Read Rongmei Naga EZEKIEL 25 Bible Online

EZEKIEL 25 - Rongmei Naga bible

EZEKIEL 25

¹RINGHPOUC rui akhou sa the,

²“Maansei nacle, Ammonmei ruc khou nang zaw puanc karihna ai rui samei lat hei kauc patlou ti tho.

³Kauh Liangmei RINGHPOUC rui samei hei nking o twna kumna sa ti tho: Atuang Ravkai ta swtanacmei ta Isarael kandic sw kasic karoucloumei ta, Judamei nunc meicbangc bam tatmei ta howna nang neihla the.

⁴Hei kumhpui zaeng rui neihpat tazikramv thangc bammei nunc ta nang tuang kandic tila puni. Kaniw tuang pheykai nang kandic khou katinghlouna khou tei kaniw lungc puni. Nangniw tuang tingthai pannu tei kaniw rui tu puni khatni nangniw tuang guaihnoudui tei kaniw rui zangv puni.

⁵Ai hei RINGHPOUC e twmei nangniw thay khang rui Rabba kaidai ta guaikuan nunc byn bamv khatni Ammon kaidai ta lauziu byn bamv tisw puni.

⁶“Kauh Liangmei RINGHPOUC rui sa e: Nang rui Isaraelmei kandic ta karaengmei lev kazauhna baanhhiwna kachuamh kanmei zaeng khou tei rui,

⁷nang tuang asut laa ngam kan nimei zaatc nunc baanc khou ai rui nangniw ta tiipat puni the. Ai rui nang ta ntou mutsutlouna nang hei zaatc akhat swna nai bam dat lak khe khatni nang tuang kandic nai bam dat lak khe. Khou kiu ai hei RINGHPOUC dyng e twmei nang thay puni.”

⁸Kauh Liangmei RINGHPOUC rui sa e, “Juda hei ni kandih baih baihmei lev nchamc di the twna Moab rui samei zaeng rui,

⁹gay liangmei Beth Jeshimot, Baal Meon, khatni Kiriathaim kaidai guay kazauhna Moab kandic ramvrei gaek bammei kaidai guay ta tei zauczihmei ta ti-adow puni the.

¹⁰Neihpat tazikramv khou lungc bammei zaat ta ai rui Moab kandic ti hei ni Ammon ta lev tilaa nchamc puni the. Kumna Moab hei zaatc akhat swna nai bam dat lak khe.

¹¹Ai rui Moab ta dandi tii puni the, kum pwkhou ai hei RINGHPOUC e twmei kaniw thay puni.”

¹²Kauh Liangmei RINGHPOUC rui sa the, “Edommei nunc rui Judamei ruc khou swkasicna khwm khanghmei khuay tei Edom ruc khou daicna nai the.

¹³Kumhpui zaeng rui ai rui Edom ta dandi tii puni the, kumna mi tuang maansei khatni khouringh khounah guay tei swluai key puni the. Ai rui mi kandic ti hei Teman kaidai khou rui Dedan kaidai nganv ramvkiangdic tiswlou puni the, kumna meic nunc ta tei suc-rih rui swluai puni the.

¹⁴Kumna amei Isaraelmei nunc rui aphaan Edom kandic ta khwm khangclou puni the, kumna kaniw rui Edommei nunc ruc khou alungpuam bun key puni the. Ai rui khwm khangcloumei twmei kiu tabui tei cho twmei Edom rui thay puni the.” Kauh Liangmei RINGHPOUC rui sa the.

¹⁵Kauh Liangmei RINGHPOUC rui sa the, “Philistinmei rui kaniw tingsaengcna zauczih guangmei Judamei ta si sihna khwm khangcna karaengmei lev kazauhna swkamut kamailoumei zaeng rui

¹⁶ai rui Philistinmei ruc khou abaancpwam ntyng pat puni the kumna kaniw ta phiak nthan thiakhlou puni the. Philistin tuang Nzaengc khou ringc bam duhmei kathuicna ta tei ai rui swmutsutlou puni the.

¹⁷Ai rui kaniw ta ranvna dandi tii puni the, khatni daihmei khwm khangclou puni the. Kaniw ruc khou alungpuam keylou puni the. Khou kiu ai hei RINGHPOUC e twmei kaniw thay puni.”