Read Rongmei Naga EZEKIEL 2 Bible Online

EZEKIEL 2 - Rongmei Naga bible

EZEKIEL 2

¹Khoutei khwan akhat rui kumna sa guang the, “He maansei nacle, ding thau o! Ai nang khou lat salou puni.”

²Mi khwan tei akhou sana bam khou Ravguangc bumaengc akhou gutlouna ata tiding thaulou the, kumna mi khwan tei rui kumna samei chu dat re,

³“He maansei nacle, ai rui nang ta Isaraelmei nunc khou thouclou puni the. Kaniw rui ata laa zihna akhangv the, ntaw ni kaniw hei kaniw pupouc nunc kumcna hei kum bam muay di he.

⁴Kaniw hei kaniw nu tancna ata thouh sw mak ge. Kauh Liangmei RINGHPOUC ai rui sa nimei lat hei nang rui kaniw khou dinclou khang ai rui nang ta thouc bammei tuang the.

⁵Mi kanu tanhmei nunc tei rui nang rui samei chulou ny chulou mak ny thay mak ge, tiki kaniw pang khou muhzwng nai e twmei thu kaniw thay puni.

⁶“Kum e tiki, maansei nacle, nang rui kaniw ta ping lak nina e, kaniw rui sa nimei tei ni ping riu. Kaniw rui nang ta ramh saklou pw lak ge; nang khang ravga pang khou bam kumc puni the. Tiki kaniw ta ping riu, kaniw lat ta ni rouh riu.

⁷Kaniw nking ny nking mak ny thay mak ge, ai rui kaniw khou sa o twna sa samei tei salou tio. Kaniw hei ata heidikamv liammei nunc e twmei ningtow o.

⁸“Maansei nacle, ai rui samei hei nking o. Kaniw kumcna nang nu tanh riu. Nang mwang hah patna ai rui nang khang tii nimei hei tu o.”

⁹Baanh akhat abiak thangc kathi patmei ta ai how the, kumna mi baanc khou tei latrikzy akhat sin e.

¹⁰Mi baanc tei rui mi zy tei ric pat pwkhou, kanaek kanei khou tei lungh kabiuna kapmei khatni chwnsw puihuaymei tuang hy padiklou bammei ta how the.