Read Rongmei Naga EZEKIEL 21 Bible Online

EZEKIEL 21 - Rongmei Naga bible

EZEKIEL 21

¹RINGHPOUC rui akhou sa the,

²“Maansei nacle, Jerusalem thangc tei nang zaw puanc karihna ravbam khou tei alat hei sa o. Isaraelmei kandic ruc khou tei,

³RINGHPOUC rui sa e twna kumna sa tho. Ai hei nang ta zauczihmei di the. Ai rui atuang baengsaeng sat patna nangniw meic kathuicna ta meicsimei ta ni meicgaymei ta ni swluai puni.

⁴Ai rui atuang baengsaeng sat patna dihpy khou rui dihba nganv dow key puni the.

⁵Ai rui atuang baengsaeng sat pat the kumna hei tei lou key dat ni tuang hamh the twmei meic kathuicna thay puni the.

⁶“Maansei nacle, lungh kabiuna kahuic-kasing tho. Meic geihna rui nang ta zaucna bam khou zaengsina puihuay tho.

⁷Nang tabui swna puihuayna bam tu cho twna kaniw rui thanv pw e thei, ai rui chumei chamv zaeng rui e twna kaniw khou sa tio. Hei tei guang tangc pwkhou, kaniw lung tei pingmei rui padik puni the, kaniw baanc zay zuatri puni the, kaniw bau nai dat lak khe, khatni kaniw khubut kadunh puni the. Mi ganv kiu ntaw hei guang pw the.” Kauh Liangmei RINGHPOUC rui sa the

⁸RINGHPOUC rui akhou sa the,

⁹“Maansei nacle, RINGHPOUC ai rui sa e twna meic nunc khou kumna sa tho: Baengsaeng, baengsaeng tei karu kan the, thaamc palik kan the.

¹⁰Dim key khang karu kan the, tingpalik kumc karang khang thaamc kan the. neihlamei nai dat lak khe, kalam thu kaniw alat ta khatni ai rui riapmei ta thouhsw mak khe.

¹¹Baengsaeng tei sin thau khang thaamc bam the. Swluai swtiatmeipu baanc khou nsinlou khang karuna thaamc bam the.

¹²Maansei nacle, puihuayna kap tho; mi baengsaeng hei amei nunc ta sw khang e khatni Isaraelmei kapy guay ta sw khang e. Kaniw ta dowluai puni the, amei nunc ta ni swluai puni the. Kumna nangniw ngaengv hiw la tho!

¹³Ai rui amei nunc ta nchanvna, bam e, kaniw rui lunglaic mu pw e thei, mi guay hei kaniw ruc khou guanglou puni.

¹⁴“Kumhpui zaeng rui, maansei nacle, alat hei dinc ndauh tho. Nang baanc kaphi tho, baengsaeng tei downa downa bam puni the. Mi baengsaeng hei meic dowluai khang e, meic pingmei tuang e, meic kangdai dowluai khang e.

¹⁵Mi hei rui amei nunc lung sw nnau the khatni tibow the. Tingpalik kumhmei baengsaeng sinna ai rui kaniw tuang kaidai ta kapin the khatni swluai khang ding the.

¹⁶He ntukmei baengsaeng, baanzat baandau dow gut tho! Nang baengsaeng mun karihlou loumei biak tei dow key tho.

¹⁷Ai ni abaanc hiw puni the, kumna alungpuam kim key puni the. RINGHPOUC, ai rui sa the.”

¹⁸RINGHPOUC rui akhou sa the,

¹⁹“Maansei nacle,” “Babilonmei guangc katuang baengsaeng sinna guang nuhmei chaeng kanei hy pat ro. Mi chaeng kanei tei kandih akhat na khou rui tatpat nina e. Mi chaeng tei ruangrac nimei chaengkhaak khou, hyna daanclou o.

²⁰Chaeng akhat tei rui mi guangh tei Ammonmei kai Rabba tat nimei chaeng, khatni akhat tei rui Juda tuang raengh raengloumei Jerusalem kaidai tat nimei chaeng e twna lyanlou o.

