Read Rongmei Naga EZEKIEL 18 Bible Online

EZEKIEL 18 - Rongmei Naga bible

EZEKIEL 18

¹RINGHPOUC rui akhou sa the,

²“‘Kapui kapu rui drakhathai khianghmei tu tina kanac nunc nei nkym e,’ twna meic nunc rui Isarael lam khou latchap swna sa bammei hei tabui kabac cho?

³“Ai hei ringhmei Racguangc e twmei hei suai makmei kumcna,” “Nangniw mi latchap hei Isarael khou suai makna sa dat ni tuang hamh the.

⁴Meic kaguayna tuang panty hei atuang e; kapui kapu tuang panty ni, kanac nunc tuang panty ni atuang e. Paapc taanhpui mei tei theic puni.

⁵“Meicgay changhmei, ravchaptatmei khatni lungning nthanmei gaanv khat nai e twna kakhanh kho.

⁶Isaraelmei rui kalum bammei ravmaengc nunc tei kamei kalum mak ge khatni tunu neimei ravmaengc khang khaengmei zanc guay tei tu mak ge. Kamei meickai nownac ta zapzei zinza mak ge khatni ntumei ta nthan makmei ganv khou kahi mak ge.

⁷Kamei rui meic gaanv khat na ta sini guat mak ge, gaanv khat na tuang sini asut laa mak ge. Kakhou ramh pousak khou sindaancloumei puat tei kamei hanclou dat re; kamei rui ndaapcmei ta titu e khatni nsuay-mbaanv khang maekmei ta ti-nsuay mbaanvlou e.

⁸Kamei syanthuay tu mak ge. Kamei simei taanv taanh mak ge khatni latlu naimei bamv khou tei nchumhmei latzan swlou e.

⁹Kamei alatdanv guay piu e khatni alatdyn guay ngaek ge. Kumhmeipu tei ravchaptatmei e, kumna kamei ringc puni.” Kauh Liangmei RINGHPOUC rui sa the.

¹⁰“Mi kumhmeipu nac hei kwamtupui mei meicbiw meicdowpui mei cha pat the.

¹¹Kapu rui taanc zat makmei hei ni taanc the. Tu nu-neimei ravmaengc khang khaengmei zanc tei tu the khatni meickai nownac ta kaamc laan tat the.

¹²Kamei rui lungcsimei ta guat the, asut tu the, kakhou pousakmei nunc rui sindaanloumei puat tei hanclou dat mak khe. Kamei rav baihmei tuang ravkai guay thangc tatna chanymei ravmaengc nunc ta kalum the.

¹³Kamei syanthuay laa tu the. Kamei tei ringc puni dai? Kamei ringc ni tuang hamh e. Kamei hei mi chanymei taanv guay hei taanhmei zaeng rui theic puni. Kazei manv tei karuc khou keylou puni.

¹⁴“Mipu nac hei mpouh gaanv khat nai the twna kakhanh kho. Mi nac tei kapu rui taanc bammei simei guay hei how e tiki kapu thei layluaih mak khe.

¹⁵Isaraelmei rui kalum bammei ravmaengc nunc tei kamei kalum mak ge khatni ravmaengc khang khaengmei zanc tu mak ge. Kamei meickai nownac ta zapzei mak ge.

¹⁶Kamei meic gaanv khat na ta sini sintu mak ge khatni kwamtu mak ge. Kakhou pousakmei nunc rui sindaanloumei puat tei hanclou dat re. Kamei rui ndaapcmei ta titu e khatni pheybaan maekmei khang ti-nsuay mbaanvlou e.

¹⁷Kamei simei taanv taanh mak ge khatni syanthuay laa mak ge. Kamei rui atuang latdanv guay ngaek ge khatni alatdyn guay piu e. Kamei tei kapu paap zaeng rui theic ni tuang hamh e; kamei ringc puni de.

¹⁸Tiki kapu tei thu meicguat the, kwamtu the, kumna meic kathuicna khou simei taanv taanclou the. Kumhpui zaeng rui kapaap zaeng rui kamei theic puni.

¹⁹“Tiki nangniw rui kumna thanv e: tabui swna kapu paap zaeng rui kanac ryanra mak nina? Kalam thu kanac tei thu nchumhmei khatni gaymei taancna lungc e. Kamei rui atuang latdyn guay tei ngaek ge kumna hei tei piu chuyna piu e. Kumhpui zaeng rui kamei tei ringc rap nina e.

²⁰Paapc taanhpui mei tei theic puni. Kanac rui kapu paapc khatni kapu rui kanac paapc phungc kazauh lak ge. Meicgaymei katuang taanv gaymei phy tei mphang puni khatni meicsimei rui katuang simei taanvthai tei laa puni.

²¹“Meicsimei tei rui paapc taanv taanc taan lana atuang latdyn guay hei ngaekna lungc e thei khatni nchumhmei, gaymei taancna lungc dat re thei, kamei ringc puni de.

²²Kapaap kaguay tei kuaklou puni kumna kamei ringc puni, kalam thu kamei nchumhmei tei taanc the.

²³Meicsimei nunc theicna bammei ti hei zaucna ai neihla bam de twna nangniw ningna cho?” twna RINGHPOUC rui sa e. “Kiuc hamh e, lunghlaicna ringc kanmei ta ai laa nii e.

²⁴“Tiki ravchaptatmeipu akhat rui gaymei taanv taanc nganv lana, meicsimeipu rui taanc bammei simei chanymei taanv guay tei taancna lungc dat re thei, kamei tei ringc puni dai? Ringc bam lak ge! Kamei rui taancloumei gaymei taanv guay tei ai ningtowlou dat lak khe. Katuang lwmnuh makmei taanv khatni kapaap guay zaeng rui kamei theic puni.

²⁵“RINGHPOUC rui sa bammei nchumh mak ge, twna nangniw sa e. He lsaraelmei nunc, ai rui samei hei nking o. Ai rui sw bammei thak hei nchumh mak ge twna nangniw ningna cho? Nchumh makmei thu nangniw rui sw bammei thak tei the.

²⁶Ravchaptatmeipu tei rui gaymei taanv tei taanc taan lana simei taanv tei taanc dat re thei, kamei rui simei taanv taanhmei zaeng rui kamei theic puni.

²⁷Meicsimei tei rui paapc taanc taan lana nchumhmei khatni gaymei taancna lungc dat re thei, kamei rui kapanty tei kanlou the.

²⁸Kamei rui sw bammei tei tabui tuang cho twmei thay lana paapc taanc taan e thei, kamei theih makna ringc bam puni.

²⁹‘RINGHPOUC rui sa bammei hei nchumh mak ge’ twna Isaraelmei nangniw rui sa e. Ai rui sw bammei hei nchumh mak ge twna nangniw ningna cho? Nchumh makmei thu nangniw rui sw bammei tei the.

³⁰“Hei zaeng rui, he Isaraelmeile, nangniw meic kathuicna ta kataanv kataanv theilayna ai rui latzan sw puni twna Kauh Liangmei RINGHPOUC ai rui sa tuang the. Nangniw simei taanv taanc bammei khou tei rui hanc guang o. Nangniw tuang paap rui nangniw ta tina swmaan riu.

³¹Nangniw rui taanc bammei simei taanv guay tei ganc key tho, kumna lung thanh phungc dat tho. He Isaraelmeile, nangniw tabui swna theic nina cho?

³²Meic gaanv khat na sini theic kanmei ta ai la nii mak ge,” twna Kauh Liangmei RINGHPOUC rui sa e. “Nangniw tuang paap khou rui tatpatna ringc tho.”