Read Rongmei Naga EZEKIEL 19 Bible Online

EZEKIEL 19 - Rongmei Naga bible

EZEKIEL 19

¹Isaraelmei guangc nei ta latlumei lu suan o twna Ravguangc rui akhou kumna sa e:

²Nang pui tei adih charynmei kamangliangpui bu cho! Nram-nramei kachic pang khou kamei rui kanac nunc makuat thau the.

³Kamei rui kanac akhat ta makuat thauna khouringh nym khang nchamlou the; hei tei maansei tumei kamangliangpui mbaih khwan the.

⁴Zaatc baihmei nunc rui kalam khou tei chu lana kwam phac khou kata nym the. Ntanh khuay goulouna kata Izip thangc zay tat the.

⁵Hei tei how pwkhou kamei rui ningmei tei guangtangc lak khe twmei how the. Kamei rui kanac akhat ta makuat thau dat the. Mi nac tei nram-nramei kamangliangpui makuat pat the.

⁶Hei tei kachic pha pat pwkhou, kamangliangpui chic pang khou tatna kataek phu tat the. Hei tei ni kataek mpah thay the khatni maansei tumei kamangliangpui mbaih the.

⁷Kamei rui rihpan guay swra the kaidai guay sw kasic the. Kamei rui rah pwkhou mi kandic khou bammei guay tei ping khwan the.

⁸Kata adow khang zaatc nunc guang kaduai the; kabamv kathuic khou rui guang kaduai the. Kaniw rui phah zawlouna kata tei nym kan the.

⁹Kaniw rui karaek khou chiplou the, kumna Babilonmei guangc khang phungc guang the. Isarael chyng khou kamei rahmei chu dat mak khang kangkai khou bangclou kan the.

¹⁰Nang pui tei drakha lau khou duithuak daeng khou lingcloumei drakhaluai kumc bam khwan e. Khoutei dui geic timei zaeng rui kachy baanc padik, khatni kathai nthai padik bam khwan e.

¹¹Kachy guay tei tancna guangh tuang dih sin builwang sw nuh bam khwan e. Mi luai tei tingpuk nluai tangc bam khwan e; mi tuang kauhmei twan tei meic kathuicna how bam khwan e.

¹²Tiki hei tei lungpuamcna phuai patna mpaeng khou ganclou khwan the. Kathai guay tei neihpat mpwan rui nliu kangc ngam the. Kachy guay tei bau key ngam the; mi guay tei kangcna mai ntei kan the.

¹³Ntaw thu hei tei dui maekmei tazikramv khou lingclou the.

¹⁴Drakhaluai tei mai raw the; kachy ni kathai ni mai raw ngam the. Kachy guay tei tanc dat ngam lak khe, guangh tuang dih sin builwang sw dat lak khe. Mi hei zaengsimei lu; mi hei suan dat suan datna suan bam e.