Read Rongmei Naga EZEKIEL 20 Bible Online

EZEKIEL 20 - Rongmei Naga bible

EZEKIEL 20

¹Aniu meicbangc bam tatmei tuang chaneimei kwm panguhmei bw tuang zaeng ruhpui neic RINGHPOUC chwn akhou thanv khang Isaraelmei gaanvthaih gaanvsaekc adaeng khou guangna ahu khou dingna bam khwan e.

²Hei dyng khou tei RINGHPOUC rui akhou kumna sa the,

³“Maansei nacle, Kauh Liangmei RINGHPOUC rui sa e twna kaniw khou kumna sa tio: Nangniw akhou ramh thanv khang guang tuang hamhna cho? Ai hei ringhmei Racguangc e twmei suai makmei kumcna, ai rui nangniw ta akhou ramh tithanv lak ge. Kauh Liangmei RINGHPOUC ai rui sa the.

⁴“Maansei nacle, nang rui kaniw ruc, khou latzan sw nina cho? Kum e thei kaniw pupouc nunc rui taanc kanmei chanymei taanv guay tei tiningtow ti tho.

⁵Ai rui sa bammei hei kaniw khou salou ti tho. Ai rui Isarael ta kadahpatpui ganv khou tei ai rui kaniw khou latdyng swlou khwan e. Ai kahak kaniw khou Izip kandic khou tei ndauhlouna kaniw khou kumna salou kan the: Ai hei RINGHPOUC nangniw tuang Racguangc e.

⁶Kaniw ta Izip kandic khou rui laa pat lana kaniw khang rui twna kadahloumei, ramvngu ramvnga kandic khou zay guanglou puni twna hei ganv khou tei ai rui kaniw khou latdyng swlou kan the.

⁷Kaniw rui nzianna bammei ravmaengc nunc tei ganh khang khatni Izipmei tuang nchumh makmei rav nunc rui kaniw ta swtanac mak khang ai rui kaniw khou kadylou kan the, kalam thu ai hei RINGHPOUC kaniw Racguangc e.

⁸Tiki kaniw ata liam the kumna ai rui samei nkinglou nii mak khe. Kaniw tuang chanymei ravmaengc nunc tei kaniw ganh mak ge khatni Izipmei tuang rav nunc ta tei mpat mak ge. Kumhpui zaeng rui Izip kandic kahak khou tei ai rui kaniw ruc khou alungpuam bun key ni the twna ai kakhanh the.

⁹Tiki hei tei rui azanc sw kasic pw nipui zaeng rui ai kaniw ruc khou taanclou nimei tei taanclou kan mak ge, kalam thu ai rui Isaraelmei nunc khou kaniw ta Izip khou rui kawpat puni twna kaniw lev bam bammei meic baihmei nunc hu khou tei ai rui sa patlou kan the.

¹⁰“Kumhpui zaeng rui ai rui kaniw ta Izip khou rui tazikramv khou nduangh pat the.

¹¹Piumei kathuicna rui ringc nimei atuang latdanv kaniw khang tii kan the khatni atuang latdyn nchamlou kan the.

¹²RINGHPOUC ai rui kaniw ta sw nthanlou the twmei kaniw ningtowna bam khang, kaniw lev latdyng swloumei tuang ningtowmei swna Sabbath ngaek khang kaniw khou ai rui tiilou the.

¹³Tiki tazikramv khou tei nganvna ata liam the. Kumna piumei kathuic rui ringc nimei atuang latdyn kaniw sw bak the khatni atuang latdanv ta laalou mak khe. Kaniw rui atuang Sabbath tei swtanac the. Mi tazikramv khou tei kaniw ruc khou alungpuam bun keylouna kaniw ta swmaan ni the twna ning the.

¹⁴Tiki ai rui hei tei swlou kan mak khe kalam thu lsaraelmei ta Izip khou rui ai rui nduangh patmei ta how kanmei zaatc pang khou tei azanc sw kasic nii mak khe.

¹⁵Kumhpui zaeng rui, ai rui kaniw khang tiiloumei kandih gaymei, ramv gaymei kandic khou tei kaniw ta nduangh guanglou mak khe twna ai rui tazikramv khou tei Latdyng swna sa kanmei tuang the,

¹⁶Kalam thu kaniw alatdanv guay ta laalou mak khe, atuang latdyn guay piu mak khe, kumna Sabbath ta swtanac the. Kalam thu kaniw lung tei kaniw tuang ravmaengc khou gutlou ngam the.

