Read Rongmei Naga EZEKIEL 27 Bible Online

EZEKIEL 27 - Rongmei Naga bible

EZEKIEL 27

¹RINGHPOUC rui akhou sa e,

²“Maansei nacle, Tur khang latlumei lu suanlou tio.

³Duipui tin khou ding bammei khatni duipui paengc kathuic khou lungc bammei nunc lev lanvguanh lanvdaengh bammei Tur kaidai khou tei suanlou tio. RINGHPOUC rui sa e twna kakhou kumna sa tio: Turmei, nang hei howgaymei khou nthuih the twna nang gaengh sw e.

⁴Nang kai hei duipui hei the. Nang ta kasiamhloumei nunc rui howgaymei rungh kumc nang ta kasiamhlou the;

⁵kaniw rui Hermon Chyng tuang aluthing rui kasiamh the, khatni Lebanon tuang sidar thing rui kasiamh the.

⁶Kaniw rui Bashan tuang mphauhthing rui maitha sw the; nang tuang paeng tei saipras tuang aluthing rui sw the. Kumna kabamv tei guaipuang nei rui bamclou the.

⁷Nang tuang pwan gauhphey tei linen phey rui kasiamh e, Izip tuang mwn huiloumei linen phey rui, duh thangc rui sini how pat gaymei phey rui kasiamh e. Nang tuang rungh nam guamphey tei phey gaymei saipras tuang haengc mumhmei phey rui kasiamh e.

⁸Nang tuang maitha sinmei nunc tei Sidonmei khatni Arvadmei nunc e. Nangniw mei heihmei nunc tei rungh chaumei nunc e.

⁹Rungh khou thing taanv taanhmei nunc tei baanh thaymei Biblosmei nunc e. Rungh tatmei rungh chaumei kathuic rui nang tuang dukaan puat liu the.

¹⁰“Persia, Lidia, khatni Libiamei nggaanv nunc rui nang tuang ricmei nunc sw the. Kaniw tuang nggih guay khatni rih pyrun guay tei rihmei nunc kai daamv khou thaengclou the. Kaniw rui nang zanc tikauhloumei tuang the.

¹¹Arvad thangc rui guangmei rihmei nunc rui nang tuang raengh guay tei gaek the khatni Gamadmei nggaanv nunc rui nang tuang rigaanvkai guay tei gaek the. Kaniw tuang nggih guay tei nang tuang daamv khou thaengclou the. Nang ta karuhloumei kiu kaniw rui e.

¹²“Spainmeile nang lanvguanh lanvdaengh e, kumna daandi, ntanh, tinctan, misi hei guay hei nang tuang puat lev akhiak the.

¹³Nang rui Grik, Tubal, khatni Mesek kandic guay lev lanvguanhna thing tuang puat guay tei tanzinc khatni bangh khang akhiak the.

¹⁴Beth Togarmamei nuncle nang tuang puat rui taanvtaanhmei takuanc, rih takuanc, khatni takuanh nthyammei lev akhiak the.

¹⁵Rhodesmei nunc rui nang lev lanvguanh the; dui khuangc khou lungc bammei meic mpeyna rui kaniw tuang guaipuang nei khatni gumhkw lev nang tuang puat akhiak the.

¹⁶Siriamei rui nang tuang lanvguanh puat khatni nang rui taanc patmei puatc mpeyna liu the. Kaniw rui emerald, haengcnrymmei phey, mwn huiloumei phey, linen gaymei, koral, khatni rubi rui nangniw tuang puat lev akhiak the.

¹⁷Juda lev Isarael rui ni gehu, nkhuaihdui, Olive thauc, khatni maruai tiina nang tuang puat akhiak the.

¹⁸Damaskasmei nunc rui Helbon tuang drakhadui khatni Sahar tuang ramhhiw rui nang tuang lanvguanh puat khatni nang rui taanc patmei puat lev akhiak the.

¹⁹Kaniw ntanh khatni maruai rui nang tuang puat akhiak the.

²⁰Dedanmei rui takuanh nam gumphey nang tuang puat lev akhiak the.

²¹Arabmei khatni Kedar kandih kaipouc nunc rui lauziu khatni ziuh rui nang tuang puat akhiak the.

²²Sheba khatni Raamamei lanvguanhmei nunc rui hira, kachaekc khatni gay liangmei maruai rui nang tuang puat akhiak the.

²³Haran, Kanne, khatni Eden kaidai, Sheba kaidaimei lanvguanhmei nunc, Asshur khatni Kilmad kaidai rui nang lev lanvguanh lanvdaengh e.

²⁴Kaniw rui kamanv kunghmei pheybaan, haengcnrymmei phey, khatni mwn luanhloumei, karangmei ntingphey, khatni kasiamh chuyloumei pheyriang hei guay nang khang zuanclou e.

²⁵Nang tuang lanvguanh puat guay tei daihmei puatc phunghmei rungh khou phungcna tat the. Nang hei nritmei puat rui thimc padikloumei duipui rungc kumc bam khwan e.

²⁶Rungh chaumei nunc rui nang ta duipui khou phungc patlou pwkhou, neihpat pwan rui nang ta duipui chung khou kanukc ralou the.

²⁷Nang rungh tei bak pwkhou, nang tuang lanvguanh puat guay tei, nang tuang rungh chaumei guay tei, rungh kasiamhmei nunc khatni lanvguanhmei nunc tei, rungh khou tat bam nimei rihmei kathuicna tei duipui khou amaan ngamlou kan the.

²⁸Rungh chaumei nunc rui dui alipna, kauhmei khwan tei duipaengc kagaengv pat tangc e.

²⁹“Nouhpai sinmei nunc tei kaniw tuang rungc guay ta mpatlouna tat kan the. Kaniw tei dui paengc thangc tat kan the.

³⁰Kaniw guay tei nang khang kap ranvna kap the, kaniw py khou mbut nroulouna, mbut ding khou liaulu liaulangna kap the.

³¹Nang khang rui kaniw py guat the, kaniw zaengsiphey baanv the. Kaniw reic sang makna kap the.

³²Kaniw rui kumna latlu the: ‘Tur ti hei tabui lev kida nina cho, ntaw duipui khou rimh rimna bammei kaidai ti hei?

³³Nang tuang lanvguanh puat, duipui paengc thangc phungc tatna bammei douc tei, nang rui zaatc kathuicna ta ti nggulou bam khwan e. Nang tuang puat rui guangh nunc ta, tilungcgaylou bam khwan e.

³⁴Ntaw thu nang hei duipui lungc khou ra ngamna ganclou bam the. Nang hei duipui syng thangc kalimh key kan the. Nang tuang puat guay, nang tuang mei guay nang lev, dui chung khou amaan nchamc the.’

³⁵“Hei tei howna duipui tin khou lungc bammei guay kaluang the. Khoutei bammei guangh guay ni ping the, pingmei rui kaniw mav taruh rah ra the.

³⁶Nang hei tat kan the, tingsaengzaeng khang tat kan the, khatni kandih kapwm khou bammei lanvguanhmei nunc tei ping the, kaniw khou ni mi dam tei guanglou pw khang ping the.”