Read Rongmei Naga EZEKIEL 26 Bible Online

EZEKIEL 26 - Rongmei Naga bible

EZEKIEL 26

¹11mei kwm ... bw tuang reymei tingmik nungc RINGHPOUC rui akhou sa the,

²Maansei nacle, Turmei nunc rui heikumna Jerusalem lam khou sa bam e, Jerusalem hei bak the! Katuang lanvguanh lanvdaenghmei tuang pumtan ni amaan the! Kamei aniu ta ada dat ngam pw lak khe!

³“Kumhpui zaeng rui Kauh Liangmei RINGHPOUC ai rui kaniw khou sa e: He Turle, ai hei nang ta zauczihmei di the. Nangniw ta adow khang ai rui zaatc mpeyna ta kaw guang puni the. Kaniw tei duipui kamuatc kumc guang puni the.

⁴Kaniw rui nangniw tuang kaidai raengh guay sw kasic key puni the khatni nangniw tuang rigaanvkai guay swra key puni the. Khou kiu ai rui taniang guay giak ganc ngamna ntauh syn na ganclou puni the.

⁵Hei tei duipui khou khav nymmei nunc rui kaniw tuang chiakc phauhmei bamv sw puni the. Kauh Liangmei RINGHPOUC ai rui sa kan the. Zaatc nunc rui Tur ta kwamlaa puni the,

⁶Kumna kaidai guay khou lungc bammei nunc ta kaniw tuang baengsaeng rui swluai puni. Hei khou kiu ai hei RINGHPOUC e twmei Tur rui thay puni.”

⁷Kauh Liangmei RINGHPOUC rui sa the, “Tur ta adow khang ai rui guangh pang khou rui daic liangmei Babilonmei guangc Nebukadnezar ta phungc guang puni. Kamei rihmei kangdai, takuanh, takuanh gari khatni takuanh ricmei pang ta nduanghna dihpy biak thangc rui guang puni.

⁸Kaniw tuang kaidai guay khou lungc bammei nunc tei rih akhangvna theic puni. Zauczihmei nunc rui rihkhunc chauna, raengh khou chaeng thwan thauna, khatni nggih tuang tanhmei raengc kasiamh thau puni the.

⁹Kaniw tuang raengc diangcramei tuang thingluang rui nangniw tuang raengh diangcra gut puni khatni tanhlubungc rui nangniw tuang rihgaekkai guay diangcra key puni.

¹⁰Kaniw tuang takuanh nunc rui pak katungh guangmei muanghbangv kumhmei mbut tei rui nangniw ta gumbin puni the. Karaengh maekmei kaidai khou gut kumc kaniw rui nangniw tuang raenghmun khou gut pwkhou rih takuanc nunc khatni takuanh gari guay khwan tei rui nangniw tuang raengc guay tei kadunh puni the.

¹¹Kaniw tuang takuanh ricmei nunc tei nangniw tuang chaengluang guay khou pwanzingh guang kumc guangna baengsaeng rui meic nunc ta tei dim key puni the. Nangniw tuang tanhmei ntiangh guay tei kandih khou bow key puni the.

¹²Kaniw rui nangniw tuang taanv guay tei laa kan puni the, nangniw tuang lanvguanh puat guay tei ni asut kan puni the. Kaniw rui nangniw tuang raengc guay swra puni the khatni nangniw tuang gaymei kai guay tei sw katupc tuaylou puni the. Kaniw rui kathing katauc guay tei duipui, khou phaiclou kan puni the.

¹³Nangniw tuang lu guay tei ai rui ti-nthaekclou puni the khatni nangniw tuang nrah dowmei khwan tei ni chu dat lak khe.

¹⁴Khav nymmei nunc rui kaniw tuang chiakc phauc bam nimei taukaengbut guay na tei ganclou duc puni the. Mi kaidai tei tabui nungc na sini kasiamh thau dat lak khe. Kauh Liangmei RINGHPOUC ai rui sa the.”

¹⁵Kauh Liangmei RINGHPOUC rui mi hei Tur kaidai khou sa e: “Nangniw ta kuaklaapui ganv khou kiu dow tina kaucna rah bammei khwan tei duipui tin khou lungc bammei nunc tei chuna ping puni the.

¹⁶Duipui tin khou lungc bammei guangh guay tei kaniw tuang guangh bamvpaeng khou rui key puni. Kaniw tuang pheychuanh khatni mwn huiloumei phey guay tei luak patna kadunhna kandih khou dungc bam puni. Kaniw rui ping langvna kaniw kadunh taan dat thay pw lak khe.

¹⁷Kaniw rui mi theihlu hei nang khang suanlou puni: Kazanc dinhmei kaidai tei kamut kamai kan dyng the! Katuang rungc guay tei duipui khou rui giak ganc kan dyng the. Mi kaidai tuang mei nunc rui duipui ta sin bam khwan e; duipui tin khou lunghmei nunc kaniw ta ping bam khwan e.

¹⁸Ntaw, kamei bowkeypui nungc hei, duipui kandic guay kadunh the, khou tei lungc bammei nunc kaluangna ping puni the.”

¹⁹Kauh Liangmei RINGHPOUC rui sa e: “Ai rui nang ta meic lungc taanmei kai kumc lungc taekna ganclou puni. Duipui dui rui ai rui nang ta gum binlou puni.

²⁰Reynungc theic kanmei pang khou kazauh khang ai rui nang ta taruaih thangc thouc key puni. Ai rui nang ta kandih bangc kandih khou tingsaengzaeng swkasicna loumei bamv khou, theihmei nunc lev duang swna bam khang ganclou puni. Kum pwkhou nangniw hanc guang dat lak khe khatni ringhmei nunc rui lungc bammei kandic khou hei lungc dat lak khe.

²¹Ai rui nang ta meic pingmei lwnlung khou kumna tiluailou puni the kumna nang hei nai dat lak khe. Nang ta phu bam sini phutow dat lak khe.” Kauh Liangmei RINGHPOUC rui sa the.