¹⁷“Heikum e tiki ai rui kaniw ta zauc nzianlou the. Kumna kaniw ta mi tazikramv khou tei swluailou lak khe twna alung ding the.

¹⁸Khoutei ai rui kaniw nac nunc khou kumna sa kan the: Nangniw pupouc nunc tuang riakdyn tei nangniw ngaek riu: kaniw tuang riak tei nangniw layluaih riu khatni ravmaengc rui nangniw ta swtanac riu.

¹⁹Ai hei RINGHPOUC nangniw tuang Racguangc e. Atuang latdyn khatni atuang latdanv guay tei nangniw piu o.

²⁰Sabbathneic hei nthanna nthaekcmei tingmik sw nina e, kumna hei tei ai rui swloumei latdyng tei tiningtowna RINGHPOUC ai hei nangniw Racguangc e twmei amuc mak khang e.

²¹“Tiki mi meickin tei ni ata liam the. Piumei kathuic rui ringc nimei alatdyn khatni alatdanv guay tei kaniw piu mak khe. Kaniw rui Sabbath ta swtanac the. Mi tazikramv khou tei ai rui alungpuam kaniw ruc khou bun keylouna kaniw ta swluai ni the twna ning the.

²²Tiki ai rui kaniw ta Izip khou rui nduangh patmei ta how kanmei pang khou tei azanc hei sw kasic pwng e twna ningmei zaeng rui ai hei tei swlou kan mak ge .

²³Ai rui kaniw ta kandih kapwmna khou zinphaklou ni the twna mi tazikramv khou tei latdyng akhat sw dat khwan the,

²⁴kalam thu kaniw rui atuang latdanv guay piu mak khe, atuang latdyn guay ngaek mak khe, Sabbath ta swtanac the, khatni kaniw pupouc nunc rui kalum bammei ravmaengc nunc ta tei kaniw kalum the.

²⁵“Hei tangv tei gay raph makmei riak kaniw khang tii the khatni ringc nimei tuang hamhmei latdanv guay kaniw khang tii the.

²⁶Ai rui kaniw ta kaniw tuang ravkhaengmei rui swtanac the, kumna kaniw nac mpouh nareimei ta tikhaeng the. Heikumna ai rui kaniw ta dandi tii the khatni ai hei RINGHPOUC e twmei kaniw khou lyanlou the.

²⁷“Kumhpui zaeng rui, maansei nacle, Kauh Liangmei RINGHPOUC ai rui Isaraelmei khou sa bammei lat hei kaniw khou sa ti tho. Nangniw pupouc nunc ruina ai lwmnuh makmei taanv taancna ata guat tumei kiu mi the.

²⁸Ai rui kaniw khang tii ni twna nrianhloumei kandic khou tei phungc guanglou pwkhou, kaniw rui chyngbut kauh kauhmei khatni thingbang ndiakc diakcmei how pwkhou kaniw rui hei kumhmei bamv guay khou tei ravkhaeng the. Kaniw rui mai rawna khaeng bammei, kaniw rui drakhadui khaeng bammei hei guay tei rui alung tipuamc the.

²⁹Khoutei ai rui kaniw khou kumna thanv the: Nangniw rui tat bammei kauhmei bamv guay hei tabui bamv cho? Kumna khou tei rui thauna ‘Kauhmei Bamv’ twna kaw bam tuang e.

³⁰Kumhpui zaeng rui, Kauh Liangmei RINGHPOUC rui sa bammei hei Isaraelmei nunc khou tei sa ti tho: Nangniw pupouc nunc rui taanc kanmei paap tei tabui swna nangniw taanc kaluaih bam tu cho khatni tabui swna kaniw tuang ravmaengc nunc thei tei lay tat bam tu cho?

³¹Aseic nganvna nangniw hei tei kumcna kat bam e khatni nangniw nac nunc ta mi racmaengc nunc khang tei rawna katna mi ravmaengh nunc tei rui nangniw ta swtanac bam e. Kum bam nganv lana, Isaraelmei nangniw hei achwn thanv khang guang dat tu he cho! Ai hei ringhmei Racguangc swmei suai makmei kumcna nangniw ta akhou ramh akhat na sini tithanv lak ge.

³²Thingbang tauhbut ta karav swna kalum bammei, kandih baih baih thangc lungc bammei zaatc baihmei nunc tei kumc nana nangniw lungning khou ning the. Tiki hei tei tabui nungc na sini guang tangc ni tuang hamh e.

³³“Angamv sin swna ai rui ranvna nangniw ta sin puni the twmei hei ai ringhmei Ravguangc swmei suai makmei kumcna suai dat lakmei lat re.

