Read Rongmei Naga EZEKIEL 22 Bible Online

EZEKIEL 22 - Rongmei Naga bible

EZEKIEL 22

¹RINGHPOUC rui akhou sa e:

²“Maansei nacle,” “Meicbiw-meicdowmei rui padikmei kaidai ti hei nang latzan sw o. Kamei rui taanc bammei chanymei taanv guay tei kakhou sa nthan thiakhna sa pat ti tho.

³Kauh Liangmei RINGHPOUC ai rui sa e twna mi kaidai khou tei kumna sa o: Nangniw rui nangniw chana punav heizu swluai key kanmei khatni ravmaengc kalumna nangniw ta swtanac bammei zaeng rui nangniw ta dandi tii nimei ganv hei guang pw the.

⁴Nangniw meicbiw-meicdowmei tuang paap khatni ravmaengc rui nangniw ta sw tanacmei tuang zaeng rui nangniw ta dandi tii nimei ganv guang pw the, nangniw rui zaatc nunc ta nangniw ruc khou tinuic the kumna kandih kaguayna rui nangniw ta nuic the.

⁵Nangniw daeng khou lungc bammei kandic guay rui ni, duh thangcmei kandic guay rui ni nchu-nzaenghna lungh makmei kaidai nang ta nuic the.

⁶Isaraelmei tuang kapy swmei nunc hei kaniw tuang ngamv tei meicbiw-meicdowmei khang sinsw the.

⁷Mi kaidai khou bammei guay tei kaniw puipu ta chakhwang swmei maek khe. Nangniw rui kandih baih thangc rui guangmei nunc ta tei guat tuna lungc the, khatni swmmaypui nunc khatni nkhu-nruna nunc ta tei sintuna lungc the.

⁸Nthanmei bamv guay ta nangniw chakhwang sw mak khe, Sabbath ni ngaek mak khe.

⁹Nangniw gaanvsaekc rui meic gaanvsaekc ruc khou kiuc hamhmei lat nkham-ndamlouna swluai the. Gaanvsaekc rui ravmaengc khang khaengmei zanc tu the. Gaanvsaekc rui nthah-boulahna lungc bam e.

¹⁰Gaanvsaekc rui kaniw pu now ta lay the. Gaanvsaekc rui ntumei kapumc nthan makmei ganv khou namna tatlou the.

¹¹Gaanvsaekc rui meickai now ta lay the, gaanvsaekc rui kaniw thunc-mauc ta khatni kaniw tanpui ta lay the.

¹²Gaanvsaekc rui katy kamanv laana meicbiw-meicdow tat bammei nai e. Gaanvsaekc rui kaniw chana punav Isaraelmei nchamc khou syanthuay laana lungcgay bammei nai e. Kaniw ata amuc the.” Kauh Liangmei RINGHPOUC rui sa the.

¹³“Kumhpui zaeng rui nangniw meickai tuang asut laa loumei khatni meicbiw-meicdowmei khou tei abaanc kazwm key puni the.

¹⁴Heikumna ai rui nangniw ruc khou taanv sw pwkhou kiu nangniw bauc pat ngam puni de hamh e thei nangniw baanc khungc thau ngam puni de twna ningna cho? RINGHPOUC, ai rui hei tei taanc puni.

¹⁵Ai rui nangniw ta kandih kathuicna khatni zaatc kathuicna khou zinphaklou puni the kumna nangniw tuang simei taanv guay tei titaanc nthaekclou puni the.

¹⁶Kumna zaatc baihmei guay rui nangniw ta mala pwkhou, ai hei RINGHPOUC dyng e twmei nangniw thay puni the.”

¹⁷RINGHPOUC rui akhou sa the,

¹⁸“Maansei nacle, Isaraelmei hei mai khou ganclou duhmei daandi bav kumc akhang gaeng mak khe. Kaniw hei ntanhbav, ntanh, tanzinc, khatni misi kumcna nsa di the.

¹⁹Kumhpui zaeng rui Isaraelmei hei ntanh bav kumc akhang gaeng mak khe twna Kauh Liangmei RINGHPOUC ai rui kaniw khou sa e. Kumhpui zaeng rui, ai rui kaniw ta Jerusalem khou khuam kaduai puni the.

²⁰Daandi, ntan-nzi, misi, khatni tin, ntanh ta khuam kaduaina maimangh khou ntei nthanmei kumcna alungpuam rui hei khou hei kaniw ta tei ntei nungc puni the.

²¹Ngguay, ai rui kaniw ta Jerusalem khou khuam kaduai guangna, kaniw bangc khou chakhuan maipui ganclouna alungpuam rui kaniw ta sw nungc puni the.

²²Daandi ta maimangh khou raw nungh kumc kaniw ta tei Jerusalem khou raw nungc puni the, khou kiu RINGHPOUC lungpuam nangniw ruc khou bun key the twmei kaniw thay puni the.”

²³RINGHPOUC rui akhou sa dat re,

²⁴“Maansei nacle, Isaraelmei nunc khou kaniw kandic hei nthan mak khe, kumna ai rui kaniw kandic ti hei dandi tii bam the twna sa tio.

²⁵Kaniw tuang kapy nunc tei kamangliangpui khouringh swluai tumei daeng khou rah bammei kumc the. Kaniw rui meic nunc ta swluai the, kumna kaniw rui laa nuh nuhmei siandui khatni puatchei guay tei laa the, heikumna swmmaypui mpeyna ganclou the.

²⁶Amuh nunc rui atuang latdanv sw bak the khatni nthanmei tuang puat ta chakhwang sw mak khe. Nthanmei nthan makmei ni khak langhmei tuang maek khe. Hei tei nthanmei puat re hei tei tanacmei puat re twmei ni kaniw rui dinclou mak khe, khatni kaniw rui Sabbath ta thouhsw mak khe. Hei zaeng rui Isaraelmei ata chakhwang sw mak khe.

²⁷Kaniw tuang kandih sinmei meicdaihmei nunc tei khouringh zanc thaek tuna bammei angiw nunc kumc the. Meic nunc ta swluai swtiatna kaniw lungcgay khang sw the.

²⁸Ngaengsaengc nraeng ntey mphwan kumc muhzwng nunc rui mi tuang paap guay hei nkamh the. Kaniw rui nchumh makmei tuang ndawman how the kumna saraamhmei lat dinc kasuakc the. RINGHPOUC ai rui kaniw khou salou mak takhaanvna Kauh Liangmei RINGHPOUC rui kumna sa e twna kaniw sa e.

²⁹Lungcgaymei nunc guat the khatni asut laa the; Kaniw rui lungcsimei nunc ta sina sw the khatni kandih baih thangc rui guangmei nunc ta namtu the.

³⁰Thowkumhmei raengh tei kasiamh thau lana, raengh pangvmei bamv guay khou tei dingna, alungpuam rui mi kandic ta tei sw kasic nimei khou rui ding gaek ngammei nai puni ny twna ai phu e, tiki ai meic gaanv khat na sini phutow mak khe.

³¹Kumhpui zaeng rui alungpuam kaniw ruc khou bun key puni the khatni kaniw tuang taanv zaeng rui alungpuam mai rui kaniw ta swkamut kamailou puni the.” Kauh Liangmei RINGHPOUC rui sa the.