Read Rongmei Naga EZEKIEL 24 Bible Online

EZEKIEL 24 - Rongmei Naga bible

EZEKIEL 24

¹Aniu meicbangc bam tatmei tuang chakiumei kwm ruhmei bw tuang zaeng ruhpui neic RINGHPOUC rui akhou sa the,

²“Maansei nacle,” “Aseic tuang tingmik hei hy keylou o, kalam thu aseic hei Babilonmei guangc rui Jerusalem ding bin thaumei tingmik the.

³Kauh Liangmei RINGHPOUC ai rui sa e twna mi meicliammei nunc khou hei mi latgyam hei raclou ti tho: Lai tei mai khou banthaulouna dui bun padiklou tho.

⁴Zanhbangv gaymei guay thimlou tho— laikhwm, kanaeng, tu gaymei rou guay lou padik tho.

⁵Lauziu zanc gaymei thimlou tho; lai bung khou tei maipui ganclou tho. Dui tei tibat tho; katei, karou guay tei banminc tho.”

⁶RINGHPOUC rui sa e, “Meicbiw-meicdowmei kaidai hei sansi e dav! Mi kaidai hei phiau zat makmei sauhmei lairaan kumc the. Zanhbangv akhat khat swna laa pat ngam the, akhat na sini nsaekclou mak khe.

⁷Mi kaidai khou tei meicdow the. Zei tei mbut rui liam nuhmei bamv kandih khou ni swlou mak khe; ntauh ruc khou bunlou the.

⁸Mi zei tei nkamh nuh makmei bamv, lungpuam tithauna khwm laa nuhmei bamv khou ai rui lou the.”

⁹Kauh Liangmei RINGHPOUC rui sa e: “Meicdowmei kaidai hei sansi e dav! Ai kahak rui ni thing tei khuanlou puni the.

¹⁰Kumhpui zaeng rui thing tei peiclou tho kumna mai tei katumlou tho. Zanhbangv tei suangcminc chuy tho, maruai maraengc louna; kumna karou guay tei ni suangc mut kan di tho.

¹¹Ntaw thu tanzinc tuang lairaeng maithyn ruc khou tei banlou o kumna hei tei raw haengh haeng kan di tho. Mi kumna mi lai tuang mphuammei guay rawmaan kan pwkhou mi lai tei kariak khou nthan dat puni the,

¹²tiki tanacmei rei guay tei thu nthan thiakh lak ge.

¹³Jerusalem, nang tuang nthah- bowlahmei taanv rui nang ta swtanac the. Nang ta sw nthan khang ai karamc bam tisini, nang hei sw tananac bam e. Alungpuam hei nang ruc khou keylou timak saanv nang nthan dat ni tuang hamh e.

¹⁴Kauh Liangmei RINGHPOUC ai rui sa the. Ai rui taanv sinthau nipui ganv guang tangc pw the. Ai rui nang tuang paap ta zauc samlou dat lak khe nang ta zauc nzianlou dat lak khe. Nang tuang taanv dandi tei nang khang tii puni the.” Kauh Liangmei RINGHPOUC rui sa the.

¹⁵RINGHPOUC rui akhou sa the,

¹⁶“Maansei nacle, bai key guai khou rui nang nzian liangmei ta ai rui laa tat kan puni the. Mi khang tei rui nang ra pat lak nina e, kap lak nina e, mikdui ni key lak nina e.

¹⁷Nang kahikmei khwan ni tichu lak nina e. Zaengsimei lyanna nang py ni laanc lak nina e, nang phay syn ni tat lak nina e. Nang zaw ni gum lak nina e khatni latlumei nunc rui tumei taek ni tu lak nina e.”

¹⁸Lauthwan ai meic nunc khou tei pary rac bam khwan e. Mi nungc tingzyn tei anow theic the, kumna nthuanh thauna akhou kum o twna samei tei ai taanc the.

¹⁹“Nang tabui swna heikumna sw bam tu cho?” twna meic nunc rui akhou thanv the.

²⁰Khoutei ai rui kaniw khou daw the, “RINGHPOUC rui akhou sa e.

²¹lsaraelmei khou sa o twna kumna sa e: Jerusalem Ravkai tuang pumtan khou tei nangniw dai swna bam e. Nangniw mi ta tei how nii e khatni guang zauc nii e, tiki RINGHPOUC rui mi ti hei swtanac puni the. Jerusalem khou ganclou duhmei nang kai kaikhunhmei alaucliangmei nunc ta tei suc-rih rui swluai puni the.

²²Hei ganv khou kiu ai rui sw bammei kumcna nangniw sw puni the. Nangniw zaw gum dat pw lak khe khatni zaengsimei nunc rui tumei taektw nangniw tu dat pw lak khe.

²³Nangniw py ni laanc lak khe, phay syn ni tat lak khe. Nangniw huay lak khe, kap ni kap lak khe. Nangniw tuang paap zaeng rui nangniw nsuan key puni the kumna nangniw khat khat khou kaplou puni the.

²⁴Ezekiel, ai hei nangniw khang taanc lyanloumei the, ai rui sw kanmei kahak tei nangniw ni sw puni. Mi guay hei guang tangc pwkhou kamei Kauh Liangmei RINGHPOUC e twmei nangniw thay puni twna RINGHPOUC rui sa e.”

²⁵RINGHPOUC rui sa the, “Maansei nacle, kaniw dai swna kaniw neihla sw bammei, kaniw how nii, guang zauclou niina bammei tanhmei Ravkai tei kaniw khou rui laa ganc kan puni the. Ai rui kaniw nac mpouh aluh guay ta ni laa ganc kan puni the.

²⁶Mi hei ai rui taanhpui nungc kiu, mi swkamut kamaimei khou tei rui pak duak patmei thowkumhmei rui guangna nang khou mi guay tei raclou puni the.

²⁷Mi ganv khou kiu nang mwang laanclou puni, kumna nang kata kachuc dat puni, nang rui reihna bam dat lak khe. Nang hei kaniw khang taanc nchinloumei tuang sw puni the, kumna ai hei RINGHPOUC dyng e twmei kaniw thay puni the.”