³⁴Nangniw ta zinphakloumei kandic guay khou rui khuam kaduai datna phungc guang datpui ganv khou kiu ai rui nangniw khou atik khatni alungpuam lyanlou puni.

³⁵Ai rui nangniw ta zaatc nunc tuang tazikramv khou kaw guangna nangniw zaw puanc adyangna nangniw ta ai rui latzan sw puni the.

³⁶Ai rui nangniw pupouc nunc ta Sinai tuang tazikramv khou latzan sw kanmei kumcna khou kiu ai rui nangniw ta latzan sw puni the,” twna Kauh Liangmei RINGHPOUC rui sa the.

³⁷“Ai rui builwang sinna nangniw ta gaengc puni the kumna atuang latdyng tipiu puni the.

³⁸Ata liammei khatni paapcmei nunc ta tei ai rui nangniw pang khou rui laa ganc puni. Kaniw ti hei ntaw kaniw lungc bammei kandic khou rui laa pat puni tiki kaniw ta Isarael kandic khou tihanc guang dat lak ge. Khou kiu ai hei RINGHPOUC e twmei nangniw thay puni.”

³⁹Kauh Liangmei RINGHPOUC rui sa the, “He Isaraelmei guayle, ntaw mu nangniw ta tipian la tho! Nangniw tuang racmaengc nunc ta kiuc kalumna lungc raph tho! Mi tangv tho nangniw alat piu mak ngam makna piu puni khatni nangniw tuang ravmaengc nunc khou tei kaipat tiina azanc ta chakhwang sw makna bammei tei nthaekc puni.

⁴⁰Kalam thu mi kandih khou hei, atuang nthanmei chyngbut khou, Isarael tuang kawmei ravbamv but ruc khou, Isaraelmei nangniw kaguayna ata kalum puni. Khou kiu ai rui nangniw ta laalou dat puni. Mi ganv khou kiu nangniw tuang puatkat, nangniw tuang gay liangmei puatkat guay, khatni nangniw tuang nthanmei kaipat guay tei tiguangmei ta machunh puni the.

⁴¹Nangniw ta zinphakloumei kandic guay khou rui ai rui kawpat datna nangniw ta khuam kaduailou datpui ganv khou kiu nangniw rui mai rawna khaengmei puatkat tei ai rui laalou dat puni, khou kiu ai hei nthanmei e twmei zaatc nunc rui how puni.

⁴²Ai rui nangniw pupouc nunc khou kaniw khang tii ni twna nrianhloumei Isarael kandic khou nangniw ta ai rui phungc guanglou dat pwkhou ai hei RINGHPOUC dyng e twmei nangniw thay puni.

⁴³Khou kiu nangniw tuang kheiliak khatni nangniw ta swtanacmei nangniw tuang taanv guay nangniw rana ningtowna hei kumhmei simei taanv guay zaeng khou tei rui nangniw rana nangniw ta karaeng puni the.

⁴⁴Nangniw tuang gay makmei, simei taanv guay ta tei hamhna azanc hei sw kasic mak khang zaucna ai rui taanv sw pwkhou ai hei RINGHPOUC dyng e twmei Isaraelmei nangniw thay puni.” Kauh Liangmei RINGHPOUC rui sa the.

⁴⁵RINGHPOUC rui akhou sa e,

⁴⁶“Maansei nacle, dihba biak thangc tei zauc key o. Dihpy ramv ruc khou tei sa tho khatni dihba ramv tuang ngouh khou tei ai rui sa e twna sa o.

⁴⁷Kauh Liangmei RINGHPOUC rui kumna samei hei nking o twna dihba ramv tuang ngouh khou tei kumna sa tho: Zauc lo! Ai rui nang khou mai ntoulou puni the, kumna nang khou naimei thing theihmei ni ringhmei ni nsaekc dat makna raw ngam puni the. Hei tei ramh akhat na rui sini swmit dat ngam pw lak khe. Hei tei dihba thangc rui dihpy thangc chuangc ngangh puni the, kumna mi maibwang thiu tei meic kathuicna akhangv puni the.

⁴⁸Mi mai tei RINGHPOUC ai rui ntouloumei tuang the kum tina meic gaanv khat na rui sini swmit dat ngam mak khe twmei kaniw thay puni.”

⁴⁹Khoutei ai rui kumna sa the, “Kauh Liangmei RINGHPOUC, mi lat tei ata thu tisalou dat ri tho! Ai hei latgyam rana sa e twna meic kathuicna rui sa bam tuang di the.”