau dat puni, kumna nang khatni nang nac aluh nunc ta ni kasiamh thaulou dat puni.

⁵⁶Nang ramhkhe swna bammei douc, nang tuang simei taanv guay tei ndauh pat makmei douc tei nang Sodom ta nsihna nuic kan tu hamhna cho?

⁵⁷Ntaw thu nang hei ni kakumc rap di the Edommei rui, Philistinmei rui, khatni nang ta karaengmei kainingmei guay rui malana nuic bam the.

⁵⁸Nang rui nthah-bowlahmei khatni chanymei tuang taanv taanclou kanmei khang tei nang ryanra nina di the.” RINGHPOUC rui sa the.

⁵⁹Kauh Liangmei RINGHPOUC rui sa e, “Nang tuang taanv theilayna ai nang ruc khou taanv sw puni the, kalam thu nang rui nang lat ta thouhsw makna latdyng tei sw bak the.

⁶⁰Tiki ai thu nang alaucna bammei douc nang khou swlou kanmei latdyng tei ngaek puni, kumna tingsaengzaeng kalaic dat lakmei latdyng nang khou swlou puni.

⁶¹Nang chaicpui khatni nang kainacpui kaney ta tei nang khou tiguanglou dat pwkhou nang tuang taanv nang ningtow puni kumna meiczak puni. Ai rui kaney ta nang nac aluh nei kumc tiswlou puni, tiki mi hei atuang latdyng khou kazauhmei tuang thu hamh e.

⁶²Nang lev anei kak khou latdyng swlou dat puni, kumna ai hei RINGHPOUC e twmei nang thay puni.

⁶³Nang rui taanc nkhuailoumei guay ai rui kuaklou puni, tiki nang rui mi guay tei ningtowna zakmei rui nang mwang hah pat ngam mak puni.” Kauh Liangmei RINGHPOUC rui sa the.