²¹Mi chaengkhaak khou tei Babilonmei guangc tei mi hyna daancloumei daeng khou tei ding bam puni. Tabui chaeng tei tat nina cho twna katuang pailu daanh saancna, ravmaengc khou thanvna, ravkhaengmei khouringc paic zaucna bam puni.

²²Jerusalem twna hyloumei khou keyloumei katuang pailu tei ntaw thu kabaanc zat rui sin the. Tatna raengh diangcramei thingluang kasiamh tho, rih saanc tho, raenghmun guay khou tei diangcramei thingluang lou tho, chaeng thwan thau tho, rihlyn khunc chau tho twmei hei tei rui dinc the.

²³Jerusalemmei nunc tei kaniw rui mi kandic tei lev swloumei latdyng nai e twna kaniw hei tei lwm ni tuang hamh e. Kum e tiki thu mi dinc kasuakcloumei hei rui kaniw tuang paap tei tiningtow khang e khatni kaniw ta nym puni the, twmei tithay khang e.

²⁴Kumhpui zaeng rui, Kauh Liangmei RINGHPOUC ai rui sa e: Nangniw tuang paap guay tei ndauh pat the. Nangniw hei adihkamv kha nkhuaipui mei cho twmei meic kathuicna thay e. Nangniw tuang taanv kathuicna khou nangniw tuang paap lyan the. Hei zaeng rui ai rui nangniw ta zauczihmei nunc baanc khou tiipat puni the.

²⁵“He meicsimei, nthan makmei Isarael tuang dih sinpoucle, nang ta nkhamhmei tuang dandi tii nimei tingmik kiu guang pw the.

²⁶Kauh Liangmei RINGHPOUC, ai rui sa the. Nang tuang guangh pyrun khatni nang pykha tei luak pat tho. Tingmik baih baihmei kumc bam dat pw lak khe. Nthyampui mei ta tidaiclou puni the, daihpui mei ta tithyam key puni the!

²⁷Swra ngam puni the, swra ngam puni the! Ngguay, ai rui mi kaidai tei sw kasic karouclou puni the. Mi kaidai ti hei dandi tii khang ai rui kadahloumeipu tei guang mak saanv mi hei guanglou ni tuang hamh e. Kamei guang pwkhou mi kaidai ti hei kabaanc khou tiilou puni.

²⁸“Maansei nacle, Isaraelmei nunc ta tizak bammei Ammonmei nunc ruc khou tuang ganv luai the! Hei zaeng rui ai hei Kauh Liangmei RINGHPOUC, ai rui sa e twna kumna kaniw khou sa tho: Swkamut kamai khang baengsaeng chamdaanvlou the; dowluai khang tingpalik kumc thaamc karanglou the,

²⁹Nangniw rui howmei ndawman guay tei nkhuaimei e, khatni nangniw rui dinc kasuakc bammei guay tei saraamhmei e. Nangniw hei meicsimei the khatni gay mak khe, nangniw ruc khou nkhamhmei dandi tii nimei tingmik kiu guang pw the. Nangniw guay ta baengsaeng rui dangv puni the.

³⁰“‘Baengsaeng tei zay thau tho! Nangniw ta damcloumei, bamv khou tei, nangniw ta puancloumei kandic khou tei ai rui nangniw ta latzan sw puni the.

³¹Ai rui nangniw ruc khou alungpuam bun key puni the khatni nangniw ruc khou alungpuam mphiu pat puni the. Kakheic simei nunc, sw kasic karouc khang thaymei nunc baanc khou ai rui nangniw ta tii patlou puni the.

³²Nangniw ta mai rui sw kamut kamai puni the. Nangniw tuang kandic khou nangniw zei keylou puni the, kumna meic gaanv khat na rui sini nangniw ta ningtow bam dat lak khe.’ ” RINGHPOUC rui sa the.