Read Rongmei Naga EZEKIEL 17 Bible Online

EZEKIEL 17 - Rongmei Naga bible

EZEKIEL 17

¹RINGHPOUC rui akhou sa the,

²“Maansei nacle, Isaraelmei khou latgyam akhat raclou o.

³Heikumna sa tio; Kaswkaeng saengc nganvmei, kahiw tei howgaymei mouckauh daihmei akhat Lebanon Chyng khou samc guangna sidar bang twan riam bau lana,

⁴hei tei lanvguanhmei kandic thangc phungc tatna, hei tei lanv guanhmei nunc kaidai khou lou kan the.

⁵Hei tei Isarael khou rui ramh thw akhat laana kaganv kathuicna dui nai tanh tan bammei: kandih gaymei laupuk khou lingclou the.

⁶Mi thw tei drakhaluai thau patna ana niamh niamhna kagaap daicna baanc pat the. Mi chy guay tei mi mouckauh daeng thangc tei baanc ku the. Kumna kamaan rui zangc nthuk key the. Heikumna mi luai tei kachy khatni kanuang padik pat the.

⁷“Kaswkaeng daihmei, kahiw nsu dy dimei daic nganvmei mouckauh akhat ni nai khwan e. Kumna mi drakhaluai tei kamei thau bammei pikwan tei suangc mi mouckauh tei rui dui tiilou geic pwng e twmei ning lana kamaan khatni kachy guay tei mouckauh biak thangc tei baanc pat kan the.

⁸Tiki mi luai tei kandih gaymei, dui gaymei pikwan khou lingclou timei zaeng rui hei tei kachy geicna, kathai nthai geicna daihmei luai swna thau bam e.

⁹“Kauh Liangmei RINGHPOUC ai rui thanv e: Mi drakhaluai hei ringcna kathau gayna thauna bam puni dai cho? Reymei mouckauh tei rui mi ti hei phuai patna, kathai guay nrut ganc ngamna, kachy guay sw tap ngamna titheic pw lak gena cho? Mi ti hei phuai pat khang pumtan azuh gut lak ge hamh e thei tancbauhmei zaat ni kage maek ge.

¹⁰Ngguay, mi hei lingc thu lingclou the, mi hei ringcna kathau gayna thauna bam puni dai cho Neihpat mpwan rui guangna anuai pwkhou mi hei kangc pw lakna cho? Mi hei kamei thau bammei bamv khou hei kangcna ganclou pw lakna cho?”

¹¹RINGHPOUC rui akhou sa the,

¹²“Mi meicliammei nunc hei mi latgyam kabac hei thay dai cho thanv o. Babilonmei guangc Jerusalem khou guangna kaguangh khatni guangh tuang meicdaihmei guay ta Babilon thangc phungc tat the.

¹³Kumlana kamei rui guanghkai kaikhuncmei gaanv khat ta laana, kamei lev latdyng tisw the, kumna guangh kakhou lat piuna lungc bam khang syangdyng tisw the. Mi, guangc tei rui mi kandic tuang kapy swmei maansei nunc ta tei phungc tat the,

¹⁴kalam thu kaniw ruc khou rih thau mak khang khatni swlou kanmei latdyng tei sw, bak mak khang e.

¹⁵Tiki Judamei guangc rui rih thau khang swna takuanh khatni rihmei kangdai phungc guang khang Izip kandic thangc meic thouclou the. Kamei ngam puni dai? Kamei duak ngam puni dai? Kamei rui latdyng tei sw bak lana dandi mphang makna taan pw tu zauc!

¹⁶“Ai hei ringhmei Racguangc e twmei suai makmei kumcna mi guangc tei Babilon khou theihmei suai mak khe, kalam thu kata guangh bamv khou swamcloumei Babilonmei khou kalatdyng sw bak the.

¹⁷Maansei mpeyna panty swmaan key nimei tuang rihlyn khunc chauna kaidai tei dingbin pwkhou Izipmei guangc tuang tancbauhmei rihmei kang rui nganvna kata nkhavlou dat ngam ni tuang hamh the.

¹⁸Kamei rui syangdyng swna swloumei kalatdyng sw bak the. Ntaw thu kamei duak dat ngam lak khe.”

¹⁹Kauh Liangmei RINGHPOUC rui sa e, “Ai hei ringhmei Racguangc e twmei hei suai makmei kumcna kamei azanc khou rui sw kanmei latdyng tei sw bakmei khang tei ai rui kata dandi tii nimei hei suai mak khe.

²⁰Ai rui atuang ramnim chiakc phaic patna kata nym puni the. Kamei rui akhang lwm nuh makmei swmei zaeng rui ai rui kata Babilon thangc phungc tatna dandi tii puni the.

²¹Katuang gay liangmei rihmei nunc ta tei rihbamv khou swluai puni the, kumna theic nsaekcloumei nunc ta tei kandih kaphai kadung khou zinphaklou puni the. Hei khou kiu, RINGHPOUC ai rui salou dyng the twmei nang thay puni the.”

²²Kauh Liangmei RINGHPOUC rui sa e: “Kauhmei sidar bang twan riambau patna, Isarael khou kauh liangmei chyngtwan khou lingclou puni.

²³Hei tei kachy baanc padik patna kathai nthai puni, kumna daihmei sidar bang sw puni the. Nruayna zaat guay hei khou tei guang bam puni; kumna mi swng khou tei duplou puni the.

²⁴Ai hei RINGHPOUC e twmei mi kandic khou thingbang guay rui thay puni. Ai rui kauhmei thingbang guay ta tei dowbau keyna, anamei thingbang ta tithau kauhlou the. Ai rui ndiakcmei thingbang guay titheiclouna, theihmei thingbang ta ti ndiakclou the. RINGHPOUC ai rui sa the. Ai rui taanc ni twna sa kanmei guay tei ai taanc puni.”