Read Rongmei Naga EZEKIEL 23 Bible Online

EZEKIEL 23 - Rongmei Naga bible

EZEKIEL 23

²“Maansei nacle,” “Kaganv akhat khou swanrey gaanv nei nai bam khwan e.

³Kaney tei alauc swna Izip khou bammei douc rui mangcsangmeiluc sw kan the.

⁴Gaanvthaihmeipui zanc rui Ohola twna kaw e mi hei Samaria e khatni alaucmeipui zanc rui Oholiba twna kaw e mi hei Jerusalem e. Kaney ti hei anow khang laa the, kaney tunapuan geicna puanclou the.

⁵Ohola kamei hei atuang sw bam sini mangcsangmeiluc sw taan makna Asiriamei ta karam khangc swna nthah-boulahna tat kan the.

⁶Asiriamei nunc tei haengcmumhmei pwan piumei rihmei nunc e, meicdaihmei khatni thaekc kauhmei kandih sinmei nunc e, kaniw guay tei meiclwn meicchav gaymei takuanh ricmei meicdaihmei nunc e.

⁷Kamei tei Asiriamei meicdaihmei nunc ramlupui di the, kumna katuang nthah-bowlahmei rui kata Asiria tuang ravmaengc tikalumna swtanac the.

⁸Kamei rui Izip khou mangcsangmeiluc swna lunghmei lwnlung tei kamei kalaih mak ge. Kamei tunac douc rui nggaanvmei lev zip kariuna kata mangcsangmeiluc kumcna sinsw the.

⁹Hei kumhpui zaeng rui kamei rui kahawmei Asiriamei nunc baanc khou ai rui tiipat the.

¹⁰Asiriamei rui kaphey kabaan kathangv duakh duaklou the, kanac mpouh aluh guay ta asut kan the, kumna kata baengsaeng rui dowluai kan the. Karuc khou patloumei guay tei ntumei nunc tuang pary bamv sw the.

¹¹“Kakainac Oholiba rui mi guay hei howna kachaic Ohola khang suangc siranv the khatni mangcsangmeiluc swmei khou gut duc ranv the.

¹²Kamei rui Asiriamei meicsaengc meicdaihmei nunc kachanmei pwan piumei rihmei nunc takuanh ricmei tuang meicdaihmei nunc, mi kalwn kachav gaymei chabwan nunc ta tei kahaw the.

¹³Kamei hei ni mphuam the twmei ai how the, kaney gaanv nei hei kathuic kaluic akhat di the.

¹⁴“Kamei hei nthah-bowlahmei khou limc hay hay tat kan the. Babilonmei meicdaihmei nunc maengc haengcnrymmei

¹⁵siangiat kagiatc louna kapwan karuhloumei pykha khana ngaengsaengc khou, hiaklou bammei maengc guay ta tei kamei kahaw the.

¹⁶Kamei rui mi guay ta tei howpui lev nthah bowlahmei lungning padikna Babilon thangc latdiumei thouclou the.

¹⁷Babilonmei nunc guangna kata swtanaclou the. Kaniw rui kata swtanac nganvloumei tangv kamei rui kaniw ta karaeng the.

¹⁸Kamei rui nkamh-mbeihmei tuang maekna charuangc khou taanc lyanna kamei hei mangcsangmeiluc e twmei meic kathuicna thay kan the. Ai rui kachaic ta karaengmei kumc kata ni karaeng the.

¹⁹Kamei tunac douc Izip khou mangcsangmeiluc sw bammei douc ta tei ningtowna nthah-bowlahmei taanv hei mbu mbuna taanc thau e.

²⁰Kamei tei kakhurouc daihmei takuanh khurouc kumhmei ta nthahna kahaw the.”

²¹(Oholiba, nang hei Izip kandic khou tunac swna nang ngaengv ta dingtaan swna nthah boulahna lungcmaanvmei taanv taanc bammei tei taanc kaluaih dat dat nii e.)

²²“Kumhpui zaeng rui, he Oholiba, Kauh Liangmei RINGHPOUC, ai rui nang khou sa e. Nang ramkhangc nunc ta chany the, tiki ai rui kaniw ta nangniw ruc khou tilunghpuamclou puni kumna nangniw ta ding haengv khang phungc guang puni.

²³Pekot, Shoa khatni Koa khoumei Babilonmei khatni Kaidaimei nunc khatni Asiriamei guay ta ai rui phungc guang puni. Mi kalwn kachav gaymei chabwan meicdaihmei nunc khatni kandih sinmei nunc mi nthukmei-kandih sinmei khatni rihmei kapy nunc ta tei ai rui khuam kaduai guang puni.

²⁴Kaniw tei rihmei kangdai takuanh gari khatni puktaek phunghmei gari pang nduanghna dihpy biak thangc rui adow key puni. Nggih sinna khatni rih pyrun, runna nang ta ding haengv puni the. Ai rui nang ta kaniw baanc khou tiipat puni the kumna kaniw rui nang ta kaniw riak theilayna latzan sw puni the.

²⁵Ai rui nang ta lunghpuamhpui zaeng rui, kaniw lunghpuamcna nang ruc khou taanvsw khang ai rui tiswlou puni the. Kaniw rui nang nukwang khatni nang nukuanc ruamc kan puni khatni nang nac nunc ta swluai puni. Ngguay, kaniw rui nang nac mpouh aluh nunc ta nang khou rui laana kaniw ta nringh mai ntei puni the,

²⁶Kaniw rui nang tuang pheybaan kathangv laa kan puni khatni nang tuang kachaekc kaphut guay laa kan puni.

