Read Rongmei Naga EZEKIEL 28 Bible Online

EZEKIEL 28 - Rongmei Naga bible

EZEKIEL 28

¹RINGHPOUC rui akhou sa the,

²“Maansei nacle, Kauh Liangmei RINGHPOUC ai rui sa e twna Turmei dihsinpouc khou tei kumna sa o: Nang lyantina ‘Ai hei rav e’ twna nang rui sa e. Rav kumcna duipui chung khou guangh bamvpaeng khou nang dungc bam e twna nang rui sa e. Nang hei rav e twna nang rana nang ta ning bam sini, nang hei maansei de, rav hamh e.

³Nang hei Daniel suangc ningting the, nang ramh thay makmei tuang maek khe twna ning e.

⁴Nang tuang ningtyng-takh rui nang hei daandi kachaekc khou lungcgay the.

⁵Nang hei lanvguanh-lanvdaenghmei khou ningtyngna tuangc geicna tuangc bam the. Nang hei lungcgay the nang gaengh sw the!

⁶“Kumhpui zaeng rui Kauh Liangmei RINGHPOUC ai rui sa e: Nang ningting hei rav ningting lev nchamc di the twna nang ningmei zaeng rui,

⁷nang ta adow khang meic nzimei nunc ta phungc guang puni the. Nang tuang ramthai khatni ningting rui ntaanv guangloumei gaymei puat guay tei kaniw rui sw kamut kamai puni the.

⁸Duipui syng khou nang tuang tarou sw puni the.

⁹Nang ta swluai nimei nunc hu khou tei nang hei rav de twna nang sa puni dai cho? Nang ta swluai nimei nunc hu khou nang hei rav sw ngam ni tuang hamh the, nang hei maansei sw puni the.

¹⁰Kaniw tuang rav maekmei zaatc baihmei nunc baanc khou nang hei si kumcna theic puni. Kauh Liangmei RINGHPOUC ai rui sa the.”

¹¹RINGHPOUC rui akhou sa e,

¹²“Maansei nacle,” “Turmei guangc ruc khou guanglou nimei khang ta latlu tho. Kauh Liangmei RINGHPOUC ai rui sa e twna kakhou kumna sa tho: Nthuihmei twmei kiu kalwn swna howpatmei kiu nang hei bam khwan the. Nang hei ningtyng khwan the khatni lwnchav gay khwan the.

¹³Nang hei Ravguangc tuang pikwan Eden khou lungc bam khwan the. Kamanv kunghmei ntauh zaat guay: Sardi, topaz, diamon, rubi, beril, karnelian, jasper, saphir, emerald garnet hei guay hei rui karuhna bam khwan the. Nang hei kachaekc rui karuhna lungc bam khwan the. Nang ta damclou nungc tei rui mi guay hei nang khang twna kasiamhlou khwan the.

¹⁴Nang ta gaek bam khang ai rui meic pingmei baanchara khou tei lou khwan the. Nang atuang nthanmei chyngbut khou lungcna titah tamei mukta pang khou tatbam khwan e.

¹⁵Nang ta damclou raph khou tei rui thauna nang simei taanc kahouh makmei dak khou tei thu nang tuang kheiliak hei nthuihna bam khwan e.

¹⁶Nang hei zuanh khang khatni liu khang rui tynna lungc the, kumna mi hei rui nang ta abiw-adowmei khatni paapc khou zayloumei tuang the. Kumhpui zaeng rui ai rui nang ta atuang nthanmei chyngbut khou rui nthau ganhmei tuang the, khatni nang ta gaek bammei baanchara rui titah tamei mukta pang khou rui nang ta alay patmei tuang the.

¹⁷Nang hei nanglwn gay the twna gaengh sw the kumna nang zanc dinhmei rui nang ta mbamei kumcna tilungclou the. Hei zaeng rui ai rui nang ta kandih khou thuikeylou the kumna hei tei guangh nunc rui howna ramh thay kan khang swlou the.

¹⁸Nang rui lanvguanh-lanvdaenghmei khou heidikamv simei taanv taancna nang tuang kalummei bamv guay tei swtanac ngam the. Kumhpui zaeng rui ai rui mi kaidai tei mailouna ntei mutsutlou the. Ntaw thu nang ta mbut ti-mbaihlou the twmei nang ta zauhmei guay rui how the.

¹⁹Nang hei tingsaengzaeng khang amaan the, nang ta thaymei zaat guay rui ping the. Kaniw khou ni mi dam tei guanglou muay pw khang ping the.”

²⁰RINGHPOUC rui akhou sa e,

²¹“Maansei nacle, Sidon ruc khou nang zaw puanc kahuhna alat hei kaniw ruc khou salou o.

²²Kauh Liangmei RINGHPOUC ai rui sa e twna kaniw khou kumna sa o: He Sidon, nang hei ai rui zauczihmei di the; ai rui nang ruc khou taancloumei taanv zaeng khang rui meic nunc rui ata thuanc puni. Nang khou lungc bammei nunc ta dandi tiina ai hei adih nthan cho twmei lyanlou pwkhou ai hei RINGHPOUC dyng e twmei kaniw thay puni the.

²³Ai rui nang ruc khou ravpyan tiguang puni the khatni nang tuang chaengdai guay khou zei luangc puni the. Kazat kathuicna khou rui nang ta adow puni the, kumna nang mei nunc ta swluai puni the. Mi ganv khou kiu ai hei RINGHPOUC e twmei nang thay puni the.”

²⁴RINGHPOUC rui sa the, “Isaraelmei ta malana sw bammei kadaeng khou lungc nkuayna bammei zaat nunc hei Isaraelmei khang sauhraengh sw dat pw lak khe. Ai hei Kauh Liangmei RINGHPOUC e twmei kaniw thay puni.”

²⁵Kauh Liangmei RINGHPOUC rui sa e, “Isaraelmei nunc ti hei ai rui kaniw ta zinphakloumei bamv guay khou rui ai rui phungc guanglou dat puni, khou kiu ai hei nthanmei e twmei zaatc kaguayna rui thay puni. Isaraelmei nunc hei kaniw tuang kandic ai rui abangc Jakob khou tiiloumei kandic khou hei lungc dat puni.

²⁶Khoutei kaniw giuga makna lungc puni. Kaniw kai swna khatni drakhaluai lingcna lungc dat puni. Kaniw ta malana sw kanmei kainingmei guay ta tei ai rui dandi tii puni, kumna Isaraelmei hei thu giuga dat makna lungc puni. Ai hei RINGHPOUC kaniw Racguangc e twmei khou kiu kaniw thay puni.”