²⁷Kumna nang rui Izip khou rui taanc guangmei nthah-bowlahmei khatni nang pumc zuanhmei tuang taanv guay ti-nthaekclou puni. Nang ravmaengc ta kahaw dat pw lak khe khatni Izip ta ning dat pw lak khe.”

²⁸Kauh Liangmei RINGHPOUC rui sa e: “Nang rui karaengmei khatni chanyna tatpatmei nunc khou tei ai rui nang ta tiilou dat puni.

²⁹Kaniw rui nang ta karaengmei zaeng rui, nang rui taanc patloumei guay tei kaniw rui laa tat kan puni khatni nang tuang pheybaan guay lwmlai ngamlouna kapumc zuanhmeipui ta kumc charuangc mav khou paliucna ganclou puni. Nang tuang nthah-bowlahmei khatni nang pumc zuanhmei taanv rui

³⁰mi guay hei nang ruc khou phungc guangloumei tuang e. Nang pumc hei mangcsangmeiluc kumcna zaatc nunc khang zuanclou the kumna kaniw tuang ravmaengc nunc rui nang ta swtanac the.

³¹Nang ni nang chaic rui tatmei chaeng tei tat the, kumhpui zaeng rui kakhang tii kanmei dandi tuang buangc tei nang khang ni tii muay puni.”

³²Kauh Liangmei RINGHPOUC rui sa e, “Nang chaicpui tuang buangc tei nang ni zangv puni the, daihmei, nthukmei buangc tei. Meic kathuicna rui nang ta sinnui sinnu puni the; kabuangc tei padik the.

³³Nang hei tei zangv mbana nang ryanra ryanriu puni the, swkamut kamaimei buangc tei, nang chaic Samaria zangv kanmei buangc tei.

³⁴Nang rui mi buangc tei zangv phuithiwlou puni the, khatni mi buangc tei siauc bak patmei kiak rui nang ngaengv sw bak puni the.”

³⁵Kumhpui zaeng rui, Kauh Liangmei RINGHPOUC rui sa e: “Nang rui ata amuclouna akhou namthei karihlouna tat kanmei zaeng rui, nang tuang nthah-bowlahmei khatni mangcsangmeiluc swmei taanv phy ryanramei ariw puni the.”

³⁶RINGHPOUC rui akhou sa e, “Maansei nacle, nang Ohola lev Oholiba ta latzan sw khang nuh the cho? Kaney rui taanc kanmei chanymei taanv tuang latzan tei kauc pat tho.

³⁷Kaney ramhkhangc nai tat the khatni meicdow the ravmaengc ta kaney ramhkhangc swna khatni kaney rui puanc patmei nac mpouh guay ta swluai the. Kaney rui anac nunc ta tei kaney tuang ravmaengc khang kat kan the.

³⁸Kaney rui taanhmei kiu mi na ta hamh e. Kaney rui atuang Ravkai swtanac the khatni ai rui lingc thauloumei Sabbath tei sw bak the.

³⁹Kaney rui anac nunc ta ravmaengc khang khaeng tatmei nungc kahak tei atuang Ravkai khou guang datna mi Ravkai ta tei swtanac the!

⁴⁰“Duhmei kandic thangc bammei nunc ta kaney rui kaw guang the. Kakai swanrey nei tei duilow nthanna, mikkhyam ntey lana ntuh-ntah piuna karuh the.

⁴¹Ai rui tiiloumei namhgaymei thauc khatni Olive thauc pang khou lou padiklouna kaney tei kamanv kunghmei laeng khou dungcna bam e.

⁴²Ramh ningtow makmei pang khwan chu e, tazikramv thangc rui phungc guangmei nunc khwan chu e. Kaniw rui mipui nei baancpwam khou tei ntah nulou the khatni kaney py khou howgaymei pykhim runlou the.

⁴³Nthah-boulahmei taanv khou rui kapumc sw kasic ngammeipui ta kaniw rui mangcsangmeiluc swna sinsw bam e twna ai rui akhou sa e.

⁴⁴Kaniw rui mi mangcsangmeiluc nei khou tat dat tat datna tat bam e. Mi nthah-bowlahmei Ohola lev Oholiba khou tei tat dat tat datna tat bam e.

⁴⁵Ravchaptatmei nunc rui kaney ta lungcmaanv lungcmowmei khatni meicdowmei tuang khuay kauc pat puni the, kalam thu kaney lungcmaanv the khatni kaney baanc zei rui tanac the.”

⁴⁶Kauh Liangmei RINGHPOUC rui sa e: “Meic kang akhat ta phungc guangna tiswkasic tho khatni kaniw tuang ti-asut tho.

⁴⁷Mi kang tei rui kaniw ta ntauh kwamna, baengsaeng rui adow kan diu, kumna kaniw nac nunc ta swluai kan diu khatni kaniw kai guay mailou kan diu.

⁴⁸Ntumei guay rui meic baihmei lev lungcmaanv lungcmowmei taanv hei kahu nungc taanc guangmei kumcna taanc dat mak khang ramh thay kan khang ai rui mi kandic kapwm khou hei mi kumhmei taanv guay tei titaanc nthaekc puni the.

⁴⁹Nang kai swanrey nei ta ni lungcmaanv lungcmowmei khatni ravmaengc kalummei paap zaeng rui dandi tii puni. Hei khou kiu ai hei Kauh Liangmei RINGHPOUC dyng e twmei nangniw thay puni.”